លីគកំពូលកម្ពុជាជុំទី២ នឹងប្រើរូបមន្ដថ្មី
- ភ្នំពេញ
រាជធានីភ្នំពេញ ៖ គណៈកម្មការប្រកួតបាល់ទាត់ជាតិកម្ពុជា (CNCC) បានប្រកាសប្រើរូបមន្ដថ្មីសម្រាប់ការប្រកួតជុំទី២ នៃលីគ
រាជធានីភ្នំពេញ ៖ គណៈកម្មការប្រកួតបាល់ទាត់ជាតិកម្ពុជា (CNCC) បានប្រកាសប្រើរូបមន្ដថ្មីសម្រាប់ការប្រកួតជុំទី២ នៃលីគកំពូលកម្ពុជា ឆ្នាំ២០២១ ដោយនឹងប្រើរូបមន្ដប្រកួត Top 8 (៨ក្រុមកំពូលតារាង) និង 5 Bottom (៥ក្រុមបាតតារាង) បន្ទាប់ពីបញ្ចប់ការប្រកួតសន្សំពិន្ទុជុំទី១ នាពេលឆាប់ៗខាងមុខ។
ការបញ្ជាក់ខាងលើ បានធ្វើឡើងក្នុងពិធីចាប់ឆ្នោតត្រៀមប្រកួតជុំទី២ នៅរសៀលថ្ងៃទី៧ ខែកញ្ញា កន្លងមកនេះ។ ចំពោះការប្រកួតជុំទី១ គ្រោងបញ្ចប់នៅថ្ងៃទី១៥-កញ្ញា ហើយក្រោយបញ្ចប់ជុំទី១ ក្រុមមានពិន្ទុខ្ពស់ជាងគេ ៨ក្រុមកំពូលតារាង នឹងទទួលបានកៅអីវិលជុំរកម្ចាស់ពាន នៅជុំទី២ ខណៈ៥ក្រុមបាតតារាង នឹងត្រូវប្រកួតជម្រុះរកក្រុមធ្លាក់ទៅលេងលីគទី២ នាឆ្នាំក្រោយ។ ការប្រកួតជុំទី២ គ្រោងចាប់ផ្ដើមនាថ្ងៃទី១៨ ខែកញ្ញាខាងមុខ។
សម្រាប់ការប្រកួតជុំទី២ ដែលនឹងគ្រោងដំណើរការប្រកួតនាថ្ងៃទី១៨ ខែកញ្ញាខាងមុខ ដោយក្រុមឈរលេខរៀងទី១ ដល់លេខរៀងទី៨ ក៏ដូចជាក្រុមឈរលេខរៀងទី៩ ដល់លេខរៀងទី១៣ នឹងត្រូវប្រកួតតាមរូបមន្ដដែលបានកំណត់តែ ១ជុំប៉ុណ្ណោះ ដើម្បីកាត់សេចក្ដីរកក្រុមជ័យលាភី ក៏ដូចជាក្រុមដែលត្រូវកាត់ចេញពីក្របខណ្ឌលីគកំពូលកម្ពុជា ឆ្នាំ២០២២។ នេះបើតាមការបញ្ជាក់របស់មន្ដ្រី CNCC។
ចំពោះកម្មវិធីចាប់ឆ្នោតខាងលើ គឺជាការចាប់ឆ្នោតចំណាត់ថ្នាក់ និងទីតាំងលេខរៀង ដើម្បីសម្គាល់ និងបែងចែកទៅតាមកម្មវិធីប្រកួតជុំទី២ សម្រាប់ក្រុមឈរលេខរៀងទី១ ដល់លេខរៀងទី៨ និងក្រុមឈរលេខរៀងទី៩ ដល់លេខរៀងទី១៣ ដើម្បីងាយស្រួលដល់ក្រុមនីមួយៗ ក្នុងការត្រៀមខ្លួនការប្រកួតបន្ដបន្ទាប់របស់ខ្លួន នៅជុំទី២ ពិសេសក្នុងករណីក្រុមត្រូវធ្វើដំណើរទៅប្រកួតតាមខេត្តតែម្ដង។
បច្ចុប្បន្ន លីគកំពូលកម្ពុជា ទើបដំណើរការប្រកួតបាន១២សប្ដាហ៍ ខណៈសល់ការប្រកួតមួយសប្ដាហ៍ទៀត ទើបបញ្ចប់ការប្រកួតសន្សំពិន្ទុជុំទី១។ ចំពោះលទ្ធផលបណ្ដោះអាសន្ន ក្រុមវិសាខា កំពុងឈរកំពូលតារាងមាន២៥ពិន្ទុ តាមពីក្រោយដោយក្រុមការពារតំណែងជើងឯកបឹងកេត មាន២៤ពិន្ទុ ខណៈក្រុមភ្នំពេញក្រោន និងព្រះខ័នរាជស្វាយរៀង ឈរលេខ៣ និងលេខ៤ មាន២២ពិន្ទុស្មើគ្នា ៕
ចែករំលែកព័តមាននេះ