ខេត្តឧត្តរមានជ័យ៖ ទឹកភ្លៀង បានធ្លាក់ជាបន្តបន្ទាប់ ធ្វើឱ្យទំនប់បង្ហៀរ ទំនប់ថ្មីរាំង ស្ទះចរាចរណ៍ឆ្លងកាត់ពីភូមិមួយ ទៅភូមិមួយទៀត និងលំនៅឋានពលរដ្ឋមួយចំនួន ក៏ត្រូវបានទឹកជន់លិច កាលពីវេលាម៉ោង ១៩យប់ ថ្ងៃទី៩ ខែកញ្ញា ឆ្នាំ២០២១។ ហេតុការណ៍នេះ កើតឡើង នៅក្នុងភូមិគោកសំព័រ ឃុំលំទង ស្រុកអន្លង់វែង ខេត្តឧត្តរមានជ័យ។
ពលរដ្ឋអ្នកភូមិ បានឱ្យដឹងថា នៅក្នុងមួយអាទិត្យនេះ ទឹកភ្លៀងបានធ្លាក់ជាបន្តបន្ទាប់ ធ្វើឱ្យទឹកជន់លិចទំនប់បង្ហៀរ ដោយមិនអាចធ្វើដំណើរឆ្លងកាត់បាននោះទេ។ ពលរដ្ឋតែងតែបារម្ភអំពីការគ្រោះថ្នាក់លង់ទឹក។ កន្លងមក ជារៀងរាល់ឆ្នាំ ច្រើនតែកើតមានគ្រោះថ្នាក់ បាត់បង់ជីវិត ដោយសារតែទំនប់ទឹកនេះ។
ទាក់ទិនទៅនឹងព័ត៌មាននេះ កងរាជអាវុធហត្ថស្រុកអន្លង់វែង ឱ្យដឹងថា ទំនប់ទឹកបង្ហៀរ ដែលមានប្រវែង ៣០០ម៉ែត្រ ត្រូវបានទឹកភ្លៀងជន់លិច ឡើងកម្ពស់ ០,៥០ម៉ែត្រ បង្កឱ្យរាំងស្ទះ ក្នុងការធ្វើដំណើរពលរដ្ឋពីភូមិមួយទៅភូមិផ្សេងៗទៀត។ ដោយឡែក លំនៅឋានរបស់ពលរដ្ឋមួយចំនួន ដែលសាងសង់នៅក្បែរអូរនោះ ត្រូវបានទឹកជន់លិចផងដែរ៕ ឱម សារឿន
ចែករំលែកព័តមាននេះ