រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ជំហរថា សម្តេចពិតជាបានចូលរួមតាមប្រព័ន្ធ Zoom ជាមួយក្រុមប្រឆាំង តែកុំយល់ច្រឡំថា មានការដោះស្រាយ ឬចរចានយោបាយ គឺគ្មានឡើយ ។
ការបញ្ជាក់របស់ សម្តេចតេជោ ហ៊ុនសែន បន្ទាប់ពីគណនីហ្វេសប៊ុកមួយ ឈ្មោះ«Bunchhay San» បានសរសេរក្នុងខមមិនហ្វេសប៊ុកសម្តេចថាយ៉ាងដូច្នេះថា ៖«សម្តេចចូល Zoom ជាមួយក្រុមក្បត់ជាតិអីញ្ចឹង អត់ខ្លាចគេចោទសម្តេចថា ជាក្រុមតែមួយឬទេ0x017d7 ខ្ញុំគ្រាន់តែប្រាប់សម្តេចយកបុណ្យទេ ប្រយ័ត្នជាប់គុក..ខិខិ» ។
ជាមួយគ្នានោះដែរសម្តេចតេជោ បានខមមិនឆ្លងវិញយ៉ាងដូច្នេះថា ៖«តាមចាប់ពួកក្បត់ជាតិត្រូវចូលដល់កន្លែងពួកក្បត់ជាតិទើបចាប់បាន ។ យល់ទេ»។
ជាមួយគ្នាម្ចាស់ហ្វេសប៊ុកឈ្មោះ Bunchhay San ក៏បានស្នើឲ្យមានការដោះស្រាយនយោបាយ ក៏ដូចជា ការចរចាគ្នាផងដែរ ។ យ៉ាងណាក្តី សម្តេចតេជោ បានបញ្ជាក់ថា មិនមានការចរចានយោបាយណាមួយទៀតឡើយ ។
សម្តេចបានសរសេរតបវិញយ៉ាងដូច្នេះថា ៖«ខ្ញុំបានធ្វើច្រើនណាស់ហើយក្នុងរឿងបង្រួបបង្រួមជាតិតែពួកក្បត់ជាតិវាមិនយល់អំពីការបង្រួបបង្រួមជាតិទេ ។ ពេលនេះគ្មានរឿងនយោបាយដែលត្រូវដោះស្រាយដោយការចចារនោះទេ ។ អ្វីដែលត្រូវធ្វើ គឺអ្នកមានទោសត្រូវជាប់គុក2/3សិនចាំគិតដល់ការលើកលែងទោស ឬបន្ធូបន្ថយទោស» ។
សម្តេចតេជោបន្តថា សម្រាប់ដំណើការនយោបាយយើងបាន និងកំពុងឈានទៅបោះឆ្នោតឃុំសង្កាត់២០២២ និងបោះឆ្នោតថ្នាក់ជាតិ២០២៣ដោយមានការចូលរួមពីបក្សនយោបាយទាំងគណបក្សចាស់ និងគណបក្សដែលទើបបង្កើតថ្មីយ៉ាងច្រើន ។
ជាមួយគ្នានោះដែរ សម្តេចក៏បានគូសបញ្ជាក់ថា ៖«សុំកុំយល់ខុសថា ខ្ញុំ ចូលក្នុង Zoom ជាមួយបងប្អូនថ្ងៃមុនថាជាការផ្តល់សញ្ញាសម្រាប់ការចរចាឲ្យសោះ តែការចូលទៅនោះចង់ជូនសារទៅក្រុមឧទ្វាមឲ្យភ្លឺភ្នែកថានៅកន្លែងណា ក៏មានមនុស្សរបស់ហ៊ុន សែនដែរ សូមប្រុងប្រយ័ត្នកុំធ្វើ សកម្មភាពណាមួយប្រឆាំងជាមួយផលប្រយោជន៍ជាតិ» ។
សម្តេចបន្ថែមថា សូមឈប់ស្រមើស្រម៉ៃថា បក្សដែលតុលាការរំលាយនឹងរស់ឡើងវិញ ហ៊ុន សែន នឹងលើកលែងទោសឲ្យ.ហ៊ុន សែននឹងបើកការចចាររកដំណោះស្រាយនយោបាយ.ហ៊ុន សែន ខ្លាចអន្តរជាតិ ។ល។
ជាមួយគ្នានោះដែរ សម្តេចក៏បានសម្តែងសង្ឃឹមថា ការបកស្រាយនេះនឹងធ្វើឲ្យអ្នកវិភាគល្ងង់ទូទៅ និងអ្នករង់ចាំការយោគយល់ពីហ៊ុន សែន ឬហ៊ុន សែន ភ័យខ្លាចបានភ្លឺស្វាងឡើងវិញបន្ទាប់ពីសន្លប់ធំអស់ប៉ុន្មានថ្ងៃក្រោយzoom ៕
ចែករំលែកព័តមាននេះ