រាជធានីភ្នំពេញ ៖ រដ្ឋបាលរាជធានីភ្នំពេញបានចេញសេចក្តីណែនាំមួយស្តីពីការគ្រប់គ្រងសំរាម សំណល់រឹង នៅរាជធានីភ្នំពេញ ដោយតម្រូវឱ្យម្ចាស់ រោងចក្រ ម្ចាស់សហគ្រាស ផ្សារទំនើប ផ្សាររដ្ឋ…
រាជធានីភ្នំពេញ ៖ រដ្ឋបាលរាជធានីភ្នំពេញបានចេញសេចក្តីណែនាំមួយស្តីពីការគ្រប់គ្រងសំរាម សំណល់រឹង នៅរាជធានីភ្នំពេញ ដោយតម្រូវឱ្យម្ចាស់ រោងចក្រ ម្ចាស់សហគ្រាស ផ្សារទំនើប ផ្សាររដ្ឋ ផ្សារឯកជន អគារពាណិជ្ជកម្ម សណ្ឋាគារ មន្ទីរពេទ្យ និងអ្នករស់នៅក្នុងបុរី ជាដើម ត្រូវមានកាតព្វកិច្ចដាក់ធុងសំរាមដោយខ្លួនឯងជាចាំបាច់ និងត្រូវធ្វើការញែកសំរាមសើម សំរាមស្ងួត ការវេចខ្ចប់ខុសពណ៌ថង់តម្រូវ ការបញ្ចេញសំរាម និងសំណល់រឹង ឱ្យបានត្រឹមត្រូវ ពិសេសហាមដាក់សំណល់ដែលមានគ្រោះថ្នាក់ លាយឡំជាមួយនឹងសំរាមសើមនិងស្ងួត មិនដូច្នេះទេ នឹងត្រូវរងការផាកពិន័យ ទៅតាមច្បាប់ ព្រមទាំងការប្តឹងទៅតុលាការផង តាមកំហុសជាក់ស្តែង ។
លោក ឃួង ស្រេង អភិបាលរាជធានីភ្នំពេញ បានបញ្ជាក់នៅក្នុងសេចក្តីជូនដំណឹងមួយចុះនៅថ្ងៃទី១៦ កញ្ញា ២០២១ ស្ដីពីការគ្រប់គ្រងសំរាម សំណល់រឹង នៅក្នុងភូមិសាស្ត្ររាជធានីភ្នំពេញ ដែលមានចំនួន ៣ ទំព័រ ថា ដើម្បីឲ្យការអនុវត្តប្រព័ន្ធថ្មី នៃការគ្រប់គ្រងសំរាម សំណល់រឹង នៅរាជធានីភ្នំពេញ ឲ្យកាន់តែមានប្រសិទ្ធភាពខ្ពស់ រដ្ឋបាលរាជធានីភ្នំពេញ សូមធ្វើការណែនាំអំពីការញែក ការវេចខ្ចប់ ការទុកដាក់ និងការបញ្ចេញសំរាម សំណល់រឹង ។
លោកអភិបាលរាជធានីភ្នំពេញ បានបញ្ជាក់ក្នុងសេចក្តីជូនដំណឹងដដែលនោះថា អ្នករស់នៅក្នុងរាជធានីភ្នំពេញទាំងអស់ ត្រូវធ្វើការញែក វេចខ្ចប់ ទុកដាក់ និងបញ្ចេញសំរាមសំណល់រឹង ទៅតាមប្រភេទសំរាម តាមពេលវេលា និងថ្ងៃ ដែលត្រូវបានកំណត់ បើពុំដូច្នោះទេ នឹងប្រឈមការផាកពិន័យ ការប្ដឹងទៅតុលាការ និងផ្អាកអាជីវកម្មបណ្ដោះអាសន្នជាដើម ។ ក្នុងនោះផងដែរ រដ្ឋបាលរាជធានីភ្នំពេញ នឹងត្រូវចាប់ផ្ដើមអនុវត្តចាប់ពីថ្ងៃទី១ ខែវិច្ឆិកា ឆ្នាំ២០២១ ខាងមុខនេះតទៅ ។
ត្រូវញែកសំរាម សំណល់រឹង ជា០២ប្រភេទ គឺសំរាមសើម និងសំរាមស្ងួត ដោយដាក់នៅក្នុងថង់ដាច់ដោយឡែកពីគ្នា ៖ ១ -សំរាមសើម ៖ សំណល់ម្ហូបអាហារ សំណល់សរីរាង្គ ថ្លែឈើ ផ្កា ត្រូវដាក់ក្នុងថង់ពណ៌ខ្មៅ ។ ២ -សំរាមស្ងួត ៖ ក្រដាស់ ក្រដាសកាតុង ឡាំង គ្រៀងប្លាស្ទីក ហ្វូម ជ័រ ដែក កំប៉ុង ដប.. ត្រូវដាក់ក្នុងថង់ពណ៌ស ។
សូមបញ្ជក់ថា ក្រុមហ៊ុននឹងធ្វើការប្រមូល និងដឹកជញ្ជូនសំរាម សំណល់រឹង ដែលបានដាក់ក្នុងថង់ដែលបានកំណត់ទាំង២ប្រភេទនេះតែប៉ុណ្ណោះ ទៅតាមកម្មវិធីដាច់ដោយឡែកពីគ្នា ។ ការដាក់សំរាម សំណល់រឹង ក្នុងថង់ពណ៌ផ្សេងក្រៅពី ពណ៌ខ្មៅ និងពណ៌ស ក្រុមហ៊ុននឹងមិនប្រមូលឡើយ ។
នៅក្នុងសេចក្តីជូនដំណឹងដដែល លោក អភិបាលរាជធានីភ្នំពេញ បានបញ្ជាក់ថា «ហាមវេចខ្ចប់សំណល់ដែលបង្កគ្រោះថ្នាក់ ដូចជា អំបែងកញ្ចក់ និងសំណល់មុតស្រួចនានា លាយឡំជាមួយនឹងសំរាមសើម និងសំរាមស្ងួត» ។
ក្នុងសេចក្តីជូនដំណឹងដដែល លោក ឃួង ស្រេង បានធ្វើការព្រមានថា «ត្រូវទុកដាក់សំណល់ដែលបង្កគ្រោះថ្នាក់ទាំងនេះ ចូលក្នុងធុងសំរាម ឬប្រអប់ ដោយឡែកឱ្យបានត្រឹមត្រូវ ក្រុមហ៊ុននឹងប្រមួលនៅរៀងរាល់ថ្ងៃអាទិត្យ ។ ក្នុងករណីទុកដាក់ខុសពីការណែនាំនេះ ក្រុមការងារផាកពិន័យ នឹងធ្វើកំណត់ហេតុអំពីកំហុសឆ្គងលើកទី១ ។ បើនៅតែទុកដាក់ខុសទៀត នឹងទទួលការផាកពិន័យទៅតាមច្បាប់ និងលិខិតបទដ្ឋានគតិយុត្តិជាធរមាន ព្រមទាំងប្តឹងទៅតុលាការតាមកំហុសជាក់ស្តែង» ៕
ចែករំលែកព័តមាននេះ