ខេត្តស្ទឹងត្រែង ៖ តុលាការនាល្ងាចថ្ងៃទី១០ ខែកញ្ញា ឆ្នាំ២០២១ បានសម្រេចចេញដីកាឃុំខ្លួនបណ្តោះអាសន្នជនសង្ស័យដែលជាអ្នកកាន់ប័ណ្ណសារព័ត៌មានចំនួន៩នាក់ទៅកាន់ពន្ធនាគារ ក្រោយការសាកសួរអស់រយៈពេល៣ថ្ងៃកន្លងមក ពាក់ព័ន្ធនឹងករណីឃាត់រថយន្តដឹកឈើគ្រឿងផ្ទះចាស់ និងទារលុយពីម្ចាស់រថយន្តចំនួន៤០០០ដុល្លារ។
ជនសង្ស័យទាំង៩នាក់ខាងលើនេះ ត្រូវបានកម្លាំងកងរាជអាវុធហត្ថខេត្តស្ទឹងត្រែង រួមសហការជាមួយនិងកម្លាំងកងរាជអាវុធហត្ថស្រុកឆែប ខេត្តព្រះវិហា ឃាត់ខ្លួនបាននៅទីកន្លែងខុសគ្នាក្នុងថ្ងៃតែមួយ គឺនៅថ្ងៃទី៧ ខែកញ្ញា ឆ្នាំ២០២១ ដោយ២នាក់ត្រូវឃាត់ខ្លួននៅស្រុកថាឡាបរិវ៉ាត់ ខេត្តស្ទឹងត្រែង និង៧នាក់ទៀត ត្រូវឃាត់ខ្លួននៅស្រុកឆែប ខេត្តព្រះវិហារ ខណៈពេលបើករថយន្តគេចចេញពីខេត្តស្ទឹងត្រែង។
សមត្ថកិច្ចចុះប្រតិបត្តិការផ្ទាល់បានឱ្យដឹងថា ជនសង្ស័យទាំង៩នាក់ខាងលើ ត្រូវកម្លាំងកងរាជអាវុធហត្ថធ្វើការឃាត់ខ្លួនជាបន្តបន្ទាប់ ក្រោយពេលរាយការណ៍ទៅកម្លាំងកងរាជអាវុធហត្ថ ហើយបែរនាំគ្នារត់គេចខ្លួន ក្រោយពួកគេរាយការណ៍ចោទរថយន្តធុនធំដឹកឈើគ្រឿងផ្ទះចាស់បង្កប់ឈើអត់ច្បាប់ ហើយបណ្តាក់គ្នាជាក្រុមទៅទារលុយពីរថយន្តដឹកឈើនោះចំនួន៤០០០ដុល្លារ។ ក្រោយការឃាត់ខ្លួន ក្រុមជនសង្ស័យដែលកាន់ប័ណ្ណសារព័ត៌មាននោះ ត្រូវបញ្ជូនទៅបញ្ជាការដ្ឋានកងរាជអាវុធហត្ថខេត្ត ក្រោមការសម្របសម្រួលពីព្រះរាជអាជ្ញាអមសាលាដំបូង កងរាជអាវុធហត្ថ ក៏បានកសាងសំណុំរឿងបញ្ជូនទៅសាលាដំបូង ដើម្បីបន្តការសាកសួរ ។
ក្នុងរយៈពេល៣ថ្ងៃ គឺចាប់ពីថ្ងៃទី៨ ទី៩ និងរហូតទល់ល្ងាចថ្ងៃទី១០ ខែកញ្ញា តុលាការបានសម្រេចចោទប្រកាន់ជនសង្ស័យខាងលើ ចំនួន២បទល្មើស ទី១- ចោទប្រកាន់ពីបទកំហែងយក តាមមាត្រា ៣៦៣ -៣៦៤ និងទី២- ចោទប្រកាន់ពីបទជ្រៀតជ្រែកក្នុងមុខងារសាធារណៈ និងដំណែងផ្លូវការ មាត្រា ៦០៩ នៃច្បាប់ក្រមព្រហ្មទណ្ឌ។ ហើយតុលាការក៏បានចេញដីកាឃុំខ្លួនជាបណ្តោះអាសន្ន និងបន្តស៊ើបអង្កេតលើករណីខាងលើបន្ថែមទៀត។ បច្ចុប្បន្នជនសង្ស័យទាំង៩នាក់ខាងលើនេះ កំពុងស្ថិតក្រោមការឃុំខ្លួនក្នុងពន្ធនាគារកាំងមេម៉ាយ ក្នុងសង្កាត់ព្រះបាទ ក្រុងស្ទឹងត្រែង ខេត្តស្ទឹងត្រែង៕
ចែករំលែកព័តមាននេះ