IOC សម្រេចផ្អាកសកម្មភាពអូឡាំពិកកូរ៉េខាងជើងដល់បំណាច់ឆ្នាំ២០២២
ស្វីស ៖ គណៈកម្មាធិការអូឡាំពិកអន្តរជាតិហៅកាត់ថា IOC បានសម្រេចផ្អាកសកម្មភាពគណៈកម្មាធិការអូឡាំពិកកូរ៉េខាងជើង
ស្វីស ៖ គណៈកម្មាធិការអូឡាំពិកអន្តរជាតិហៅកាត់ថា IOC បានសម្រេចផ្អាកសកម្មភាពគណៈកម្មាធិការអូឡាំពិកកូរ៉េខាងជើងរហូតដល់ដំណាច់ឆ្នាំ២០២២ ដែលមានន័យថា រដ្ឋផ្តាច់ការមួយនេះ នឹងខកខានការប្រកួតព្រឹត្តិការណ៍កីឡារដូវរងានៅទីក្រុងប៉េកាំង។
ការសម្រេចផ្អាកសកម្មភាពកូរ៉េខាងជើងធ្វើឡើង ក្រោយប្រទេសមួយនេះ បដិសេធបញ្ជូនគណៈប្រតិភូទៅចូលរួមការប្រកួតព្រឹត្តិការណ៍កីឡារដូវក្តៅនៅទីក្រុងតូក្យូឆ្នាំ ២០២០ ដែលទើបតែបញ្ចប់កាលពេលថ្មីៗ។ ដោយពួកគេអះអាងថា ខ្លួនចង់ការពារអត្តពលិកពីការឆ្លងជំងឺកូវីដ១៩។
លោក Thomas Bach ប្រធាន IOC បានថ្លែងបញ្ជាក់នៅក្នុងសន្និសីទសារព័ត៌មានមួយថា គណៈកម្មាធិការអូឡាំពិកកូរ៉េខាងជើងត្រូវបានផ្អាករហូតដល់ដំណាច់ឆ្នាំ ២០២២ ដោយសារការសម្រេចចិត្តឯកតោភាគីមិនចូលរួមព្រឹត្តិការណ៍នៅទីក្រុងតូក្យូ។ ការសម្រេចចិត្តនេះមានន័យថា គណៈកម្មាធិការអូឡាំពិកកូរ៉េខាងជើង នឹងមិនទទួលបានការគាំទ្រផ្នែកហិរញ្ញវត្ថុពី IOC អំឡុងពេលការផ្អាកសកម្មភាពរបស់ពួកគេឡើយ។
ទោះយ៉ាងណា លោក Thomas Bach បាននិយាយថា IOC បានរក្សាសិទ្ធិក្នុងការសម្រេចចិត្តលើអត្តពលិកកូរ៉េខាងជើងណាដែលមានលក្ខណៈគ្រប់គ្រាន់ សម្រាប់ការប្រកួតប្រជែងនៅទីក្រុងប៉េកាំងឆ្នាំ ២០២២។ ហើយក៏និងពិចារណាឡើងវិញ អំពីរយៈពេលនៃការផ្អាកសកម្មភាពរបស់ប្រទេសមួយនេះផងដែរ។
កូរ៉េខាងជើង គឺជាប្រទេសតែមួយគត់ ដែលមិនបញ្ជូនអត្តពលិកខ្លួនទៅចូលរួមព្រឹត្តិការណ៍នៅទីក្រុងតូក្យូ បើទោះបីជា IOC បានព្រមានអំពីផលវិបាកនៃការមិនចូលរួមយ៉ាងណាក៏ដោយ។ IOC បានបញ្ជាក់ថា ខ្លួនបានជួបពិភាក្សាក្នុងការផ្តល់ដំណោះស្រាយជាច្រើន រួមទាំងការចាកវ៉ាក់សាំងដល់អត្តពលិក និងប្រជាជនកូរ៉េខាងជើងផងដែរ ប៉ុន្តែវិធានការទាំងនេះ ត្រូវបានគណៈកម្មាធិការអូឡាំពិកកូរ៉េខាងជើងច្រានចោល៕ (ដកស្រង់ចេញពី Reuters)
ចែករំលែកព័តមាននេះ