ពលរដ្ឋលើកគ្នាតវ៉ា រឿងមន្ត្រីសុរិយោដីចុះវាស់វែងធ្វើប្លង់ តែបែរជាបាត់ដីពួកគាត់
- ព្រៃវែង
ប្រជាពលរដ្ឋប្រមាណជាង៣០នាក់ តំណាងអោយចំនួន២៧គ្រួសារ នៅឃុំព្រៃកន្លោង បានលើកគ្នាទៅតវ៉ានៅសាលាស្រុកពោធ៌រៀង នាព្រឹកថ្ងៃទី
ប្រជាពលរដ្ឋប្រមាណជាង៣០នាក់ តំណាងអោយចំនួន២៧គ្រួសារ នៅឃុំព្រៃកន្លោង បានលើកគ្នាទៅតវ៉ានៅសាលាស្រុកពោធ៌រៀង នាព្រឹកថ្ងៃទី
ខេត្តព្រៃវែង ៖ ប្រជាពលរដ្ឋប្រមាណជាង៣០នាក់ តំណាងអោយចំនួន២៧គ្រួសារ នៅឃុំព្រៃកន្លោង បានលើកគ្នាទៅតវ៉ានៅសាលាស្រុកពោធ៌រៀង នាព្រឹកថ្ងៃទី៦ ខែកញ្ញា ម្សិលមិញ នេះ ហើយស្នើសុំអោយលោកអភិបាលស្រុក ជួយដោះស្រាយអោយពួកគាត់ ដោយសារតែដីស្រែដែលពួកគាត់ធ្លាប់ធ្វើ និងកាន់កាប់៤០ឆ្នាំមកហើយ បែរជាបាត់ នៅពេលដែលមន្ត្រីសុរិយោដីចុះវាស់វែងធ្វើប្លង់ដីបឹង។
ពលរដ្ឋទាំងនោះបានលើកឡើងថា ដីស្រែរបស់ពួកគាត់ នៅចំណុចបឹងក្រចាប់ ក្នុងឃុំព្រៃកន្លោង ស្រុកពោធ៌រៀង គឺជាដីរបបដែលរដ្ឋអំណាចចែកអោយ តាំងពីឆ្នាំ១៩៨០មកម្ល៉េះ ហើយបានបន្តកាន់កាប់តកូនតចៅ រហូតមកដល់ពេលនេះគឺ៤០ឆ្នាំមកហើយ មិនដែលមានបញ្ហាអ្វីនោះទេ។ លុះមកដល់ឆ្នាំ២០២០ មន្ត្រីសុរិយោដីស្រុក បានចុះទៅវាស់វែងធ្វើប្លង់ជូនពួកគាត់ជាលក្ខណៈប្រព័ន្ធ និងបានចេញចុងសន្លឹកអោយពួកគាត់គ្រប់ៗគ្នា មិនមាននរណាម្នាក់បាត់ដីនោះទេ ។
ពលរដ្ឋដែលអះអាងថាបានបាត់បង់ដីនោះ បានរៀបរាប់បន្តថា ប៉ុន្តែមកដល់ដើមខែសីហា ឆ្នាំ២០២១នេះ ពេលដែលមន្ត្រីសុរិយោដីបិទប្រកាសក្បាលដី ពួកគាត់នាំគ្នាទៅពិនិត្យផ្ទៀងផ្ទាត់មើល ក៏ស្រាប់តែឃើញបាត់ដីពួកគាត់អស់ អ្នកខ្លះដី៣ហិកតា នៅសល់២០អា ខ្លះដី២ហិកតា នៅសល់៥អា និងអ្នកខ្លះទៀតមានដីតិចតួច គឺបាត់ដីទាំងអស់តែម្តង និងត្រូវគេដកយកចុងសន្លឹកវិញថែមទៀត។
ពលរដ្ឋទាំងនេះបានបញ្ជាក់ថា ដីស្រែទាំងអស់ពួកគាត់ជាម្ចាស់ នៅកាន់កាប់ធ្វើស្រែបានជាធម្មតា អត់មានអ្នកណាមកទាមទារដណ្តើមយកនោះទេ ប៉ុន្តែនៅក្នុងប្លង់ដែលមន្ត្រីសុរិយោដីបិទប្រកាស គឺបាត់ដីពួកគាត់ ដូច្នេះហើយទើបពួកគាត់មិនសុខចិត្ត នាំគ្នាប្តឹងទៅលោកមេឃុំអោយជួយដោះស្រាយ តែឃុំដោះមិនចេញ ទើបបន្តនាំគ្នាមកប្តឹងនៅសាលាស្រុកទៀត ព្រោះបើមានតែដីអត់ប្លង់ ដូចមនុស្សស្លោកខោអត់លីអូអញ្ចឹង គ្រោះថ្នាក់ណាស់។
ជុំវិញរឿងរ៉ាវខាងលើនេះ លោក អ៊ូ រ៉ត មេឃុំព្រៃកន្លោង បានអោយដឹងថា ពលរដ្ឋទាំង២៧គ្រួសារនេះគឺពួកគាត់ពិតជាបាត់ដីមែន តែមិនមែនមានអ្នកណាមកយកដីគាត់នោះទេ គឺមកពីមន្ត្រីជំនាញ សុរិយោដី និងធនធានទឹក គេធ្វើប្លង់បឹងក្រចាប់ធំពេក ទើបចូលលើដីស្រែពលរដ្ឋដែលនៅជុំវិញបឹង ហើយមិនត្រឹមតែបាត់ដីពលរដ្ឋនោះទេ ដីដែលនៅសល់ក៏ត្រូវខាងមន្ទីរធនធានទឹក ប្តឹងជំទាស់ មិនអោយខាងសុរិយោដីចេញប្លង់អោយពលរដ្ឋដែរ។
លោកមេឃុំបញ្ជាក់ថា ផ្ទៃដីបឹងក្រចាប់ ពេលដែលមន្ត្រីសុរិយោដីចុះវាស់គឺមានតែ១៥ហិកតាទេ ប៉ុន្តែនៅពេលបិទប្រកាស ស្រាប់តែរីកធំរហូតដល់ជាង៤០ហិកតា នេះគឺជាមូលហេតុដែលធ្វើអោយបាត់ដីស្រែប្រជាពលរដ្ឋ តែអាជ្ញាធរឃុំគ្មានលទ្ធភាពដោះទេ គឺបានត្រឹមបញ្ជូនរឿងទៅស្រុកប៉ុណ្ណោះ។
ដោយឡែកលោក យស់ ស៊ីណាត អភិបាលស្រុកពោធ៌រៀង បានអោយដឹងនៅព្រឹកថ្ងៃទី៦ ខែកញ្ញានេះថា រឿងបាត់ដីពលរដ្ឋនៅឃុំព្រៃកន្លោងនេះ លោកទើបដឹងកាលពីចុងខែសីហានេះទេ ហើយភ្លាមៗពលរដ្ឋលើកគ្នាមកសាលាស្រុកបែបនេះ លោកមិនទាន់អាចធ្វើអ្វីបាននោះទេ លោកសុំចុះស្រាវជ្រាវសិន ហើយនៅថ្ងៃទី៨ ខែកញ្ញា ទើបលោកកោះអញ្ជើញមន្ត្រីជំនាញសុរិយោដី មន្ត្រីធនធានទឹក និងតំណាងប្រជាពលរដ្ឋ មកដោះស្រាយនៅសាលាស្រុកតែម្តង តែយ៉ាងណាលោកអះអាងថា លោកមិនអោយប្រជាពលរដ្ឋណាម្នាក់ បាត់ដីនោះទេ។
ពាក់ព័ន្ធរឿងរ៉ាវមន្ត្រីសុរិយោដី ចុះវាស់វែងធ្វើប្លង់បាត់ដីប្រជាពលរដ្ឋនេះ កោះសន្តិភាព មិនអាចសុំការបំភ្លឺពីលោក អេង ផេងអាន ប្រធានមន្ទីរសុរិយោដីខេត្តព្រៃវែងបានទេ ដោយសារទូរស័ព្ទរបស់លោក មិនអាចទំនាក់ទំនងបាន។
រីឯលោក ឃុន សុខឿន ប្រធានមន្ទីរធនធានទឹក និងឧតុនិយមខេត្តព្រៃវែង បានអោយដឹងនៅរសៀលថ្ងៃទី៦ ខែកញ្ញានេះថា ដីស្រែប្រជាពលរដ្ឋទាំង២៧គ្រួសារ នៅជុំវិញបឹងក្រចាប់នោះ គឺមិនបានបាត់ទៅណាទេ ពួកគាត់នៅគ្រប់គ្រងអាស្រ័យផលបានជាធម្មតា គ្រាន់តែនៅក្នុងប្លង់ គឺត្រូវបានកាត់ដីពួកគាត់មួយចំនួន បញ្ចូលទៅក្នុងប្លង់ដីបឹងប៉ុណ្ណោះ។
លោក ឃុន សុខឿន បានបញ្ជាក់ថា រឿងដែលមន្ទីរប្តឹងជំទាស់ មិនអោយចេញប្លង់ជូនពលរដ្ឋ ព្រោះចង់អោយមានការដោះស្រាយអោយចប់សិន ហើយសិទ្ធិអំណាចនេះគឺនៅលើខាងអាជ្ញាធរ បើស្រុកឬខេត្តសំរេចថា ត្រូវកាត់ដីនេះអោយពលរដ្ឋ លោកក៏មិនជំទាស់ដែរ ប៉ុន្តែលោកគ្រាន់តែចង់ទុកផ្ទៃបឹងអោយមានវិសាលភាពធំធេងប៉ុណ្ណោះ។
ចែករំលែកព័តមាននេះ