ខេត្តបន្ទាយមានជ័យ ៖ បុរស២នាក់ដែលប្រព្រឹត្តអំពើបៀតបៀនកេរ្តិ៍ខ្មាសនៅក្នុងមណ្ឌលធ្វើចត្តាឡីស័កវិទ្យាល័យកូប ស្ថិតក្នុងស្រុកអូរជ្រៅ បានត្រូវឃាត់ខ្លួន កាលពីយប់ថ្ងៃទី១២ ខែកញ្ញា ឆ្នាំ២០២១ ។
បើតាមក្រុមការងារដែលធ្វើការនៅក្នុងមណ្ឌលបានឱ្យដឹងថា នៅក្នុងមណ្ឌលធ្វើចត្តាឡីស័កវិទ្យាល័យកូប មានអំពើបៀតបៀនកេរ្តិ៍ខ្មាសចំនួន២ករណីនៅយប់តែមួយ ហើយកម្លាំងចម្រុះដែលកំពុងធ្វើការក្នុងមណ្ឌល បានឃាត់ខ្លួនបុរសទាំង២នាក់ រួចបញ្ជូនទៅអធិការដ្ឋាននគរបាលស្រុកអូរជ្រៅ ដើម្បីចាត់ការបន្ត ។
មន្ត្រីក្រុមការងារឲ្យដឹងទៀតថា ករណីទី១-បានឃាត់ខ្លួនបុរសឈ្មោះ សុខ វង្ស អាយុ៣៦ឆ្នាំ មានស្រុកកំណើតនៅស្រុកកណ្តៀង ខេត្តពោធិ៍សាត់ ជាពលករត្រឡប់មកពីប្រទេសថៃ តាមច្រកអូរបីជាន់ ស្រុកអូរជ្រៅ ហើយត្រូវបានយកមកដាក់នៅមណ្ឌលធ្វើចត្តាឡីស័កវិទ្យាល័យកូប កាលពីថ្ងៃ៣ ខែកញ្ញា ឆ្នាំ២០២១ ដោយតម្រូវឱ្យធ្វើចត្តាឡីស័ករយៈពេល២១ថ្ងៃ ។
បុរសរូបនេះ ត្រូវបានឃាត់ខ្លួននៅយប់ថ្ងៃទី១២ ខែកញ្ញា ឆ្នាំ២០២១ ក្រោយពីបានលបចូលទៅលូករាវស្ទាបស្ត្រីម្នាក់ដែលកំពុងលង់លក់ក្នុងដំណេក ខណៈពេលធ្វើចត្តាឡីស័កជាមួយគ្នា ហើយក៏មានការស្រែកឆោឡោឡើង និងត្រូវបានកម្លាំងចម្រុះឃាត់ខ្លួនភ្លាមៗ ។
មន្ត្រីក្រុមការងារឲ្យដឹងបន្តទៀតថា ចំណែកករណីទី២- បានឃាត់ខ្លួនបុរសឈ្មោះ ណៃ ភី អាយុ២៦ឆ្នាំ មានស្រុកកំណើតនៅស្រុកម៉ាឡៃ ជាពលករត្រឡប់មកពីប្រទេសថៃតាមច្រកអូរបីជាន់ ស្រុកអូរជ្រៅ ហើយត្រូវបានបញ្ជូនមកដាក់នៅមណ្ឌលធ្វើចត្តាឡីស័កវិទ្យាល័យកូប បន្ទប់លេខ១៥ កាលពីថ្ងៃទី២ ខែកញ្ញា ឆ្នាំ២០២១ ។
បុរសរូបនេះ បានលបលួចចូលទៅដេកឱបស្ត្រីម្នាក់ដែលកំពុងលង់លក់ក្នុងដំណេកនៅក្នុងបន្ទប់ធ្វើចត្តាឡីស័កជាមួយគ្នា រហូតធ្វើឱ្យនាងភ្ញាក់ឡើងក៏ស្រែកឆោឡោ និងត្រូវបានកម្លាំងចម្រុះឃាត់ខ្លួនទាំងយប់ ។ ភ្លាមៗនោះដែរ ក៏មានការសម្របសម្រួលគ្នា ដោយយល់ព្រមទទួលសំណងចំនួន៥០ម៉ឺនរៀលបញ្ចប់រឿង ព្រោះតែបុរសដែលធ្វើសកម្មភាពនោះមានសតិមិនសូវគ្រប់ ៕
ចែករំលែកព័តមាននេះ