បន្ទាយមានជ័យ៖ ជំនន់ទឹកភ្លៀងធ្លាក់ពីថៃ បានជន់លិចប៉ះពាល់ដល់កងកម្លាំង ដែលឈរជើង តាមបន្ទាត់ព្រំដែន ចំនួន ៦គោលដៅ នៅថ្ងៃទី៩ ខែកញ្ញានេះ ក្នុងភូមិសាស្ត្រថ្មពួក។
លោកវរៈសេនីយ៍ឯក ឡុង សំណាង មេបញ្ជាការវរៈសេនាតូចនគរបាលការពារព្រំដែនគោក លេខ៨០៧ បានប្រាប់នៅរសៀលថ្ងៃទី៩ ខែកញ្ញា ឆ្នាំ២០២១ថា ជំនន់ទឹកភ្លៀងធ្លាក់ពីប្រទេសថៃ និងជំនន់ទឹកភ្លៀង ធ្លាក់តាមបន្ទាត់ព្រំដែន បានជន់លិចប៉ះពាល់ដល់កម្លាំងនគរបាលការពារព្រំដែនគោកលេខ៨០៧ ដែលកំពុងឈរជើងតាមបន្ទាត់ព្រំដែនការពារបូរណភាពទឹកដី និងទប់ស្កាត់ពលករចំណាក់ស្រុកដែលគេចវេសធ្វើចត្តាឡីស័ក។
លោកបានបញ្ជាក់ថា ក្រោយជំនន់ទឹកភ្លៀងជន់លិច លោកបានចុះពិនិត្យស្ថានភាពកងកម្លាំង ដែលកំពុងទទួលភារកិច្ចតាមបន្ទាត់ព្រំដែន ក្នុងភូមិសាស្ត្រស្រុកថ្មពួក។ ជំនន់ទឹកភ្លៀង បានជន់លិចប៉ះពាល់កងកម្លាំង ដែលឈរជើង តាមបន្ទាត់ព្រំដែន ចំនួន ៦គោលដៅ មាន ៤គោលដៅ នៅប៉ុស្តិ៍អូរកំបត់ និង២គោលដៅ នៅចំណុចប៉ុស្តិ៍គោកខ្វាវ ដែលទឹក កំពុងជន់លិច។ ប៉ុស្តិ៍យាម មានកន្លែងខ្លះ កម្ពស់ទឹកជាងកន្លះម៉ែត្រ។
លោកវរៈសេនីយ៍ឯក ឡុង សំណាង បានបញ្ជាក់ថា ក្នុងភូមិសាស្ត្រស្រុកថ្មពួក ដែលជាប់ព្រំដែនកម្ពុជាថៃ ត្រូវជំនន់ទឹកភ្លៀង ជន់លិចប៉ះពាល់ជិត ១០គីឡូម៉ែត្រ និងលិចតាមបន្ទាត់ព្រំដែន ក្នុងទឹកដីកម្ពុជា មានកន្លែងខ្លះ ៧០០ម៉ែត្រ ទៅជិត ១.០០០ម៉ែត្រ។ រហូតពេលរសៀលថ្ងៃទី៩ ខែកញ្ញានេះ កងកម្លាំង មិនទាន់បានអោយដកចេញពីមូលដ្ឋាន ដែលលិចទឹកនៅឡើយទេ គឺអោយឈរជើង តាមទីទួលសុវត្ថិភាព។ បើទឹកនៅបន្តជន់ និងភ្លៀងនៅបន្តធ្លាក់ អាចរកវិធីដោះស្រាយ។ តែនៅបន្តការពារទប់ស្កាត់ តាមបន្ទាត់ព្រំដែន ដែលមិនអាចដកបានឡើយ៕ ប៊ុន ធឿន
ចែករំលែកព័តមាននេះ