ខេត្តព្រៃវែង ៖ នៅព្រឹកថ្ងៃទី១៤ កញ្ញា ក្រុមការងារគណៈបញ្ជាការឯកភាពស្រុកពាមរក៍ ដឹកនាំដោយលោក យ៉ែម ភារ៉ា អភិបាលរងស្រុក សហការជាមួយមន្ត្រីជលផលស្រុក បានចុះបង្ក្រាបបទល្មើសនេសាទ នៅចំណុចភូមិបឹងផ្សោត ឃុំពាមមានជ័យ ស្រុកពាមរក៍ ដោយបានរកឃើញឧបករណ៍នេសាទខុសច្បាប់ជាច្រើន ដែលជនខិលខូចបានលួចដាក់ ដើម្បីចាប់ប្រមូលយកត្រី ។
មន្ត្រីជំនាញជលផលស្រុកពាមរក៍បានអោយដឹងថា ឧបករណ៍នេសាទខុសច្បាប់ ដែលរកឃើញនិងចាប់បានទាំងអស់ ត្រូវបានដុតបំផ្លាញចោលនៅហ្នឹងកន្លែងដែលក្នុងនោះរួមមាន ៖ លូស្បៃមុងចំនួន30មាត់ របាំងស្បៃមុងប្រវែង 2100m បង្គោលចម្រឹងចំនួន430ដើម ជាមួយគ្នានោះ ក៏បានប្រលែងត្រីចម្រុះចំនួន10kg ចូលទៅក្នុងបឹងធម្មជាតិវិញផងដែរ។
ក្រុមការងារគណៈបញ្ជាការឯកភាពស្រុក និងមន្ត្រីជំនាញជលផល បានបញ្ជាក់ថា នៅក្នុងភូមិសាស្ត្រស្រុក ការលួចនេសាទដោយខុសច្បាប់ ដោយប្រើប្រាស់គ្រប់រូបភាព គ្រប់មធ្យោបាយ គឺនៅតែបន្តកើតមានជារឿយៗ ដោយក្រុមជនខិលខូចទាំងនោះ ចង់បានតែផលប្រយោជន៍ផ្ទាល់ខ្លួនបន្តិចបន្តួច មិនគិតពីផលប្រយោជន៍ជាតិនោះទេ តែទោះជាយ៉ាងណា ទាំងមន្ត្រីជំនាញ និងអាជ្ញាធរ ក៏តែងតែតាមប្រមាញ់ និងចុះបង្ក្រាបជាបន្តបន្ទាប់ផងដែរ ជាក់ស្តែងដូចពេលនេះស្រាប់។
ដោយឡែក នៅខេត្តកំពង់ឆ្នាំងវិញ សមត្ថកិច្ចចម្រុះ ដែលដឹកនាំដោយលោក ប្រាក់ លាងហួរ អនុប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ឆ្នាំងនៅថ្ងៃទី១៤ កញ្ញា ដដែល ក៏មានការចុះបង្ក្រាបបទល្មើសនេសាទនៅចំណុចព្រៃកោះ ក្នុងភូមិសាស្ត្រ ឃុំផ្លូវទូក ស្រុកកំពង់លែង ដែលជនល្មើសបានដាក់របាំងស្បៃមុងក្នុងរដូវបិទនេសាទ ។
លោក ប្រាក់ លាងហួរ បាននិយាយឲ្យដឹងថា ដើម្បីទប់ស្កាត់បទល្មើសនេសាទ ក្នុងរដូវបិទនេសាទដូចជារបាំងស្បៃមុង របាំងសាច់អួន ដែលបានកើតឡើងលើភូមិសាស្ត្រ ឃុំផ្លូវទូក ថ្ងៃនេះសមត្ថកិច្ចចម្រុះមាននគរបាលស្រុក កងរាជអាវុធហត្ថស្រុកកំពង់លែង សហការជាមួយនឹងមន្ត្រីជំនាញជលផលបានចុះបង្ក្រាបបទល្មើសនេសាទ ដែលកំពុងកើតឡើងក្នុងភូមិសាស្ត្រខាងលើ
នេះ ។
ជាលទ្ឋផល ជាក់ស្ដែង យើងបានចុះរុះរើរបាំងស្បៃមុង២៨កន្លែងស្មើនឹង៨៥០ម៉ែត្រ លបលូស្បៃមុង៣មាត់ បង្គោល៤០០ដើម និងចាក់លែងកូនត្រីចម្រុះប្រមាណ១០០គីឡូក្រាមចូលទៅលេងវិញ ។ ជាមួយគ្នានេះដែរ ក្នុងនាមមន្ទីរជំនាញ សូមអំពាវនាវដល់បងប្អូនប្រជាពលរដ្ឋ សូមបញ្ឈប់ប្រព្រឹត្តបទល្មើសនេសាទ ក្នុងរដូវហាមឃាត់ ដែលជារដូវត្រីពងកូន ពិសេសរបាំងស្បៃមុង ដែលជាបទល្មើសបំផ្លាញយ៉ាងខ្លាំងដល់មច្ឆាជាតិ ។ សូមបញ្ជាក់ដែរថា នៅថ្ងៃទី១៥ កញ្ញា ឆ្នាំ២០២១ នេះដែរ មន្ត្រីជំនាញបានដឹកនាំកម្លាំងសមត្ថកិច្ចចម្រុះចុះបង្ក្រាបបទល្មើសនេសាទនៅចំណុចស្វាយរំពារ ក្នុងទឹកដីស្រុកកំពង់លែងផងដែរ ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ