ខេត្តបន្ទាយមានជ័យ មាន៤ស្រុក-ក្រុងកំពុងតែរងគ្រោះដោយសារជំនន់ទឹកភ្លៀងដែលធ្លាក់ពីថៃ ដោយមានតំបន់ខ្លះត្រូវជម្លៀសប្រជាពលរដ្ឋទៅរកទីទួលសុវត្ថិភាព
ខេត្តបន្ទាយមានជ័យ ៖ ខេត្តបន្ទាយមានជ័យ មាន៤ស្រុក-ក្រុងកំពុងតែរងគ្រោះដោយសារជំនន់ទឹកភ្លៀងដែលធ្លាក់ពីថៃ ដោយមានតំបន់ខ្លះត្រូវជម្លៀសប្រជាពលរដ្ឋទៅរកទីទួលសុវត្ថិភាព រហូតដល់ថ្ងៃទី១២ ខែកញ្ញា ឆ្នាំ២០២១នេះ។
គួរបញ្ជាក់ថា នៅពេលដែលមានជំនន់ទឹកភ្លៀង និងជំនន់ទឹកដែលធ្លាក់មកពីថៃ បានជន់លិច និងធ្វើឱ្យប៉ះពាល់ដល់ផ្ទះសម្បែងរបស់ប្រជាពលរដ្ឋ ព្រមទាំងផលដំណាំកសិកម្មផងដែរ ហើយក្រោយមកក៏ឃើញមានវត្តមានលោក អ៊ុ រាត្រី អភិបាលខេត្តបន្ទាយមានជ័យ បានត្រៀមកម្លាំងសម្រាប់ជួយអន្តរាគមន៍ និងចុះពិនិត្យមើលស្ថានភាពទឹកយ៉ាងសកម្ម។
បើតាមលោក សុខ ពេញណន អភិបាលរងស្រុកម៉ាឡៃ បានប្រាប់អោយដឹងនៅល្ងាចថ្ងៃទី១២ ខែកញ្ញា ឆ្នាំ២០២១នេះថា នៅស្រុកម៉ាឡៃ ចំណុចតំបន់បឹងជម្រុក ស្ថិតឃុំទួលពង្រ បានរងគ្រោះដោយសារជំនន់ទឹកភ្លៀងដែលធ្លាក់ពីភ្នំយាសំ និងអូរស្រឡៅ រយៈពេល២ថ្ងៃនេះ បណ្តាលឱ្យជន់លិចប៉ះពាល់ដល់ផ្ទះសម្បែងប្រជាពលរដ្ឋចំនួន២២៨គ្រួសារ ហើយត្រូវបានជម្លៀសទៅរកទីទួលសុវត្ថិភាពចំនួន៣គ្រួសារ និងលិចផលដំណាំកសិកម្ម លិចផ្លូវចំនួន៧ខ្សែ ហើយទឹកក៏ហូរកាត់៥កន្លែងដែលមានប្រវែងជាង១០០ម៉ែត្រ តែត្រូវបានអាជ្ញាធរកាយផ្លូវរំដោះទឹកចំនួន២កន្លែងផងដែរ។
ចំណែកលោក កែវ តារ៉ារស្មី អភិបាលរងក្រុងប៉ោយប៉ែត បានបញ្ជាក់ថា នៅក្រុងប៉ោយប៉ែត មានចំនួន២ភូមិដែលរងគ្រោះដោយសារជំនន់ទឹកភ្លៀង និងទឹកធ្លាក់ពីថៃរយៈពេល២ថ្ងៃហើយ បានធ្វើឱ្យជន់លិចផ្ទះសម្បែងប្រជាពលរដ្ឋ២ភូមិ ដែលរស់នៅជាប់ជាយដែន គឺមានភូមិអូរជ្រៅ និងភូមិក្បាលកោះ ស្ថិតសង្កាត់ប៉ោយប៉ែត ហើយត្រូវបានអាជ្ញាធរ កាយរំដោះទ្វារទឹកចំនួន៤កន្លែង និងកាយរំដោះទឹក២កន្លែងទៀត រហូតពេលនេះជំនន់ទឹកភ្លៀងត្រូវបានស្រកវិញ។
រីឯលោក យឹម សំណាង អភិបាលស្រុកអូរជ្រៅ ក៏បានបញ្ជាក់ដែរថា ស្រុកអូរជ្រៅវិញ ក៏រងគ្រោះដោយសារជំនន់ទឹកភ្លៀង និងទឹកធ្លាក់ពីថៃដែរ ដោយបានជន់លិចរយៈពេល២ថ្ងៃហើយ បណ្តាលប៉ះពាល់ដល់ប្រជាពលរដ្ឋចំនួន១០០គ្រួសារដែលរស់នៅតាមបន្ទាត់ព្រំដែន ហើយត្រូវបានជម្លៀសទៅរកទីទួលសុវត្ថិភាព។ ហើយទឹកនៅបន្តជន់លិច ដែលស្ថិតនៅភូមិអូរបីជាន់ ឃុំអូរបីជាន់ ហើយភាគីថៃក៏បានផ្តល់ព័ត៌មាននៅថ្ងៃនេះថា ទឹកខាងថៃឡើងជាងកន្លះហើយ គ្រោងបើកទំលាក់ បើភ្លៀងនៅបន្តធ្លាក់ទៀត។
លោក អែម សុខា អភិបាលស្រុកថ្មពួក ក៏បានបញ្ជាក់ថា នៅស្រុកថ្មពួក ជំនន់ទឹកភ្លៀង និងទឹកធ្លាក់ពីខាងថៃ បានជន់លិចរយៈពេល៣ថ្ងៃហើយ ហើយកំពុងជន់លិចតាមបន្ទាត់ព្រំដែននៅចំណុចអូរកំបត់ និងទំនប់ស្តេច ស្ថិតក្នុងភូមិសាស្ត្រឃុំគោករមៀត ហើយរហូតពេលនេះ ទឹកក៏បានស្រុកខ្លះហើយ ដែលធ្វើឱ្យប៉ះពាល់ដល់ជម្រកកងកម្លាំងដែលកំពុងឈរជើងតាមបន្ទាត់ព្រំដែន។
លោក ឡាយ សុធី អនុប្រធានមន្ទីរធនធានទឹក និងឧតុនិយមខេត្ត បានបញ្ជាក់ដែរថា ស្រុកនៅជាប់ជាយដែនដែលរងគ្រោះដោយសារជំនន់ទឹកភ្លៀង និងទឹកធ្លាក់ពីខាងថៃ គឺមិនទាន់ប៉ះពាល់ដល់ប្រជាពលរដ្ឋធំដុំនៅឡើយទេ បើសិនជាភ្លៀងមិនបន្តធា្លក់គឺអាចស្រកវិញ ព្រោះជំនន់ទឹកភ្លៀង និងទឹកធ្លាក់ពីខេត្តប៉ៃលិន បានហូរធ្លាក់មកក្រោម ដោយដងស្ទឹងរហាត់ទឹកសំណង់ពោធិ៍២ដើម កម្រិតទឹក៣.៧៥ម៉ែត្រ ហើយទឹកឡើងកម្ពស់៣តឹក និងកម្រិតដងស្ទឹងសិរីសោភ័ណ មានកម្ពស់ទឹក៥,៨៧ម៉ែត្រ៕
ចែករំលែកព័តមាននេះ