វេបសាយ «ឌឹអេកប្រេសទ្រីប៊ូន» បានផ្សាយយោងតាមប្រភពព័ត៌មាន «សាអូឌីត ប្រេសអេជេនស៊ី » (SPA) របស់អារ៉ាប៊ីសាអ៊ូឌីតថា កាលបីពេល ថ្មីៗកន្លងមកបុរសអារ៉ាប៊ីសាអ៊ូឌីតម្នាក់ត្រូវចាប់ខ្លួន ខណៈពេលព្យាយាមយកស្រា១៤ដបចូលប្រទេស ក្នុងពេលធ្វើដំណើរពីប្រទេសបារ៉ែន ឆ្លងកាត់ស្ពាន «King Fahd » ដែលតភ្ជាប់ប្រទេសទាំង២ ។
លោកហ្វាហាដ ឌូហ្វាលឡា អាល់អូតៃប៊ី ប្រធានគយអារ៉ាប៊ីសាអ៊ូឌីត ឱ្យដឹងថា ពេលមន្ត្រីត្រួតពិនិត្យបុរសនោះប្រទះឃើញដបស្រាជាច្រើនម៉ាករុំបង់ស្អិតនៅជុំវិញភ្លៅ និងកំភួនជើងទាំងសងខាង ។
គ្រឿងស្រវឹងជាវត្ថុត្រូវហាមឃាត់នៅអារ៉ាប៊ីសាអ៊ូឌីត ប្រសិនបើលួចនាំចូល និងស្ថិតក្នុងការកាន់កាប់នឹងត្រូវទទួលទោសវាយនឹងរំពាត់ ឬដាក់គុក ។ កាលពីមុននាយកដ្ឋានពន្ធគយអារ៉ាប៊ីសាអ៊ូឌីត រឹបអូសស្រាចំនួន៤១៥ដប ដែលលាក់ទុកនៅតាមចន្លោះ ផ្សេងៗរបស់រថយន្តមួយគ្រឿងនាំចូលពីបារ៉ែន រួមទាំងស្រាចំនួន៨៣លីត្រលាក់ទុកក្នុងធុងសាំងមួយរបស់រថយន្តដឹកទំនិញ ។
កាលពីខែវិច្ឆិកា ២០១៥ បុរសម្នាក់ត្រូវចាប់ខ្លួនពីបទព្យាយាមយកស្រាបៀរ៤៨.០០០កំប៉ុង ចូលប្រទេសដោយផ្ទុកនៅក្នុងសម្បកកេសទឹកក្រូច ៕
ចែករំលែកព័តមាននេះ