សហរដ្ឋអាមេរិក ៖ រងការរិះគន់យ៉ាងខ្លាំងពីសំណាក់បណ្ដាសមាជិកសភានៃគណបក្សសាធារណរដ្ឋថា ជាមហន្តរាយគួរឲ្យឈឺចាប់ ជាការក្បត់ និងជាការចុះចាញ់ដោយគ្មានលក្ខខណ្ឌចំពោះពួកតាលីបង់ រដ្ឋមន្ត្រីការបរទេសអាមេរិក លោកអានតូនីប្លីនកេន កាលពីថ្ងៃទី១៣ ខែកញ្ញា បានការពារការដកចេញទាំងក្រហល់ និងដោយជ្រួលច្របល់នោះចេញពីអាហ្វហ្គានីស្ថាន តាមការសម្រេចរបស់ប្រធានាធិបតី លោកចូបៃដិន នៅមុខសភា។
ជាមួយភាពម៉ឺងម៉ាត់ដែលលោកពុំដែលបង្ហាញរហូតមកទល់ពេលនេះ ប្រមុខការទូតអាមេរិករូបនោះបាន បដិសេធការចោទប្រកាន់នានា រហូតដល់ក្នុងផ្ទៃគណបក្សប្រជាធិបតេយ្យរបស់លោក ដែលថា ការដកទ័ពនោះធ្វើឡើងដោយគ្មានការរៀបចំជាមុន។ លោកបានបកស្រាយដោយទម្លាក់កំហុសលើ អតីតប្រធានាធិបតីលោកដូណាល់ត្រាំថា ក៏ជាអ្នកទទួលខុសត្រូវមួយផ្នែកនៃសភាពការណ៍នេះដែរ។
រដ្ឋមន្ត្រីការទេសអាមេរិកលើកឡើងនៅមុខសភាថា ពេលដែលលោកបៃដិន ចូលកាន់កាប់សេតវិមាននាដើមខែមករា លោកគ្មានជម្រើសណាក្រៅពីបញ្ចប់សង្គ្រាម ឬក៏បង្កើនសង្គ្រាមឡើយ។ ពួកតាលីបង់ កំពុងមានកម្លាំងខ្លាំងបំផុតខាងយោធា ជាងពេលណាទាំងអស់ ចាប់តាំងពីការវាយប្រហារភេរវកម្មថ្ងៃទី១១ ខែកញ្ ឆ្នាំ២០០១ ដែលនាំឲ្យមានអន្តរាគមន៍យោធារបស់ពួកលោកខាងលិចមក ចំណែកកងទ័ពអាមេរិកមានកម្លាំងកាន់តែតិចនៅលើទឹកដីអាហ្វហ្គានីស្ថាន។ នោះក៏មកពីកិច្ចព្រមព្រៀងដែលរដ្ឋការលោកដូណាល់ត្រាំចុះហត្ថលេខា ជាមួយពួកតាលីបង់ដែលជម្រុញឲ្យមានការដកចេញទាំងស្រុង នៃកងកម្លាំងបរទេសចេញពីអាហ្វហ្គានីស្ថាន ហើយនាំទៅដល់ការដោះលែងពួកបះបោរ៥.០០០នាក់។
លោកអានតូនីប្លីនកេន អះអាងទៀតថា សម្រេចចាប់តាំងពីយូរមកហើយ បញ្ចប់សង្គ្រាមដ៏យូរបំផុតនោះនៃប្រវត្តិសាស្ត្រអាមេរិកលោកបៃដិនអះអាងពីការដកកងទ័ពទាំងស្រុង ដូចការផ្ដួចផ្ដើមដោយលោកត្រាំ។ តែបើគ្មានកិច្ចព្រមព្រៀងនោះទេ ក៏លោកបៃដិន មិនចាំបាច់ធ្វើតាមកាលបរិច្ឆេទនោះឬក៏មិនធ្វើរបៀបនោះដែរ។ ទោះបីការដកទ័ពចេញទាំងស្រុងពីអាហ្វហ្គានីស្ថានត្រូវបានការពារ ដោយអ្នកនយោបាយ អាមេរិកភាគច្រើន តែការរិះគន់មានមកពីគ្រប់ផ្នែកទាំងអស់៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ