កីឡាការិនីប្រដាល់ម្នាក់ រងការគំរា.មសម្លា.ប់ពីក្រុមតាលីបង់ ដោយសារមានគ្រូបង្វឹកជាបុរស
អាហ្វហ្គានីស្ថាន ៖ កីឡាការិនីប្រដាល់អាហ្វហ្គានីស្ថាន នាង Seema Rezai ត្រូវបង្ខំចិត្តចាកចេញពីប្រទេសកំណើត ដើម្បីរកកន្លែង
អាហ្វហ្គានីស្ថាន ៖ កីឡាការិនីប្រដាល់អាហ្វហ្គានីស្ថាន នាង Seema Rezai ត្រូវបង្ខំចិត្តចាកចេញពីប្រទេសកំណើត ដើម្បីរកកន្លែងមានសុវត្ថិភាព បន្ទាប់ពីក្រុមតាលីបង់បានចេញសារគំរា.មសម្លា.ប់រូបនាង កាលពីពេលថ្មីៗនេះ។
Rezai ដែលជាសមាជិកនៃក្រុមកីឡាប្រដាល់ស្ត្រីជាតិអាហ្វហ្គានីស្ថាន បានប្រាប់សារព័ត៌មាន Sputnik ថា នាងសម្រេចចិត្តចាកចេញពីប្រទេសកំណើតតែម្នាក់ឯង ដោយគ្មានវត្តមានគ្រួសារឡើយ ព្រោះនាងចង់បន្តហ្វឹកហាត់ប្រដាល់ ដែលជាចំណង់ចំណូលចិត្តរបស់នាង។
កីឡាការិនីរូបនេះ បាននិយាយថា «នៅពេលពួកតាលីបង់ដណ្តើមបានទីក្រុងកាប៊ុល ហើយនៅពាក់កណ្តាលខែសីហា ខ្ញុំកំពុងហ្វឹកហាត់ប្រដាល់ជាមួយគ្រូបង្វឹករបស់ខ្ញុំ។ ប៉ុន្តែក្រោយមកមនុស្សមួយចំនួនបានប្រាប់ពួកតាលីបង់ថា មានក្មេងស្រីម្នាក់កំពុងហ្វឹកហាត់ជាមួយគ្រូបង្វឹកបុរស។ ហើយពួកគេបានបញ្ជូនខ្ញុំទៅផ្ទះ និងព្រមានជាលាយលក្ខណ៍អក្សរដោយសន្យាថា នឹងសម្លា.ប់ខ្ញុំ ប្រសិនបើខ្ញុំមិនយល់ព្រមបញ្ឈប់ការហ្វឹកហាត់ប្រដាល់»។
បើយោតាមប្រភពពី Sputnik បានរាយការណ៍ថា Rezai បានចាកចេញទៅកាន់ប្រទេសកាតា ហើយបច្ចុប្បន្នកំពុងរង់ចាំទិដ្ឋាការបន្តទៅសហរដ្ឋអាមេរិកជាកន្លែងដែលនាងសង្ឃឹមថា នឹងបន្តអាជីពប្រដាល់របស់នាង។
Rezai បានចាប់ផ្តើមអាជីពប្រដាល់តាំងពីអាយុ១៦ឆ្នាំ។ ដោយសារតែគំនិតអវិជ្ជមានរបស់គ្រួសារ ចំពោះចំណង់ចំណូលចិត្តរបស់នាង គ្រូបង្វឹកនាងបានសម្រេចចំណាយលុយផ្ទាល់ខ្លួន ដើម្បីទិញឧបករណ៍សម្រាប់បង្វឹក Rezai។
មិនត្រឹមតែ Rezai ប៉ុណ្ណោះទេ ស្ត្រីជាច្រើននាក់ផ្សេងទៀតនៅក្នុងប្រទេសអាហ្វហ្គានីស្ថាន ដែលចូលរួមសកម្មភាពលើវិស័យកីឡា ក៏ត្រូវបានក្រុមតាលីបង់គំរា.មកំហែងដល់អាយុជីវិតផងដែរ។ ដោយបង្ខំឱ្យមួយចំនួននៃពួកគេសម្រេចចិត្តចាកចេញពីប្រទេសកំណើត៕
ចែករំលែកព័តមាននេះ