រាជធានីភ្នំពេញ ៖ នៅទីបំផុតពិធីការិនីពូកែសំនួនវោហា នាង កែវ ចាន់និមល បានវិលមកឆាកតន្ត្រីជាថ្មីឡើងវិញហើយ បន្ទាប់ពីនាងបានអាក់ខានប្រមាណជាកន្លះឆ្នាំមកនេះ។ ចាប់តាំងពីជាសះស្បើយពីជំងឺកូវីដ១៩ រហូតមកទល់ពេលនេះមានរយៈពេលប្រមាណជា៦ខែហើយ ដែល កែវ ចាន់និមល បានផ្អប់ការងាររបស់ខ្លួនចោលទាំងស្រុង ដោយសារតែនាងនៅមានអាម្មណ៍ភ័យខ្លាចពីជំងឺដ៏កាចសា.ហាវនេះនៅឡើយ។
កែវ ចាន់និមល បានចំណាយពេលនៅផ្ទះ និងដើរលេងកំសាន្តតាមទីកន្លែងមួយចំនួន ដោយមិនបាននឹកនាពីអាជីពសិល្បៈនេះឡើយ។ ដោយឡែកមុននឹងឈានជើងចូលអាជីពជាពិធីការិនីឡើងវិញនាពេលនេះ នាងក៏ទើបតែវិលមកពីដើរកំសាន្តជាលក្ខណៈគ្រួសារនៅលើទឹកដីអាមេរិកផងដែរ។
យ៉ាងណា ស្រមោលខ្មៅនៃការភ័យខ្លាចនៃការឆ្លងរីករាលនៃជំងឺកូវីដ១៩ បានរសាត់ចេញពីអារម្មណ៍របស់នាងច្រើន ទើបបានធ្វើអោយតារារូបនេះអាចហ៊ានវិលមកចាប់ក្បាលមេក្រូឡើងលើឆាកតន្ត្រីជាថ្មីឡើងវិញនាពេលនេះ។
កែវ ចាន់និមល ត្រូវបានគេមើលឃើញបានឡើងឆាកតន្ត្រីជាពិធីការិនីឡើងវិញ ជាមួយពិធីករលោក សុខ រ៉ាស៊ី នៅកម្មវិធីតន្ត្រីផ្សាយផ្ទាល់តាមកញ្ចក់ទូរទស្សន៍ហង្សមាសកាលពីរាត្រីថ្ងៃព្រហស្បតិ៍ ទី១៦ ខែកញ្ញានេះ។
ជាមួយនឹងកាលវិលត្រឡប់មកវិញនាពេលនេះ កែវ ចាន់និមល បានបង្ហោះសារខ្លីមួយតាមគណនេយ្យហ្វេសប៊ុករបស់ខ្លួនថា «រួចរាល់សម្រាប់ការឡើងឆាកតន្ត្រីថ្ងៃទី១ បន្ទាប់ពីសម្រាកជាង៦ខែ អរគុណសម្រាប់ការផ្តល់កម្លាំងចិត្តរបស់បងប្អូនទាំងអស់គ្នា»។
ទោះជាយ៉ាងណា ការវិលមកឆាកតន្ត្រីជាថ្មីនេះដែរ កែវ ចាន់និមល ក៏ដូចជាអ្នកសិល្បៈផ្សេងទៀតដែរ ដោយនាងមានការប្រយ័ត្នប្រយែង ដោយពាក់ម៉ាស់ និងរក្សាគម្លាតតាមគោលការណ៍របស់ក្រសួងសុខាភិបាល។
ជាការកត់សម្គាល់អ្នកនាង កែវ ចាន់និមល និងក្រុមគ្រួសារត្រូវបានគេរកឃើញថា បានផ្ទុកជំងឺកូវីដ១៩កាលពីអំឡុងខែកុម្ភៈ ឆ្នាំ២០២១ បន្ទាប់ពីនាងបានឆ្លងពីក្រុមការងារនៅពេលថតស្ពតពាណិជកម្មមួយ។ យ៉ាងណា ក្រោយពេលសម្រាកព្យាបាលមួយរយៈនាង និងក្រុមគ្រួសារបានជាសះស្បើយពីជំងឺដ៏កាចសា.ហាវមួយនេះ ដោយមិនមានអ្នកណាគ្រោះថ្នាក់ដល់អាយុជីវិតនោះឡើយ។
ចំណែកការវិលមករកអាជីពរបស់អ្នកនាង កែវ ចាន់និមល នាពេលនេះត្រូវបានចាត់ទុកជាតារាមួយទៀតនៅផលិតកម្មហង្សមាស ដែលរួមមានលោក ណុប បាយ៉ារិទ្ធ និង វីឌីណែត ក៏បានវិលមកឆាកតន្ត្រីដូចគ្នា ក្រោយជាសះស្បើយពីជំងឺកូវីដ១៩ ខណៈពេលតារាចម្រៀងនាង សួស វីហ្សា នៅមិនទាន់វិលមកវិញនៅឡើយ បើទោះបីជានាងបានជាសះស្បើយពីជំងឺដ៏កាចសា.ហាវមួយនេះក៏ដោយ៕
ចែករំលែកព័តមាននេះ