ខេត្តបន្ទាយមានជ័យ ៖ ម្តាយរបស់ក្មេងស្រីវ័យ១៤ឆ្នាំមួយរូ បបានដាក់ពាក្យបណ្តឹងជាមួយប៉ូលិសប្រឆាំងការជួញដូរមនុស្សនៅខេត្តបន្ទាយមានជ័យ ប្តឹងចោទប្រកាន់អនុភូមិភ្នំឆ័ត្រ ពីបទរំលោ.ភកូនស្រីរបស់ខ្លួន តែអ្នកស្រីថា បណ្តឹងរបស់អ្នកស្រីហាក់មានសភាពយឺតយ៉ាវ ខណៈពេលនេះរូបអ្នកស្រី ត្រូវខាងអនុភូមិប្តឹងចោទប្រកាន់អ្នកស្រីពីបទ «បរិហារកេរ្តិ៍» ហើយអ្នកស្រីត្រូវបានតុលាការកោះហៅទៅសាកសួរឆាប់ៗនេះ ។
អ្នកស្រី វ៉ា សុខជា ភេទស្រី អាយុ៤៥ឆ្នាំ មានទីលំនៅភូមិតេជោភ្នំឆ័ត្រឃុំ ស្វាយចេក ស្រុកស្វាយចេក ខេត្តបន្ទាយមានជ័យ ត្រូវបានតំណាងអយ្យការអមសាលាដំបូង ខេត្តបន្ទាយមានជ័យ កោះហៅក្នុងនាមជា «ជនសង្ស័យ» ក្នុងសំណុំរឿងព្រហ្មទណ្ឌលេខ៧៧៨ ថ្ងៃទី១០ ខែសីហា ឆ្នាំ២០២១ និងឱ្យចូលទៅឆ្លើយបំភ្លឺនៅអយ្យការអមសាលាដំបូងខេត្ត នាម៉ោង២រសៀល ថ្ងៃទី១៥ ខែកញ្ញា ឆ្នាំ២០២១ ខាងមុខ ពាក់ព័ន្ធនឹងបណ្តឹងបរិហារកេរ្តិ៍ដែលមានអនុភូមិភ្នំឆ័ត្រ ឈ្មោះ សុខ ប៊ុន្នី ជាដើមបណ្តឹង ។ នេះបើយោងតាមដីកាកោះចុះថ្ងៃទី០១ ខែកញ្ញា ឆ្នាំ២០២១ របស់លោកសំរឹទ្ធ សុខុន ព្រះរាជអាជ្ញារង តំណាងអយ្យការអមសាលាដំបូងខេត្តបន្ទាយមានជ័យ ។
យ៉ាងណាមិញ អ្នកស្រី វ៉ា សុខជា ក៏ជាដើមបណ្តឹងប្រឆាំងនឹងលោក សុខ ប៊ុន្នី ដោយកន្លងអ្នកស្រី បានដាក់ពាក្យបណ្តឹង ប្តឹងចោទប្រកាន់ទៅលើលោកអនុភូមិតេជោភ្នំឆ័ត្រថា បានរំលោ.ភកូនស្រីរបស់គាត់អាយុ១៤ឆ្នាំ (ជាមួយអតីតយុទ្ធជនក្នុងមណ្ឌលអភិវឌ្ឍន៍យោធិនពិការ៣១៧ តេជោភ្នំឆ័ត្រ) ។ អ្នកស្រីវ៉ា សុខជា បានដាក់ពាក្យបណ្តឹងទៅលោកស្រីមេឃុំស្វាយចេក កាលពីថ្ងៃទី១៩ ខែកក្កដា រួចទើបបន្តដាក់នៅអធិការដ្ឋាននគរបាលស្រុកស្វាយចេកម្តង កាលពីថ្ងៃទី២៧ ខែកក្កដា ឆ្នាំ២០២១ ហើយអធិការដ្ឋាន នគរបាលស្រុកស្វាយចេក បានបញ្ជូនសំណុំរឿងមកជំនាញការិយាលល័យនគរបាលប្រឆាំងការជួញដូរមនុស្ស និងការពារអនិតិជននៃស្នងការដ្ឋានកាលពីចុងខែសីហា ។
ជុំវិញការចោទប្រកាន់ពីបទរំលោ.ភក្មេងស្រីវ័យ១៤ឆ្នាំនេះផងដែរ លោកសុខ ប៊ុន្នី អនុភូមិតេជោភ្នំឆ័ត្រ ធ្លាប់បានបដិសេធកាលពីថ្ងៃទី៣០ ខែសីហា ថា លោកមិនបានប្រព្រឹត្តដូចការចោទប្រកាន់នោះទេ ហើយករណីចោទប្រកាន់រូបលោកនេះផងដែរ លោកបានពឹងមេធាវី ឈឹម ច័ន្ទសត្យានន្ទ ជាមេធាវីការពារក្តី និងប្តឹង អ្នកស្រី វ៉ា សុខជា ដែលបានដើរបរិហារកេរ្តិ៍លោកថា បានរំលោ.ភកូនស្រីគាត់អាយុ១៤ឆ្មាំ (អ ស ឡ) ។ លោកអនុភូមិ សុខ ប៊ុន្នី បានបន្តថា៖ លោកសូមច្រានចោលទាំងស្រុងការចោទប្រកាន់ដ៏ធ្ងន់ដែលរំលោ.ភ ឬក៏បៀតបៀនកេរ្តិ៍ខ្មាស់ក្មេងស្រីរងគ្រោះ។
ចំណែកអ្នកស្រី វ៉ា សុខជា និងកូនស្រី ធ្លាប់បានប្រាប់សារព័ត៌មានកោះសន្តិភាព កាលពីថ្ងៃទី២៨ ខែសីហា ឆ្នាំ២០២១ថា ខ្លួននាង (ក្មេងរងគ្រោះ) នៅវេលាម៉ោង១១ព្រឹកនាថ្ងៃមួយ អំឡុងខែកុម្ភៈ ឆ្នាំ២០២១ កំពុងដេកមើលទូរទស្សន៍ក្នុងផ្ទះ ត្រូវបានលោកសុខ ប៊ុន្នី ឆាតហៅនាងឲ្យទៅយកលុយចាយ លុះពេលនាងដើរទៅដល់ ក៏ត្រូវលោកសុខ ប៊ុន្នី ចាប់រំលោ.ភបានសម្រេច នៅក្រោយផ្ទះរបស់គាត់។ ក្រោយពីរំលោភរួច បានអោយលុយមកនាងចំនួន៥០.០០០រៀលដើម្បីបំបិទមាត់ ហើយនាងដើរមកផ្ទះវិញទាំងការឈឺចាប់ ។ ករណីនេះ ខាងអ្នកស្រីវ៉ា សុខជា ដែលទន់ខ្សោយ និងក្រីក្រ បានបង្ហើបអោយដឹងថា នឹងរកមេធាវីស្ម័គ្រចិត្តសម្តេចតេជោ ដើម្បីជួយការពារក្តី ព្រោះបណ្តឹងរបស់អ្នកស្រីហាក់មានភាពយឺតយ៉ាវខ្លាំងជាងបណ្តឹងរបស់លោកអនុភូមិ ។
ទាក់ទិននឹងករណីខាងលើនេះផងដែរ លោកស្រីឧត្តមសេនីយ៍ត្រីឌី សុជាតិ ស្នងការរងទទួលផែនការងារប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបន្ទាយមានជ័យ បានប្រាប់កាសែតកោះសន្តិភាពនារសៀលថ្ងៃទី១១ ខែកញ្ញា នេះថា ករណីអ្នកស្រីវ៉ា សុខជា ប្តឹងលោកអនុភូមិតេជោភ្នំឆ័ត្រនោះ មន្ត្រីនគរបាលការិយាល័យប្រឆាំងការជួញដូរមនុស្ស និងការអនិតិជនខេត្ត កំពុងស៊ើបអង្កេត ប្រមូលវត្ថុតាង និងនាំក្មេងស្រីរងគ្រោះទៅធ្វើកោសល្យវិច្ច័យ ដើម្បីដាក់បន្ទុកទៅលើជនដែលប្រព្រឹត្តល្មើស ចំពោះសំណុំរឿងនឹងបញ្ជូនទៅតុលាការនៅសប្តាហ៍ក្រោយនេះហើយ ។
គួររំលឹកផងដែរថា ៖ ស្ត្រីពិការម្នាក់ចោទប្រកាន់អនុភូមិ១រូបថារំលោ.ភកូនស្រី និងដកហូតដីរដ្ឋចែកឱ្យគាត់ ៕
ចែករំលែកព័តមាននេះ