ប្រិយមិត្តដែលនិយមស្តាប់បទបែបយុវវ័យ ប្រហែលជានៅមិនទាន់ភ្លេចនៅឡើយទេ អតីតតារាចម្រៀងក្នុងផលិតកម្ម M នាង អេនីតា ដែលបានចាប់ឈោងភាពល្បីល្បាញមួយរយៈនាពេលកន្លងមក។ តារាចម្រៀងរូបនេះ
រាជធានីភ្នំពេញ ៖ ប្រិយមិត្តដែលនិយមស្តាប់បទបែបយុវវ័យ ប្រហែលជានៅមិនទាន់ភ្លេចនៅឡើយទេ អតីតតារាចម្រៀងក្នុងផលិតកម្ម M នាង អេនីតា ដែលបានចាប់ឈោងភាពល្បីល្បាញមួយរយៈនាពេលកន្លងមក។ តារាចម្រៀងរូបនេះ ធ្លាប់បានអង្រួងដួងចិត្តទស្សនិកជនតាមរយៈបទចម្រៀងដែលទទួលបានការគាំទ្រមួយចំនួនពីប្រិយមិត្តអ្នកស្តាប់។
យ៉ាងណា ក្រោយពីបានប្រឡូកអាជីពចម្រៀងបានប៉ុន្មានឆ្នាំ អេនីតា បានសម្រេចបញ្ចប់សិល្បៈរបស់ខ្លួនត្រឹមពាក់កណ្តាលដោយស្ងៀមស្ងាត់មិនដឹងមូលហេតុ។ ហើយការឈប់ពីអាជីពសិល្បៈយ៉ាងតក់ក្រហល់នេះ ត្រូវបានទស្សនិកជនមួយចំនួនដាក់ការសង្ស័យថា អេនីតា ទំនងជាសាងគ្រួសារដែលធ្វើនាងត្រូវដើរចេញពីសិល្បៈនាពេលនេះ។
ពាក់ព័ន្ធនឹងការចាកចេញពីការងារសិល្បៈនាពេលនេះ កន្លងមក អេនីតា ធ្លាប់បានអះអាងប្រាប់កោះសន្តិភាពតាមសារអេឡិចត្រូនិចដោយខ្លីថា ដោយសារនាងមានភារកិច្ចផ្ទាល់ខ្លួន ខណៈពេលដែលនាងសុំលាក់មិនធ្វើការអធិប្បាយអ្វីវែងឆ្ងាយពីរឿងនេះឡើយ។
ទោះជាយ៉ាងណា កាលពីពេលថ្មីនេះ ទស្សនិក ជាពិសេសប្រិយមិត្តដែលធ្លាប់គាំទ្របទចម្រៀងរបស់ អេនីតា បានសម្តែងការភ្ញាក់ផ្អើលក្នុងពេលតារារូបនេះ ស្រាប់តែប្រកាសពីការត្រៀមខ្លួនវិលមកកាន់សង្វៀនសិល្បៈចម្រៀងជាថ្មីឡើងវិញ។
អេនីតា បានបង្ហោះសារខ្លីមួយតាមគណនេយ្យហ្វេសប៊ុករបស់ខ្លួនថា «សួស្តី អ្នកគាំទ្ររបស់ អេនីតា ខ្ញុំនឹងត្រឡប់មកវិញឆាប់ៗនេះ Thank for alway miss my song» ។
ជាការកត់សម្គាល់តាមរយៈសារដែលនាងបង្ហោះខាងលើ នេះប្រាកដណាស់ អេនីតា បានត្រៀមខ្លួនមកអុកឡុកវិស័យចម្រៀងឡើងវិញ ឆ្លើយតបការចង់ឃើញពីប្រិយមិត្តគាំទ្ររូបនាង។
ទោះជាយ៉ាងណា គេនៅមិនទាន់ដឹង និងប្រាកដនៅឡើយទេថា ការវិលត្រឡប់របស់ អេនីតា នាពេលនឹងអាចចូលជ្រកផលិតកម្មណាមួយ ហើយទទួលបានជោគជ័យឬយ៉ាងណាឡើយ? ក្នុងពេលបច្ចុប្បន្នតារាចម្រៀងថ្មីៗវ័យក្មេងជាច្រើនកំពុងតែរីកដុះដាល និងមានអ្នកគាំទ្រច្រើនផងដែរ។
ពាក់ព័ន្ធនឹងបញ្ហាខាងលើនេះ កោះសន្តិភាពនៅមិនទាន់អាចស្វែងរកការបញ្ជាក់បន្ថែមពី អេនីតា បាននៅឡើយទេ គិតត្រឹមថ្ងៃទី១៦ ខែកញ្ញា ឆ្នាំ២០២១នេះ ខណៈពេលដែលសាកសួរទៅ នៅមិនទាន់មានការឆ្លើយតប។ យ៉ាងណា ការវិលត្រឡប់ពីតារាចម្រៀងនាង អេនីតា នាពេលនេះចាត់ទុកជាដំណឹងដ៏ល្អមួយសម្រាប់ប្រិយមិត្តគាំទ្ររូបនាង ក្នុងពេលដែលពួកគេបានទន្ទឹងរង់ចាំការចេញបទថ្មីរបស់នាងបន្ថែមទៀត៕
ចែករំលែកព័តមាននេះ