ខេត្តបន្ទាយមានជ័យ៖ កាលពីរសៀលថ្ងៃទី៩ ខែកញ្ញា ឆ្នាំ២០២១ នៅមន្ទីរសុខាភិបាលខេត្តបន្ទាយមានជ័យ មានធ្វើពិធីផ្ទេរភារកិច្ច តែងតាំងប្រធាន អនុប្រធានមន្ទីរពេទ្យខេត្ត មិត្តភាពកម្ពុជា-ជប៉ុនមង្គលបូរី។ ពិធីផ្ទេរតំណែងនេះ ធ្វើឡើងក្នុងពិធីផ្ទៃក្នុងមួយ ដែលគ្មានភ្ញៀវពីក្រៅ និងក៏មិនមានអ្នកសារព័ត៌មានចូលយកព័ត៌មានដែរ។
ពិធីនោះ ប្រព្រឹត្តទៅ ក្រោមអធិបតីភាពលោក លី សុវណ្ណារឹទ្ធិ អភិបាលរងខេត្ត តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងចូលរួមដោយលោកវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលខេត្ត។
យោងដីកា ស្តីពី ការផ្ទេរភារកិច្ច និងតែងតាំងមន្ត្រីរាជការរបស់រដ្ឋបាលខេត្តបន្ទាយមានជ័យ ចុះថ្ងៃទី៧ ខែកញ្ញា ឆ្នាំ២០២១ ចុះហត្ថលេខាដោយឯកឧត្តម អ៊ុំ រាត្រី ដែលអានដោយលោក វ៉ន វណ្ណា នាយកទីចាត់ការធនធានមនុស្ស សាលាខេត្ត បានសម្រេចតែងតាំងលោក ទុ បារាំង ក្របខណ្ឌមន្ត្រីសុខាភិបាលជាន់ខ្ពស់ ពីអនុប្រធាន ឡើងជាប្រធានមន្ទីរពេទ្យខេត្ត មិត្តភាពកម្ពុជា-ជប៉ុន មង្គលបូរី។
លោក គៀត ម៉េងហៀង ក្របខណ្ឌមន្ត្រីសុខាភិបាលជាន់ខ្ពស់ ក៏ត្រូវបានតែងតាំង ជាអនុប្រធានមន្ទីរពេទ្យខេត្ត មិត្តភាពកម្ពុជា-ជប៉ុន មង្គលបូរី ផងដែរ។
ចំណែកលោកវេជ្ជបណ្ឌិត ច័ន្ទ វិឌ្ឍីណាវុឌ្ឍ អតីតប្រធានមន្ទីរពេទ្យ មិត្តភាពកម្ពុជា-ជប៉ុន មង្គលបូរី ដែលត្រូវដកហូតមុខតំណែង គឺត្រូវឲ្យទៅបម្រើការងារ ជាមន្ត្រីធម្មតា នៅមន្ទីរសុខាភិបាលខេត្ត។
លោក ទុ បារាំង បានធ្វើសេចក្តីប្តេជ្ញាចិត្តថា នឹងខិតខំបំពេញការងារទ្វេឡើង អោយបានលទ្ធផល មានប្រសិទ្ធិភាព និងប្រកបដោយការទទួលខុសត្រូវ។
លោក លី សុវណ្ណរឹទ្ធិ អភិបាលរងខេត្ត បានទទួលស្គាល់ស្នាដៃប្រធានចាស់ និងសង្ឃឹមថា លោកប្រធាន អនុប្រធានថ្មី នឹងសម្រេចបានស្នាដៃថ្មី និងកើនឡើងបន្ថែមទៀត។
ជាមួយគ្នានោះដែរ លោក អភិបាលរងខេត្ត បានផ្តាំផ្ញើអោយមន្ត្រីថ្នាក់ដឹកនាំ និងបុគ្គលិកមន្ទីរពេទ្យខេត្តនេះ អនុវត្តតាមតួនាទីភារកិច្ច ការណែនាំ អនុសាសន៍ថ្នាក់លើ ហើយផ្តល់សេវាសុខាភិបាលឲ្យបានល្អ ដើម្បីសុខុមាលភាពប្រជាពលរដ្ឋ ព្រោះយើងជាគ្រូពេទ្យជាមាតា បិតា របស់អ្នកជំងឺ បំរើអ្នកជំងឺដោយយកចិត្តទុកដាក់ខ្ពស់ ដើម្បីសង្គ្រោះជីវិតមនុស្ស។
សូមរំលឹកថា រឿងហេតុ ដែលឈានដល់ដកហូតតំណែងលោកវេជ្ជបណ្ឌិត ច័ន្ទ វិឌ្ឍីណាវុឌ្ឍ ពីប្រធានមន្ទីរពេទ្យខេត្តមិត្តភាពកម្ពុជា ជប៉ុន មង្គលបូរី បានកើតឡើង ក្រោយឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានទៅបរិច្ចាគឈាម ដើម្បីជួយផ្តល់ឈាម ជូនលោកវរៈសេនីយ៍ទោម្នាក់ ជាអង្គរក្សសម្តេចតេជោ ដែលរលាកខ្នែងពោះវៀន កម្រិតធ្ងន់ ហើយត្រូវវះកាត់។ ប៉ុន្តែលោកអភិបាលខេត្ត បានសរសេរបង្ហោះតាមហ្វេសប៊ុកថា លោកប្រធានមន្ទីរពេទ្យ ច័ន្ទ វិឌ្ឍីណាវុឌ្ឍ ថាក្នុងឃ្លាំងឈាមនៃមន្ទីរពេទ្យ គ្មានឈាម ហើយតម្រូវឲ្យមានអ្នកផ្តល់ឈាម និងត្រូវបង់ថ្លៃព្យាបាលមុន។ ករណីនេះ លោកអភិបាល ក៏បានទទួលបណ្តឹងពីប្រជាពលរដ្ឋច្រើនលើកច្រើនសារួចមកហើយ៕ ណុប រក្សា
ចែករំលែកព័តមាននេះ