មេចុងភៅម្នាក់ចេញពីបើកថ្នាំនៅពេទ្យរុស្ស៊ី ជួបគ្រោះអកុសលក្បែរផ្សារសុវណ្ណា
- ភ្នំពេញ
រាជធានីភ្នំពេញ ៖ បុរសជាមេចុងភៅមួយរូប ខណៈជិះម៉ូតូធ្វើដំណើរតាមផ្លូវសុខៗ ស្រាប់តែដួលតាមផ្លូវក្បែរផ្សារសុវណ្ណា បណ្តាលឱ្យ
រាជធានីភ្នំពេញ ៖ បុរសជាមេចុងភៅមួយរូប ខណៈជិះម៉ូតូធ្វើដំណើរតាមផ្លូវសុខៗ ស្រាប់តែដួលតាមផ្លូវក្បែរផ្សារសុវណ្ណា បណ្តាលឱ្យបាត់បង់ជីវិតភ្លាមៗនៅនឹងកន្លែងកើតហេតុ បន្ទាប់ពីបុរសរងគ្រោះជិះម៉ូតូមួយគ្រឿងតែម្នាក់ឯងចេញពីបើកថ្នាំទឹកនោមផ្អែម និងលើសឈាម នៅមន្ទីរពេទ្យមិត្តភាពខ្មែរ-សូវៀត រួចធ្វើដំណើរទៅជិតដល់កន្លែងធ្វើការនៅម្តុំមុខផ្សារសុណ្ណាទៅហើយ ស្រាប់តែជួបគ្រោះអកុសលបែបនេះតែម្តង ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង១១ព្រឹកថ្ងៃទី៨ ខែកញ្ញា ឆ្នាំ២០២១ នៅចំណុចមុខផ្ទះលេខ B៧៣ តាមបណ្តោយផ្លូវលេខ១៩៩ (ខាងកើតផ្សារសុវណ្ណា) ស្ថិតក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
តាមប្រភពពីនគរបាលបានឱ្យដឹងថា បុរសរងគ្រោះឈ្មោះ លឹម យៃ អាយុ៥១ឆ្នាំ មុខរបរជាមេចុងភៅនៅហាងផាកកាហ្វេ ស្នាក់នៅម្តុំផ្សារកណ្តាល មានស្រុកកំណើតភូមិអង្គសុរភី ឃុំអង្គសុរភី ស្រុកកំពង់ត្រាច ខេត្តកំពត។
តាមប្រភពដដែលបានឱ្យដឹងបន្តថា មុនពេលកើតហេតុ បុរសរងគ្រោះបានជិះម៉ូតូមួយគ្រឿងម៉ាកហុងដា ធុនC១២៥ ស៊េរីឆ្នាំ ២០១៥ ព៌ណខ្មៅ ពាក់ស្លាកលេខ ភ្នំពេញ ១CZ-៨៥៧៧ ធ្វើដំណើរតែម្នាក់ឯង តាមបណ្តោយផ្លូវលេខ១៩៩ ក្នុងទិសដៅពីជើងទៅត្បូង ក្នុងគោលបំណងទៅកន្លែងធ្វើការ នៅមុខផ្សារសុវណ្ណា ។ លុះមកដល់មុខផ្ទះខាងលើ ជិតដល់កន្លែងធ្វើការទៅហើយ ស្រាប់តែដួលម៉ូតូ និងស្លា.ប់បាត់បង់ជីវិតភ្លាមៗតែម្តង ។ ដោយមិនមានអ្នកណាម្នាក់បានដឹងពីមូលហេតុអ្វីឡើយ ។
តាមប្រភពដដែលបានប្រាប់បន្តទៀតថា ពេលនេះក៏មានការភ្ញាក់ផ្អើលទៅដល់អ្នកផ្ទះក្បែរខាង និងកម្លាំងមានសមត្ថកិច្ចប៉ុស្តិ៍នគរបាលទំនប់ទឹក ចុះមកដល់កន្លែងកើតហេតុ យកភួយទៅគ្របលើស.ពជនរងគ្រោះ និងចងខ្សែរបិទផ្លូវ មិនអោយអ្នកដំណើរឆ្លងកាត់ ដើម្បីទុកអោយកម្លាំងជំនាញចុះមកធ្វើការត្រួតពិនិត្យផងដែរ។
តាមប្រភពដដែលបានបន្តទៀតថា បុរសរងគ្រោះត្រូវបានគេដឹងថា មានជំងឺទឹកនោមផ្អែម និងលើសឈាមប្រចាំកាយ ដោយជិះម៉ូតូចេញពីផ្ទះម្តុំផ្សារកណ្តាល មកបើកថ្នាំនៅមន្ទីរពេទ្យមិត្តភាពខ្មែរ-សូវៀត រួចហើយ ក៏ជិះម៉ូតូទៅកន្លែងធ្វើការនៅមុខផ្សារសុវណ្ណា ខណៈជិតដល់ទៅហើយ ក៏ស្រាប់តែដួលស្លា.ប់បាត់បង់ជីវិតតាមផ្លូវយ៉ាងអាណោចអាធ័មបែបនេះម្តង ។ ពេលនោះ ក៏មានវត្តមានក្រុមគ្រួសារសាច់ញាតិរបស់ជនរងគ្រោះជាច្រើននាក់បានចុះមកដល់កន្លែងកើតហេតុផងដែរ។
ក្រោយពេលកើតហេតុ កម្លាំងមានសម្ថកិច្ចមូដ្ឋានខណ្ឌបឹងកេងកង សហការជាមួយក្រុមគ្រូពេទ្យចុះយកសំណាករកវីរុសកូវីដ១៩ តែជាលទ្ធផល គឺអវិជ្ជមាន ទើបប្រគល់ទៅអោយកម្លាំងនគរបាលជំនាញនៃស្នងការដ្ឋានរាជធានីភ្នំពេញធ្វើការពិនិត្យ និងធ្វើកោសល្យវិច្ច័ទៅលើស.ពបុរសជាមេចុងភៅ ដោយបានបញ្ជាក់ថា ជនរងគ្រោះបាត់បង់ជីវិត ដោយសារគាំងបេះដូង ។ បន្ទាប់ពីពិនិត្យរួច សមត្ថកិច្ចជំនាញក៏ប្រគល់ស.ពជនរងគ្រោះទៅអោយក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ