អ្នកភូមិជាង១០នាក់ បានដេញចាប់យុវជន២នាក់ដែលបានជិះម៉ូតូហុងដាឌ្រីមសេ១២៥ ចុះពីផ្លូវជាតិលេខ៣១ ហើយចូលតាមផ្លូវកាយដីឥដ្ឋទៅកើត រួចយកចំពាមកៅស៊ូបា.ញ់មាន់
ខេត្តកំពត ៖ អ្នកភូមិដើមចំរៀក ឃុំស្ដេចគង់ខាងលិច ស្រុកបន្ទាយមាស ជាង១០នាក់ កាលពីព្រឹកថ្ងៃទី៩ ខែកញ្ញា ឆាំ្ន២០២១ បានដេញចាប់យុវជន២នាក់ដែលបានជិះម៉ូតូហុងដាឌ្រីមសេ១២៥ ស៊េរីឆ្នាំ២០១៥ តែឡើងតែមប្រិ៍ឆ្នាំ២០១៩ ចុះពីផ្លូវជាតិលេខ៣១ ហើយចូលតាមផ្លូវកាយដីឥដ្ឋទៅកើត រួចយកចំពាមកៅស៊ូបាញ់មាន់អ្នកភូមិ ។
ពួកគេទាំង២នាក់បានប្រើចំពាមកៅសូដើរបាញ់មាន់ឆៅៗ ដូចបាញ់មាន់ក្នុងព្រៃ ប៉ុន្តែការបាញ់នោះមិនបានសម្រេចទេ ដោយសារអ្នកភូមិឃើញទាន់ រួចក៏លើកគ្នាដេញចាប់ ធ្វើឱ្យយុវជនទាំង២នាក់នេះភ័យរត់ចោលម៉ូតូ រួចចូលលាក់ខ្លួននៅក្នុងស្រែតែម្តង។
ក្នុងហេតុការណ៍ខាងលើនេះ ក្រុមគ្រួសារសាច់ញាតិម្ចាស់មាន់ បានរត់ដេញពួកគេទាំង២នាក់កាត់ស្រូវ រហូតចាប់បានប្រគល់ឱ្យនគរបាលប៉ុស្តិ៍ស្ដេចគង់ខាងលិច ។ ហើយយុវជនទាំង២នាក់នេះ ត្រូវបានគេដឹងថា ម្នាក់ឈ្មោះ ខេង បូរិន អាយុ២៣ឆ្នាំ និងម្នាក់ទៀតឈ្មោះ បូ ឡៃ អាយុប្រហាក់ប្រហែលគ្នា រស់នៅភូមិស្វាយផ្អែម ឃុំបឹងសាលាខាងត្បូង ស្រុកកំពង់ត្រាច ។
បន្ទាប់ពីឃាត់ខ្លួនបាន នគរបាលស្រុកបន្ទាយមាស ក៏បានធ្វើកំណត់ហេតុ ដែលនេះគ្រាន់តែជាករណីធ្វើសកម្មភាពតែមិនបានសម្រេច ។ ជាមួយគ្នានេះ ដោយមានការឯកភាពពីម្ចាស់មាន់ជាដើមបណ្ដឹងដែលមានការយោគយល់ ក៏សម្រេចធ្វើការអប់រំ និងធ្វើកិច្ចសន្យា ក្នុងនោះក៏មានឪពុកម្ដាយពួកគេមកធានាខុសត្រូវចំពោះមុខច្បាប់ផងដែរ និងព្រមានថា ថ្ងៃមុខថ្ងៃក្រោយបើមានករណីបែបនេះទៀត ពួកគេនឹងទទួលទោសទណ្ឌទៅតាមផ្លូវច្បាប់មិនខាន ៕
ចែករំលែកព័តមាននេះ