លោក គួច ចំរើន អភិបាលខេត្តព្រះសីហនុ នៅថ្ងៃទី៨ ខែកញ្ញា ឆ្នាំ ២០២១ នេះ បានប្រកាសជាបន្ទាន់ឱ្យផ្អាកការធ្វើដំណើរតាមផ្លូវទូកចូលទៅក្នុងលំហសមុទ្រ ដោយសារតែមានខ្យល់ រលកធំៗ នឹងកើតមានឡើងនៅ
ខេត្តព្រះសីហនុ ៖ លោក គួច ចំរើន អភិបាលខេត្តព្រះសីហនុ នៅថ្ងៃទី៨ ខែកញ្ញា ឆ្នាំ ២០២១ នេះ បានប្រកាសជាបន្ទាន់ឱ្យផ្អាកការធ្វើដំណើរតាមផ្លូវទូកចូលទៅក្នុងលំហសមុទ្រ ដោយសារតែមានខ្យល់ រលកធំៗ នឹងកើតមានឡើងនៅរសៀលថ្ងៃទី៨ ខែកញ្ញានេះ។
លោក គួច ចំរើន បានថ្លែងថា «ជំរាបជូនឯកឧត្តម អស់លោក លោកស្រី ថ្នាក់ដឹកនាំខេត្ត កងកម្លាំងប្រដាប់អាវុធ មន្ទីរជំនាញ អភិបាលក្រុង-ស្រុក បើតាមព័ត៌មានដែលយើងទទួលបានរសៀលនេះ នឹងមានខ្យល់រលកសមុទ្រធំ ចឹងខ្ញុំសម្រេចឱ្យផ្អាកការធ្វើដំណើរតាមផ្លូវទូក កាណូត ចូលទៅក្នុងលំហសមុទ្រ»។
លោក គួច ចំរើន បន្តថា អ្នកដែលមានសមត្ថកិច្ចពាក់ព័ន្ធនឹងការធ្វើដំណើររបស់ភ្ញៀវក៏ត្រូវផ្អាក ការចេញទៅប្រកបរបររបស់ប្រជានេសាទក៏ត្រូវផ្អាក និងស្នើឱ្យអាជ្ញាធរមូលដ្ឋាន ជូនដំណឹងទៅដល់ក្រុមគ្រួសារអ្នកដែលនៅលើគោក ឱ្យរកមធ្យោបាយដើម្បីផ្ដល់ព័ត៌មានទៅឱ្យប្រជានេសាទ ដែលកំពុងនៅក្នុងលំហសមុទ្រ ត្រូវធ្វើដំណើរទៅកន្លែងដែលមានសុវត្ថិភាព ដើម្បីចៀសពីគ្រោះថ្នាក់ដោយសារខ្យល់រលកសមុទ្រធំៗជាដើម៕
ចែករំលែកព័តមាននេះ