ប៉ៃលិន បើកដំណើរការសាលារៀនឡើងវិញហើយ ចាប់ពីថ្នាក់មតេយ្យ ដល់អនុវិទ្យាល័យ
- ប៉ៃលិន
ខេត្តប៉ៃលិន៖ ការបើកដំណើរការបង្រៀន និងរៀន នៅតាមសាលារៀនឡើងវិញ នៅខេត្តប៉ៃលិន បានធ្វើឡើង នៅព្រឹកថ្ងៃទី១៦ ខែកញ្ញា ឆ្នាំ២០២១ នេះ។…
ខេត្តប៉ៃលិន៖ ការបើកដំណើរការបង្រៀន និងរៀន នៅតាមសាលារៀនឡើងវិញ នៅខេត្តប៉ៃលិន បានធ្វើឡើង នៅព្រឹកថ្ងៃទី១៦ ខែកញ្ញា ឆ្នាំ២០២១ នេះ។…
ខេត្តប៉ៃលិន៖ ការបើកដំណើរការបង្រៀន និងរៀន នៅតាមសាលារៀនឡើងវិញ នៅខេត្តប៉ៃលិន បានធ្វើឡើង នៅព្រឹកថ្ងៃទី១៦ ខែកញ្ញា ឆ្នាំ២០២១ នេះ។ ក្នុងនោះ មានសាលារៀន សរុបចំនួន ៤៣សាលា ដែលបានបើកដំណើរការឡើងវិញ ក្នុងចំណោមសាលារដ្ឋចំនួន ៩៤សាលា ក្នុងនោះ ពីថ្នាក់បឋម ដល់អនុវិទ្យាល័យ ដែលមានសិស្សសរុបចំនួន ៦៦៧១នាក់ ហើយក្នុងមួយថ្នាក់ បង្រៀនតែចំនួន ១៥នាក់ ទៅ ២០នាក់យ៉ាងច្រើន។ នេះបើតាមលោក តង់ ធារា ប្រធានមន្ទីរអប់រំ យុវជន និងកីឡា ខេត្តប៉ៃលិន។
ក្នុងពេលសាលារៀនបើកដំណើរការឡើងវិញនេះ លោកជំទាវ បាន ស្រីមុំ អភិបាលខេត្តប៉ៃលិន បានដឹកនាំក្រុមការងាររដ្ឋបាលខេត្ត ឯកឧត្តម សៅ សារ៉ាត់ អ្នកតំណាងរាស្រ្ត មណ្ឌលប៉ៃលិន អាជ្ញាធរក្រុងស្រុក មន្រ្តីរាជការ មន្ទីរអប់រំខេត្ត មន្ទីរសុខាភិបាលខេត្ត យុវជនសហភាពសហព័ន្ធយុវជនកម្ពុជាខេត្ត លោកគ្រូ អ្នកគ្រូ បន្តចុះបើកសាលារៀន និងពិនិត្យដំណើរការបង្រៀន និងរៀនរបស់សិស្សានុសិស្ស និងលោកគ្រូ អ្នកគ្រូ ក៏ដូចជាបានសំណេះសំណាលជាមួយប្អូនៗ កុមារា កុមារី លោកគ្រូ អ្នកគ្រូ ស្ថិតក្នុងក្រុងប៉ៃលិន។
លោកជំទាវអភិបាលខេត្ត បានអញ្ជើញទៅសាលាបឋមសិក្សា អូរតាពុក សាលាបឋមសិក្សាអូរតាវ៉ៅ សាលាបឋមសិក្សាក្រចាប់ និងសាលាបឋមសិក្សាទួលល្វា។ រីឯមត្តេយ្យសិក្សា ធនធានសាលាក្រៅ ,សាលាបឋមសិក្សា ហ៊ុន សែនសាលាក្រៅ និងអនុវិទ្យាល័យភ្នំកុយ ដែលស្ថិតក្នុងស្រុកសាលាក្រៅ។
លោកជំទាវ បាន ស្រីមុំ អភិបាលខេត្តប៉ៃលិន បានលើកឡើងថា លោកគ្រូ អ្នកគ្រូ ត្រូវយកចិត្តទុកដាក់ មើលការខុសត្រូវ លើសិស្សានុសិស្សទាំងអស់ តាមសាលារៀងៗខ្លួន ធ្វើយ៉ាងណាកុំឱ្យសាលារៀន ដែលបើកបង្រៀនហើយ ត្រូវបិទវិញម្តងទៀត ដោយសារការឆ្លងជំងឺកូវីដ១៩ គឺត្រូវអនុវត្តតាមវិធានការ ៣ការពារ ៣កុំ របស់ប្រមុខរាជរដ្ឋភិបាល និងធ្វើតាមការណែនាំរបស់ក្រសួងសុខាភិបាល គឺលាងដៃជាមួយទឹកអាល់កុល ឬជែល ត្រូវឱ្យសិស្សពាក់ម៉ាសជាប់ជានិច្ច មិនត្រូវឱ្យចេញលេងជួបជុំគ្នានោះឡើយ។
លោកជំទាវ ក៏បានអំពាវដល់មាតាបិតា ឬអាណាព្យាបាលនាំកូនៗ ទៅចាក់វ៉ាក់សាំង នៅថ្ងៃស្អែកទី១៧ ខែកញ្ញា ឆ្នាំ២០២១ នៅតាមមណ្ឌលចាក់វ៉ាក់សាំង ដែលរដ្ឋបាលខេត្ត បានជំរាបជូន ដូចជា មន្ទីរពេទ្យបង្អែកខេត្តប៉ៃលិន មណ្ឌលសុខភាពផ្សារព្រំ, មណ្ឌលសុខភាពភ្នំស្ពង់ និងមណ្ឌលសុខភាព ភ្នំព្រាល ចាប់ពីម៉ោង ៨ ព្រឹកតទៅ៕ នីយ៉ា
ចែករំលែកព័តមាននេះ