ខេត្តកំពង់ឆ្នាំង ៖ ខេត្តកំពង់ឆ្នាំង គឺជាស្ថិតក្នុងតំបន់ទំនាបនៃបឹងទន្លេសាប ដែលសេដ្ឋកិច្ចនៃខេត្តមួយនេះគឺពឹងផ្អែកទាំងស្រុងលើការនេសាទ ការបង្កបង្កើនផលស្រូវ បន្លែផ្លែឈើ និងរោងចក្រកាត់ដេរ ។ ជាពិសេសនៅតាមតំបន់ជនបទ
ខេត្តកំពង់ឆ្នាំង ៖ ខេត្តកំពង់ឆ្នាំង គឺជាស្ថិតក្នុងតំបន់ទំនាបនៃបឹងទន្លេសាប ដែលសេដ្ឋកិច្ចនៃខេត្តមួយនេះគឺពឹងផ្អែកទាំងស្រុងលើការនេសាទ ការបង្កបង្កើនផលស្រូវ បន្លែផ្លែឈើ និងរោងចក្រកាត់ដេរ ។ ជាពិសេសនៅតាមតំបន់ជនបទ គេចិញ្ចឹមជីវិតដោយធ្វើកសិកម្មនិងការងាររាយរងច្រើនយ៉ាងទៀត ។ ទោះបីយ៉ាងណា បច្ចុប្បន្នខេត្តមួយនេះមានសក្ដានុពលថ្មីមួយទៀតគឺកំពុងទទួលបានការចាប់អារម្មណ៍ពីភ្ញៀវទេសចរជាតិ និងអន្តជាតិមកជិះកាណូតលេងកម្សាន្ដ និងគយគន់ផ្ទះបណ្តែតទឹកជាច្រើន និងអាចមើលទេសភាពដ៏ស្រស់ត្រកាលនៅរដូវប្រាំង ។ លើសពីនេះទៀត ភ្ញៀវទេសចរក៏អាចទៅមើលកន្លែងចិញ្ចឹមត្រី និងគយគន់ទេសភាពជាមួយនឹងសត្វស្លាបច្រើនប្រភេទ ដែលកំពុងធ្វើសម្បុកនៅលើមែកឈើផងដែរ ។
ទេសភាពបឹងទន្លេសាបក្នុងខេត្តកំពង់ឆ្នាំង គឺជាកន្លែងមួយដែលមានការនិយមចូលចិត្តពីសំណាក់ភ្ញៀវទេសចរ ។ មនុស្សជាច្រើនបានកោតសរសើរថា កំពង់ឆ្នាំងគឺជាខេត្តដែលស្រស់ស្អាតជាងគេនៅក្នុងប្រទេសកម្ពុជា ។ ទេសភាពនៃបឹងទន្លេសាបបានទាក់ទាញភ្ញៀវទេសចរ និងអ្នកដំណើរជាច្រើនឲ្យមកទស្សនាជារៀងរាល់ឆ្នាំ។ អ្នកស្រុកភាគច្រើនប្រកបមុខរបរចិញ្ចឹមជីវិតដោយនេសាទត្រី ដាំស្រូវ និងធ្វើចានឆ្នាំង ដែលជាមុខរបរដ៏សំខាន់សម្រាប់ពួកគេ ។
បឹងទន្លេសាប គឺជាកន្លែងនេសាទត្រីដ៏ល្បីល្បាញនៅក្នុងប្រទេសកម្ពុជា ។ ក្រៅពីទេសភាពដ៏ស្រស់ត្រកាល ភ្ញៀវទេសចរក៏អាចរៀនពីរបៀបរស់នៅរបស់អ្នកនេសាទក្នុងតំបន់នោះផងដែរ ។ នៅក្នុងរដូវប្រាំង គេសង្កេតឃើញថា មានការនេសាទជាច្រើននៅក្នុងតំបន់នោះ ដែលភ្ញៀវទេសចរអាចមើលពីសកម្មភាពអ្នកនេសាទត្រីនៅពេលព្រឹកព្រលឹមដូចជា ការដាក់មងចាប់ត្រី ចំណែកអ្នកខ្លះនេសាទបានរហូតដល់រាប់តោនទៀតផង ។
ជាមួយគ្នានេះដែរ បើតាមម្ចាស់ផែកាណូត ទេសចរណ៍នៅទន្លេផ្សារក្រោម សង្កាត់ផ្សារឆ្នាំង ក្រុងកំពង់ឆ្នាំង អះអាងថា ៖ « សក្តានុពលទេសចរណ៍នឹងកើនឡើងបន្ថែមទៀត ប្រសិនបើមានការរៀបចំត្រឹមត្រូវ និងច្បាស់លាស់ ជាពិសេស ក្រុមអាជីវករដែលមានកាណូតសម្រាប់ជួលដឹកភ្ញៀវទេសចរ ត្រូវចែករំលែកគ្នាតាមលេខរៀង ដោយមិនត្រូវដណ្តើមគ្នា ព្រោះអាចបង្កការរំខានដល់អ្នករត់កាណូតដទៃទៀត សំខាន់គឺភ្ញៀវទេសចរតែម្តង » ៕
ចែករំលែកព័តមាននេះ