ខេត្តមណ្ឌលគិរី ៖ អ្នកជំងឺកូវីដ១៩ម្នាក់ ដែលកំពុងសម្រាកព្យាបាលនៅស្រុកកោះញែក បានរត់ចេញពីមណ្ឌលព្យាបាល នាព្រឹកថ្ងៃទី០៩ ខែកញ្ញា ឆ្នាំ២០២១នេះ លុះរហូតដល់ម៉ោង៣រសៀលថ្ងៃដដែលសមត្ថកិច្ច និងក្រុមគ្រូពេទ្យនៅមិនទាន់រកឃើញអ្នកជំងឺម្នាក់នេះនៅឡើយទេ ដែលជាហេតុកំពុងតែបង្កឱ្យមានក្តីបារម្ភជាខ្លាំង។
លោក ស្តើង ផល្លា អភិបាលរងស្រុកកោះញែក បានឲ្យដឹងនៅវេលាម៉ោង៣រសៀល ថ្ងៃទី០៩ ខែកញ្ញានេះថា បន្ទាប់ពីទទួលបានព័ត៌មានករណីអ្នកជំងឺកូវីដលួចរត់ចេញពីកន្លែងព្យាបាល អាជ្ញាធរនិងសមត្ថកិច្ចមូលដ្ឋាន ក៏បានព្យាយាមតាមរកគាត់ដើម្បីពន្យល់អប់រំឲ្យវិលត្រឡប់ទៅទទួលការព្យាបាលវិញ។ប៉ុន្តែការតាមរកអ្នកជំងឺខាងលើនេះ នៅមិនទាន់មានតម្រុយឡើយ គិតត្រឹមល្ងាចថ្ងៃទី០៩ ខែកញ្ញានេះ ខណៈពេលដែលអាជ្ញាធរបានស្វែងរកដល់ផ្ទះ និងចំការស្រែរបស់គាត់ក៏នៅតែរកមិនឃើញដដែល។
គួរបញ្ជាក់ថា អ្នកជំងឺដែលគេចវេសពីមណ្ឌលព្យាបាលខាងលើនេះ មានឈ្មោះ ឆាម ថា ភេទប្រុស អាយុ២៨ឆ្នាំ រស់នៅភូមិឈូល ឃុំស្រែហ៊ុយ ស្រុកកោះញែក បានចូលសម្រាកព្យាបាលជំងឺកូវីដ១៩នៅទីរួមស្រុកកោះញែក កាលពីថ្ងៃទី១៦ ខែសីហា ឆ្នាំ២០២១ ៕
ចែករំលែកព័តមាននេះ