ដើមផ្កាអង្គាសីលជំនឿនាំមកនូវលាភសំណាង
ស្របពេលដែលបុណ្យចូលឆ្នាំប្រពៃណីចិន-វៀតណាម កាន់តែខិតជិតមកដល់នោះ គេសង្កេតឃើញមានដើមផ្កាអង្គាសីលដែលឈ្មួញដឹកពីកន្លែងមួយទៅកន្លែងមួយ ដើម្បីលក់ឲ្យប្រជាពលរដ្ឋសែស្រឡាយចិន ឬ
ខេត្តកំពង់ចាម ៖ ស្របពេលដែលបុណ្យចូលឆ្នាំប្រពៃណីចិន-វៀតណាម កាន់តែខិតជិតមកដល់នោះ គេសង្កេតឃើញមានដើមផ្កាអង្គាសីលដែលឈ្មួញដឹកពីកន្លែងមួយទៅកន្លែងមួយ ដើម្បីលក់ឲ្យប្រជាពលរដ្ឋសែស្រឡាយចិន ឬវៀតណាម ។ ជាក់ស្តែងនៅមុខផ្សារស្រុកអូររាំងឪ និងផ្សារក្រុងកំពង់ចាម ដើមផ្កាអង្គាសីលត្រូវបានគេដាក់តាំងលក់ សម្រាប់យកទៅសែនក្នុងឱកាសថ្ងៃចូលឆ្នាំ ខាងមុខនេះ ។
អ្នកស្រី ស៊ុយ ផល្លី អាយុ៥៣ឆ្នាំ នៅភូមិសាញ់ជីសែន ឃុំតំបែរ ស្រុកតំបែរ ខេត្តត្បូងឃ្មុំ និយាយថា រូបគាត់រួមនឹងបងប្អូន បាននាំគ្នាទៅរកដើមផ្កាអង្គាសីលពីក្នុងព្រៃជ្រៅបានសរុបជាង១០០បាច់ សម្រាប់យកមកលក់នៅផ្សារក្រុងកំពង់ចាម ខេត្តកំពង់ចាម គឺក្នុង១បាច់តូចអាចលក់បានពី៧.០០០រៀលទៅ១៥.០០០រៀល ។
អ្នកស្រី បន្តថា ពីមុនមកផ្កានេះស្រួលរកទេ តែសព្វថ្ងៃមនុស្សចេះតែកាប់រានដីព្រៃដើម្បីធ្វើចម្ការ និងកាប់ទាំងដើមផ្កាអង្គាសីលចោលថែមទៀត ទើបពេលនេះកាន់តែខ្សត់ទៅៗពិបាកនឹងរកផងដែរ ។ ជារៀងរាល់ឆ្នាំ គាត់ដឹកយកមកលក់នៅក្រុងកំពង់ចាម បានប្រាក់ពី២០ទៅ៣០ម៉ឺនរៀលដើម្បីត្រឡប់ទៅផ្ទះវិញ សម្រាប់ផ្គត់ផ្គង់ជីវភាពគ្រួសារ ។
មិនមែនមានតែខ្មែរទេនាំគ្នាលក់ដើមផ្កាអង្គាសីល ជនជាតិវៀតណាមនៅខេត្តតៃនិញ ឈ្មោះ យាំុង យឹក អាយុ២៧ឆ្នាំ ដែលបានដឹកផ្កាអង្គាសីល មកលក់ក្នុងទឹកដីខ្មែរ និយាយថា ពេលបុណ្យចូលឆ្នាំចិន-វៀតណាម កាន់តែខិតជិតមកដល់នេះ គាត់បានថែរក្សាដើមផ្កាអង្គាសីល ទម្រាំតែនឹងចេញផ្កាខ្លះៗលើកដាក់រឺុម៉កម៉ូតូដឹកឆ្លងកាត់ព្រំដែន ចូលមកលក់នៅតាមទីប្រជុំជននៅផ្សារស្រុកអូររាំងឪ ខេត្តត្បូងឃ្មុំ ដោយក្នុង១ដើមតម្លៃជាង១០០ដុល្លារ ។
គាត់នឹងបន្តដំណើរទៅលក់នៅក្រុងកំពង់ចាមទៀត ហើយនៅពេលណាលក់អស់ គាត់នឹងធ្វើដំណើរត្រឡប់ទៅផ្ទះនៅឯវៀតណាម ។ ការដឹកដើមផ្កាអង្គាសីលមកលក់នៅស្រុកខ្មែរនេះ គឺទើបតែដឹកមកលក់លើកទី១នេះទេ ប្រសិនបើលក់ដាច់នោះ នោឆ្នាំក្រោយនឹងដឹកមកលក់ទៀត ។
លោកឧកញ៉ា ហេង ឡុង ប្រធានសមាគមខ្មែរ-ចិន ប្រចាំខេត្តកំពង់ចាម ប្រាប់ឲ្យដឹងថា ដើមផ្កាអង្គាសីលនេះត្រូវបានប្រជាពលរដ្ឋខ្មែរកាត់ចិន-និងវៀតណាម យកមកដាក់តាំងនៅក្នុងផ្ទះនារដូវបុណ្យចូលឆ្នាំចិន-វៀតណាម ជានិមិត្តរូប ដែលមានតាំងពីជីដូនជីតាមកម្ល៉េះ ។ ផ្កានេះឲ្យតែដល់ថ្ងៃចូលឆ្នាំនឹងរីកចេញពណ៌លឿងស្អាត ដែលជាទំនៀមនៃជំនឿនាំលាភនាំសំណាងដល់ក្រុមគ្រួសារនីមួយៗ ៕
ចែករំលែកព័តមាននេះ