- ភ្នំពេញ
ភ្នំពេញ៖ ដើម្បីបើកសាលារៀន នៅថ្នាក់បឋមសិក្សាបាន ទាមទារឲ្យចាក់វ៉ាក់សាំងដល់កុមារអាយុចាប់ពី ៦ឆ្នាំ ដល់ក្រោម ១២ឆ្នាំ បន្ទាប់ពីកុមារ និងយុវវ័យ អាយុចាប់ពី…
ភ្នំពេញ៖ ដើម្បីបើកសាលារៀន នៅថ្នាក់បឋមសិក្សាបាន ទាមទារឲ្យចាក់វ៉ាក់សាំងដល់កុមារអាយុចាប់ពី ៦ឆ្នាំ ដល់ក្រោម ១២ឆ្នាំ បន្ទាប់ពីកុមារ និងយុវវ័យ អាយុចាប់ពី ១២ឆ្នាំ ដល់ក្រោម ១៨ឆ្នាំ ចាក់វ៉ាក់សាំងបានស្ទើរទាំងអស់ ហើយបានចូលរៀននៅថ្នាក់អនុវិទ្យាល័យ និងវិទ្យាល័យ ជាបន្តបន្ទាប់។ ប៉ុន្តែតាមការសិក្សា និងការអះអាងរបស់អ្នកជំនាញ គឺវ៉ាក់សាំង ជាឧបករណ៍មួយសំខាន់ ក្នុងការប្រយុទ្ធប្រឆាំងជំងឺកូវីដ១៩ តែក៏មិនមានន័យថា អ្នកចាក់វ៉ាក់សាំងរួចហើយ មិនឆ្លងកូវីដ១៩ នោះឡើយ។
យ៉ាងណាក៏ដោយ តាមរយៈសារជាសំឡេង នៅព្រឹកថ្ងៃពុធ ទី១៦ ខែកញ្ញានេះ សម្តេចតេជោ នាយករដ្ឋមន្ត្រី ហ៊ុន សែន បានប្រកាសថា យុទ្ធនាការចាក់វ៉ាក់សាំង បង្ការជំងឺកូវីដ១៩ ដល់កុមារ អាយុចាប់ពី ៦ឆ្នាំ ដល់ ១២ឆ្នាំ នឹងចាប់ផ្តើម នៅថ្ងៃសុក្រ ទី១៧ ខែកញ្ញា។ ការចាក់វ៉ាក់សាំងដល់កុមារ អាយុចាប់ពី ៦ឆ្នាំ ដល់ ១២ឆ្នាំ ក្នុងក្របខណ្ឌទូទាំង ដែលមានជាង ១លាន ៨សែននាក់នេះ ដើម្បីឈានទៅបើកសាលារៀន នៅថ្នាក់បឋមសិក្សា ក្រោយសាលារៀន ថ្នាក់អនុវិទ្យាល័យ និងវិទ្យាល័យ ដែលបានបើកដំណើរការជាបន្តបន្ទាប់។
មានហេតុផល ២យ៉ាង ដែលប្រមុខរាជរដ្ឋាភិបាល សម្រេចចាក់វ៉ាក់សាំងបង្ការជំងឺកូវីដ១៩ ដល់កុមារអាយុពី ៦ឆ្នាំ ទៅ ១២ឆ្នាំ គឺទី១-ប្រទេសនានា នៅលើពិភពលោក បានសិក្សាលើវ៉ាក់សាំងនេះរួចហើយ ហើយគេក៏បានប្រើប្រាស់ សម្រាប់កុមារ ដែលមានអាយុក្រោម ១២ឆ្នាំរួចមកហើយដែរ។ ទី២-វ៉ាក់សាំង មិនមែនជាបញ្ហាលំបាករកទេ។ ពោលគឺ ម្ខាង វ៉ាក់សាំងអនុញ្ញាត ហើយម្ខាង យើងមានវ៉ាក់សាំងក្នុងដៃរួចជាស្រេច។
តាមសម្តេចប្រមុខរាជរដ្ឋាភិបាល បើមិនចាក់វ៉ាក់សាំងដល់កុមារ អាយុចាប់ពី ៦ឆ្នាំ ដល់ក្រោម ១២ឆ្នាំទេ នោះយើងមិនអាចឈានទៅដល់ការបើកសាលាបឋមសិក្សា បានទេ។
សម្តេចតេជោ ហ៊ុន សែន ក៏បានប្រកាសពីគម្រោងគិតគូរចាក់វ៉ាក់សាំង ដល់កុមារ ដែលនៅថ្នាក់មត្តេយ្យសិក្សា ក្នុងរង្វង់ពីអាយុពី ៣ឆ្នាំ ទៅ ៦ឆ្នាំថែមទៀត។ តែចំពោះមុខ ត្រូវដោះស្រាយ គឺការវ៉ាក់សាំង សម្រាប់កុមារ ពី ៦ឆ្នាំ ទៅ ១២ឆ្នាំ ដែលវាអាចផ្តល់ឱកាសឲ្យកុមាររបស់យើង អាចចូលសិក្សា នៅថ្នាក់បឋមសិក្សា ដែលនឹងត្រូវបើកបន្តបន្ទាប់ទៀត ក្រោយបើកសាលារៀន នៅថ្នាក់អនុវិទ្យាល័យ វិទ្យាល័យ និងមហាវិទ្យាល័យ ដែលបាន និងកំពុងធ្វើ ជាបន្តបន្ទាប់ ហើយនៅថ្ងៃទី១៥កញ្ញា ចាប់ផ្តើមនៅខេត្តកណ្តាល និងរាជធានីភ្នំពេញ។
យ៉ាងណាក៏ដោយ វ៉ាក់សាំង ពិតមែនជាឧបករណ៍សំខាន់ ក្នុងការប្រយុទ្ធប្រឆាំងនឹងជំងឺកូវីដ១៩ តែវ៉ាក់សាំងតែមួយមុខ ក៏មិនអាចការពារមិនឲ្យឆ្លងជំងឺកូវីដ១៩ បាន ១០០% នោះឡើយ។ ចូរកុំភ្លេចថា មកដល់ថ្ងៃទី១៤ ខែកញ្ញា ឆ្នាំ២០២១ ចំនួនអ្នកចាក់វ៉ាក់សាំង បង្ការជំងឺកូវីដ១៩ នៅទូទាំងប្រទេស មានចំនួន ១១ ៤៨៩ ៦៦១នាក់ ស្មើនឹង ៧១,៨១% នៃប្រជាជនកម្ពុជាសរុប ១៦លាននាក់។ ក្នុងនោះ អ្នកអាយុចាប់ពី ១៨ឆ្នាំឡើង ចាក់វ៉ាក់សាំង បានចំនួន ៩ ៧៧៣ ៩៦០នាក់ ស្មើនឹង ៩៧,៧៤% នៃចំនួនអ្នកប៉ាន់ស្មាន ត្រូវចាក់វ៉ាក់សាំង ១០លាននាក់។ រីឯកុមារ និងយុវវ័យ អាយុចាប់ពី ១២ឆ្នាំ ដល់ក្រោម ១៨ឆ្នាំ គិតត្រឹមថ្ងៃទី១៤ ខែកញ្ញា ឆ្នាំ២០២១ ចាក់វ៉ាក់សាំង បានចំនួន ១ ៧១៥ ៧០១នាក់ ស្មើនឹង ៨៧,២៣% នៃចំនួនអ្នកត្រូវចាក់វ៉ាក់សាំង ១ ៩៦៦ ៩៣១នាក់។
ចំនួនអ្នកចាក់វ៉ាក់សាំងនេះ គឺជិតគ្រប់តាមចំនួនផែនការហើយ។ ក្នុងនោះ ក៏មានអ្នកចាក់វ៉ាក់សាំងរួច ២ដូស និងចាក់ដល់ទៅ ៣ដូស ប៉ុន្តែក៏នៅតែរកឃើញឆ្លងកូវីដ១៩ ជាបន្តបន្ទាប់ដែរ។ គ្រាន់តែថា បើបានចាក់វ៉ាក់សាំងហើយ គឺបើឆ្លងកូវីដ មិនមានស្ថានភាពធ្ងន់ធ្ងរនោះទេ។
យ៉ាងណាក៏ដោយ នៅរៀងរាល់ថ្ងៃ ពិសេសក្នុងរយៈពេលប៉ុន្មានថ្ងៃចុងក្រោយនេះ ចំនួនអ្នកឆ្លងកូវីដ១៩ នៅទូទាំងប្រទេស មានចំនួនកើនឡើងដល់ទៅជាង ៦០០នាក់ ក្នុង ១ថ្ងៃ ហើយអ្នកស្លាប់ស្ថិតក្នុងរង្វង់ ១០នាក់ រៀងរាល់ថ្ងៃ។ គិតត្រឹមថ្ងៃទី១៤ ខែកញ្ញា ឆ្នាំ២០២១ ចំនួនអ្នកឆ្លងកូវីដ១៩ សរុបទូទាំងប្រទេស មានចំនួន ១០១ ៤៤៣នាក់។ ករណីជាសះស្បើយ មានចំនួន ៩៥៣៦៧នាក់ និងករណីស្លាប់សរុប មានចំនួន ២០៦៧នាក់។
ម្យ៉ាងវិញទៀត មកដល់ថ្ងៃទី១៥ ខែកញ្ញា ឆ្នាំ២០២១ នៅខេត្តបន្ទាយមានជ័យ ទោះបីជាកុមារ នៅថ្នាក់បឋមសិក្សា អាយុចាប់ពី ៦ឆ្នាំ ដល់ក្រោម ១២ឆ្នាំ មិនបានចាក់វ៉ាក់សាំងក៏ពិតមែន តែសាលារៀន ដែលមិនមានហានិភ័យនៃការឆ្លងរាលដាលជំងឺកូវីដ១៩ នៅតាមភូមិស្រុកជាច្រើន បានបើកដំណើរការឡើងវិញ ជាបន្តបន្ទាប់រួចហើយ ខណៈសាលារៀននៅខេត្តមណ្ឌលគិរី បើកដំណើរការឡើងវិញ កាលពីថ្ងៃទី៦កញ្ញា ហើយនៅខេត្តព្រះសីហនុ បើកដំណើរការសាលារៀន កាលពីថ្ងៃទី១៣ ខែកញ្ញា។
ក្រៅពីនោះ ក៏មានសិស្សមួយចំនួន ពិសេសនៅសាលារៀនឯកជន គឺអាណាព្យាបាល និងឪពុកម្តាយ សម្រេចឲ្យបន្តរៀនតាមអនឡាញ ដោយមិនទាន់ឲ្យចូលរៀននៅសាលាដោយផ្ទាល់នៅឡើយទេ។ មូលហេតុ ដោយសារតែពួកគាត់ នៅខ្លាច និងបារម្ភពីការឆ្លងរាលដាលជំងឺកូវីដ១៩ ពិសេសនៅភ្នំពេញ ដែលក្រោយធ្វើតេស្តយកសំណាកលើគ្រូបង្រៀន និងបុគ្គលិកអប់រំ ជាង ១ម៉ឺននាក់ កាលពីថ្ងៃទី១៤ ខែកញ្ញា ត្រូវបានប្រកាសថា រកឃើញគ្រូ និងបុគ្គលិកអប់រំ ២៤នាក់ ឆ្លងកូវីដ១៩។
ជាសរុប នៅពេលនេះ សម្រាប់កម្ពុជាយើង ក៏ដូចជា នៅលើពិភពលោក គឺអ្នកចាក់វ៉ាក់សាំងរួចហើយ ក៏នៅតែអាចឆ្លងកូវីដ១៩។ ដូច្នេះមានតែវិធីបន្តការពារ តាមរយៈអនុវត្តវិធានការសាមញ្ញៗ គឺ ៣កុំ និង ៣ការពារ នោះគឺកុំជួបជុំមនុស្សច្រើន កុំប៉ះពាល់-ចាប់ដៃគ្នា និងកុំទៅកន្លែងបិទជិត ប្រើប្រាស់ម៉ាស៊ីនត្រជាក់ច្រើន។ ក្រៅពីនោះ ម្នាក់ៗ រាប់ទាំងសិស្ស និងទាំងគ្រូ ក៏ត្រូវបន្តពាក់ម៉ាសជាប់ជានិច្ច លាងសម្អាតដៃញឹកញាប់ និងរក្សាគម្លាតសុវត្ថិភាព ទាំងនៅក្នុងថ្នាក់រៀន និងទាំងនៅពេលចេញលេង៕
ចែករំលែកព័តមាននេះ