រឿងលុយតុងទីន សឿ សុធារ៉ា ជំពាក់គេ ឥឡូវធ្លាយដល់តារាសម្តែងម្នាក់ទៀត
- ភ្នំពេញ
រហូតមកទល់ពេលនេះ រឿងលុយជំពាក់ថ្លៃតុងទីនរបស់អ្នកនាង សឿ សុធារ៉ា នៅមិនទាន់រលត់កំដៅ និងមានដំណោះនៅឡើយទេ ខណៈពេលរឿងនេះ
រាជធានីភ្នំពេញ ៖ រហូតមកទល់ពេលនេះ រឿងលុយជំពាក់ថ្លៃតុងទីនរបស់អ្នកនាង សឿ សុធារ៉ា នៅមិនទាន់រលត់កំដៅ និងមានដំណោះនៅឡើយទេ ខណៈពេលរឿងនេះបានរីករាលដាលដល់តារាម្នាក់ទៀតផងដែរ។
តារាសម្តែង និងកំប្លែកស្រី ពីន ក៏បានកើតទុក្ខមិនសុខចិត្ត ក្នុងពេលដែលនាងក៏បានពើបប្រទះរឿងដូចគ្នានេះ ដោយសារអ្នកនាង សឿ សុធារ៉ា មិនទាន់ទូទាត់សងនាងអស់នៅឡើយ។ ស្រី ពីន បានអះអាងប្រាប់កោះសន្តិភាពថា រហូតមកទល់នាពេលនេះ អ្នកនាង សឿ សុធារ៉ា នៅមិនទាន់ទូទាត់លុយតុងទីនរបស់នាងដែលនៅសល់ប្រមាណជាង១ពាន់ដុល្លារនៅឡើយទេ។
នាងបញ្ជាក់ថា ក្រោយពេលដែលម្តាយរបស់នាងបានទទួលមរណភាពនោះមក នាងក៏បានទៅទិញតុងទីនជាមួយអ្នកនាង សឿ សុធារ៉ា ដោយរំពឹងថា នៅថ្ងៃខាងមុខ នាងនឹងយកលុយនោះទៅធ្វើជាចេតដីយ៍សម្រាប់ដាក់ធាតុម្តាយរបស់នាង។
នាងថា ក្រោយពេលដែលនាងបង់លុយបានប្រមាណជាកន្លះឆ្នាំ នាងបានសុំដេញ បុន្តែអ្នកនាង សឿ សុធារ៉ា មិនព្រម និងសុំអោយនាងយកតែដើមមកវិញ។ នាងបន្ថែមថា ដោយមិនចង់មានរឿងវែងឆ្ងាយនាងក៏ព្រម ប៉ុន្តែការទូទាត់ថ្លៃដើមមកអោយនាងនោះក៏នៅមិនគ្រប់ ដោយសារអ្នកនាង សឿ សុធារ៉ា សន្យាអោយនាងចំនួន២០០ដុល្លារក្នុងមួយសប្តាហ៍។
យ៉ាងណា បើតាម ស្រីពីន នាងកើតទុក្ខមិនសុខចិត្តចំពោះបញ្ហាខាងលើនេះឡើយ ដោយសារនាងត្រូវខាតបង់ច្រើន ដោយសារលុយការមិនបានស៊ីហើយ លុយដើមមិនបានគ្រប់ទៀត។ ស្រីពីន លើកឡើងបន្ថែមថា រហូតមកទល់នាពេលនេះ នាងនៅតែរង់ចាំការដោះស្រាយពីអ្នកនាង សឿ សុធារ៉ា ជានិច្ច បើទោះបីជានាងមិនទាន់អាចទាក់ទង និងឆ្លើយតបណាមួយពីតារារូបនេះនៅឡើយក្តី។
ពាក់ព័ន្ធបញ្ហាខាងលើនេះ កោះសន្តិភាពនៅមិនទាន់អាចទាក់ទងសុំការស្រាយបំភ្លឺពីអ្នកនាង សឿ សុធារ៉ា បាននៅឡើយទេ គិតត្រឹមថ្ងៃនេះ។ ប៉ុន្តែបើតាមការទម្លាយសារសម្លេងពីហ្វេសប៊ុកនារីម្នាក់ឈ្មោះ AZa Be Strong ដែលជួបរឿងដូចគ្នានោះ អ្នកនាង សឿ សុធារ៉ា បានព្រមានប្តឹងទៅកាន់នារីរូបនេះដែលចោទថា នាងបានបរិហារកេរ្តិ៍ និងចោទនាងមានខ្សែអ្នកធំនៅពីក្រោយខ្នងចំពោះរឿងនេះ។
គួររំលឹកថា ៖ នារីម្នាក់ទម្លាយរឿង សឿ សុធារ៉ា ជំពាក់លុយតុងទីនមិនព្រមសង ៕
ចែករំលែកព័តមាននេះ