- ភ្នំពេញ
ភ្នំពេញ៖ អាជ្ញាធររាជធានីភ្នំពេញ និងអាជ្ញាធរខណ្ឌ បានចាប់ផ្តើមត្រួតពិនិត្យ និងធ្វើកិច្ចសន្យា នៅតាមដេប៉ូស្តុក និងលក់ខ្សាច់ ក្នុងបំណង ដើម្បីកុំឲ្យឡានដឹកខ្សាច់ទាំងនោះ បង្កការកកស្ទះចរាចរណ៍ផង…
ភ្នំពេញ៖ អាជ្ញាធររាជធានីភ្នំពេញ និងអាជ្ញាធរខណ្ឌ បានចាប់ផ្តើមត្រួតពិនិត្យ និងធ្វើកិច្ចសន្យា នៅតាមដេប៉ូស្តុក និងលក់ខ្សាច់ ក្នុងបំណង ដើម្បីកុំឲ្យឡានដឹកខ្សាច់ទាំងនោះ បង្កការកកស្ទះចរាចរណ៍ផង…
ភ្នំពេញ៖ អាជ្ញាធររាជធានីភ្នំពេញ និងអាជ្ញាធរខណ្ឌ បានចាប់ផ្តើមត្រួតពិនិត្យ និងធ្វើកិច្ចសន្យា នៅតាមដេប៉ូស្តុក និងលក់ខ្សាច់ ក្នុងបំណង ដើម្បីកុំឲ្យឡានដឹកខ្សាច់ទាំងនោះ បង្កការកកស្ទះចរាចរណ៍ផង និងដើម្បីកុំឲ្យជ្រុះធ្លាក់ខ្សាច់រាយប៉ាយលើផ្លូវតទៅទៀត។
កាលពីសៀលថ្ងៃសុក្រ ទី៣ ខែកញ្ញា ឆ្នាំ២០២១ លោក ស៊ុយ សេរិទ្ធ អភិបាលរងរាជធានីភ្នំពេញ និងលោក ឌី រ័ត្នខេមរុណ អភិបាលរងខណ្ឌមានជ័យ បានដឹកនាំក្រុមការងារ ចុះត្រួតពិនិត្យ និងធ្វើកិច្ចសន្យា នៅតាមដេប៉ូស្តុក និងលក់ខ្សាច់ ក្នុងភូមិសាស្ត្រខណ្ឌមានជ័យ។
ក្នុងពេលចុះត្រួតពិនិត្យ និងធ្វើកិច្ចសន្យានោះ លោក ស៊ុយ សេរិទ្ធ បានណែនាំដេប៉ូខ្សាច់ទាំងអស់ ក្នុងមូលដ្ឋានខណ្ឌមានជ័យ អោយអនុវត្តដូចខាងក្រោម៖ ១. មិនត្រូវដឹកជញ្ជូនខ្សាច់ ក្នុងចន្លោះម៉ោង ៦ព្រឹក រហូតដល់ម៉ោង ៧យប់។ ២. ត្រូវទទួលខុសត្រូវក្នុងការបោសសម្អាតផ្លូវ លាងសម្អាតផ្លូវ អោយបានស្អាតជារៀងរាល់ថ្ងៃ ជាពិសេសចាប់ពីម៉ោង ៧ព្រឹកទៅ ត្រូវធានាអោយបានស្អាត។ ៣.ត្រូវទទួលខុសត្រូវ ស្តារលូតាមតម្រាយផ្លូវ ដែលរថយន្តដឹកជញ្ជូនខ្សាច់របស់ខ្លួន រត់ឆ្លងកាត់អោយបានជាប្រចាំ ដោយធានាមិនអោយមានការកកស្ទះអាចម៍ដី នៅក្នុងប្រព័ន្ធលូឡើយ។ ៤. ត្រូវទទួលខុសត្រូវជួសជុលជាបន្ទាន់ពីការដឹកជញ្ជូន ដែលបណ្តាលអោយខូចខាតផ្លូវ និងប្រព័ន្ធលូ។ ៥. ត្រូវអនុវត្តអោយបានត្រឹមត្រូវ តាមលក្ខខណ្ឌនានា ដែលកំណត់ក្នុងលិខិតអនុញ្ញាតដឹកជញ្ជូនរបស់រដ្ឋបាលរាជធានីភ្នំពេញ សមត្ថកិច្ច ក្រសួង និងស្ថាប័នពាក់ព័ន្ធ។
បន្ទាប់ពីក្រុមការងារ បានធ្វើការណែនាំរួចមក ម្ចាស់ដេប៉ូខ្សាច់ទាំងអស់ បានធ្វើកិច្ចសន្យា ចំពោះមុខក្រុមការងារ ដូចតទៅ៖ ១. មិនធ្វើការដឹកជញ្ជូនខ្សាច់ ក្នុងចន្លោះម៉ោង ៦ព្រឹក រហូតដល់ម៉ោង ៧យប់ឡើយ។ ២. ទទួលខុសត្រូវ ក្នុងការបោសសម្អាតផ្លូវ លាងសម្អាតផ្លូវអោយបានស្អាតជារៀងរាល់ថ្ងៃ ជាពិសេសចាប់ពីម៉ោង ៧ព្រឹកតទៅ ធានាក្នុងការលាងអោយបានស្អាត។ ៣. ទទួលខុសត្រូវស្តារលូតាមតម្រាយផ្លូវ ដែលរថយន្តដឹកជញ្ជូនខ្សាច់ រត់ឆ្លងកាត់អោយបានជាប្រចាំ ដោយធានាមិនអោយមានការកកស្ទះអាចម៍ដី នៅក្នុងប្រព័ន្ធលូឡើយ។ ៤. ទទួលខុសត្រូវជួសជុលផ្លូវ និងប្រព័ន្ធលូ ជាបន្ទាន់ ដែលបណ្តាលអោយមានការខូចខាត ដោយសារការដឹកជញ្ជូនខ្សាច់។ ៥. អនុវត្តអោយបានត្រឹមត្រូវតាមលក្ខខណ្ឌនានា ដែលកំណត់ក្នុងលិខិតអនុញ្ញាតដឹកជញ្ជូនរបស់រដ្ឋបាលរាជធានីភ្នំពេញ សមត្ថកិច្ច ក្រសួង និងស្ថាប័នពាក់ព័ន្ធ។
នេះជាវិធានការថ្មីមួយ ដែលមហាជនទះដៃអបអរសាទរ និងគាំទ្រពេញទំហឹងនឹងអាជ្ញាធរសមត្ថកិច្ចរាជធានីភ្នំពេញ ដែលចាប់ផ្តើមអនុវត្តវិធានការផ្លូវស្អាតនេះ នៅខណ្ឌមានជ័យមុនគេ។ មហាជន ក៏រំពឹងថា នៅ ១៣ខណ្ឌផ្សេងទៀត អាជ្ញាធររាជធានីភ្នំពេញ និងអាជ្ញាធរខណ្ឌ រួមទាំងក្រុមការងារពាក់ព័ន្ធ នឹងអនុវត្តវិធានការដូចគ្នានេះដែរ។
ម្យ៉ាងទៀត វិធានការទាំង ៥ចំណុចរបស់អាជ្ញាធររាជធានីភ្នំពេញ និងខណ្ឌមានជ័យ ខាងលើនេះ ត្រូវអនុវត្តគ្រប់ដេប៉ូស្តុក និងលក់ខ្សាច់ ហើយធ្វើឲ្យគ្រប់ខណ្ឌទាំងអស់។ បើដេប៉ូលក់ និងស្តុកខ្សាច់ណា អនុវត្តផ្ទុយពីកិច្ចសន្យាទាំង ៥ចំណុច ត្រូវតែផាកពិន័យ ហើយឈានទៅបិទអាជីវកម្មដេប៉ូនោះតែម្តង។ នៅការដ្ឋានដូចគ្នា តាមផ្លូវ ៦០ម៉ែត្រ ក្នុងខណ្ឌមានជ័យ គឺឥឡូវនេះ ផ្លូវដ៏ធំទូលាយនេះ ក្លាយជាផ្លូវជនបទ ពោរពេញដោយដីខ្សាច់ ហ៊ុយទ្រលោមគ្រប់ពេលវេលា។ នេះក៏ដោយសារតែឡានដឹកដី ដឹកខ្សាច់ ដែលបម្រើឲ្យការដ្ឋានសំណង់ កំពុងដំណើរការយ៉ាងគគ្រឹកគគ្រេង។
ក្រៅពីសេចក្តីណែនាំ និងកិច្ចសន្យា ៥ចំណុច ដូចបានលើកឡើង និងព្រមព្រៀងគ្នានេះ អាជ្ញាធររាជធានីខេត្ត ស្រុកក្រុងខណ្ឌទាំងអស់ ក៏សូមរឹតបន្តឹងចំពោះឡានជញ្ជូនដឹកដី ដឹកខ្សាច់ ដាក់ពេញហៀរ ដោយគ្មានការបិទបាំង ហើយធ្វើឲ្យកំពប់ ជ្រុះរាយប៉ាយតាមផ្លូវ ដែលធ្វើឱ្យបាត់បង់សោភ័ណភាពតាមផ្លូវផង និងបង្កគ្រោះថ្នាក់ដល់អ្នកដំណើរផង។
ឡានដឹកខ្សាច់ដឹកដី ដឹកថ្មទាំងអស់ ក៏ត្រូវតែបាញ់ទឹក លាងសម្អាតជើងក្រោម និងកង់ឡាន មុននឹងចាកចេញពីដេប៉ូស្តុក និងលក់ខ្សាច់ ក្រួសថ្ម ឬក៏រណ្តៅដី។ នៅពេលចាក់ដី ចាក់ខ្សាច់ គ្រួសថ្ម នៅការដ្ឋានសំណង់ហើយ ក៏ត្រូវបាញ់ទឹកលាងសម្អាតជើងក្រោម កង់ឡាន និងទ្រុងឡានទាំងនោះម្តងទៀត មុននឹងចរាចរណ៍តាមផ្លូវ។
ជាការពិត ការអភិវឌ្ឍន៍សំណង់ផ្ទះល្វែងច្រើន ពិតជាត្រូវការដី ខ្សាច់ គ្រួសថ្មដូច្នេះហើយ។ តែក្រុមអ្នករកស៊ីដឹកជញ្ជូនទាំងអស់ រួមទាំងម្ចាស់ការដ្ឋានសំណង់បុរីផ្ទះល្វែង ឬបុរីវីឡា គួរតែគិតដល់ផលប្រយោជន៍សាធារណជនផង។ ដើម្បីតែអាជីវកម្មរបស់ខ្លួន តែបង្កការលំបាកដល់អ្នកដទៃ គឺមិនត្រឹមត្រូវទាល់តែសោះ។
អាជ្ញាធររាជធានីភ្នំពេញ និងអាជ្ញាធរខណ្ឌសង្កាត់ ក៏ត្រូវតែណែនាំ និងធ្វើកិច្ចសន្យា ឡានដឹកជញ្ជូនដីខ្សាច់ក្រួសថ្ម តាមផ្លូវណា ត្រូវតែអនុវត្តយ៉ាងហោចណាស់ ក៏លាងសម្អាតផ្លូវ ស្តារលូតាមផ្លូវនោះ គ្របបិទបាំងត្រឹមត្រូវ ដើម្បីកុំឲ្យជ្រុះខ្សាច់ ដី ថ្មក្រួសលើផ្លូវ រួមទាំងកំណត់ម៉ោងដឹកជញ្ជូនដែរ។ រីឯម្ចាស់ការដ្ឋានបុរី ផ្ទះល្វែង វីឡា ក៏ត្រូវចូលរួមសហការជាមួយឡានដឹកដីទាំងអស់នោះ ដើម្បីធានាថា ផ្លូវស្អាត និងសុវត្ថិភាព។ ឡានដឹកដី ដឹកខ្សាច់ ដឹកក្រួសថ្ម រួមទាំងឡានលាយស៊ីម៉ង់ត៍ ក៏ត្រូវតែគោរពច្បាប់ និងកុំបើកបរលឿនៗពេក។
អាជ្ញាធរសមត្ថកិច្ច ដែលទទួលខុសត្រូវលើរឿងនេះ ក៏ត្រូវតែធ្វើការងារដោយវិជ្ជាជីវៈ ហើយមិនត្រូវស៊ុមគ្រលំ ត្រូវរ៉ូវនឹងដេប៉ូស្តុក ឬលក់ខ្សាច់ណានោះទេ។ អ្នកបង់លុយឲ្យ ឬដាក់ខែ អាចធ្វើអាជីវកម្មស្រេចចិត្ត ហើយបង្កឲ្យខ្សាច់ជ្រុះរាយប៉ាយ គឺមិនត្រូវកើតមានឡើយ។ តែបើដេប៉ូណា មិនឲ្យលុយអាជ្ញាធរសមត្ថកិច្ច បែរត្រូវរឹតត្បិត និងបិទអាជីវកម្មនោះ ក៏មិនគួរទេ។ ពោលគឺត្រូវមានតម្លាភាព និងស្មើភាពគ្នា ចំពោះមុខច្បាប់ ទើបមិនមានការរិះគន់ ហើយវិធានការនេះ ក៏ត្រូវអនុវត្តឲ្យមានប្រសិទ្ធភាព។
ករណីឡានដឹកដី ដឹកខ្សាច់ ជ្រុះរាយប៉ាយ តាមផ្លូវ ធ្វើឲ្យផ្លូវកៅស៊ូ ផ្លូវបេតុង ទៅជាផ្លូវដីហុយទ្រលោម កើតមាននៅគ្រប់ទីកន្លែង នាពេលនេះ។ នៅខាងតំបន់អរិយក្សត្រ គឺដើម្បីតែបម្រើឲ្យការដ្ឋានបុរីផ្ទះល្វែង។ ចង់ដីខ្សាច់ជ្រុះលើផ្លូវ ហើយហុយដីបែបណា ក៏មិនឈឺក្បាលដល់អាជ្ញាធរស្រុកល្វាឯម ខេត្តកណ្តាលនោះឡើយ។ ខេត្តផ្សេងទៀត ក៏ដូចគ្នា។ សូមកុំចាំទាល់តែនាយករដ្ឋមន្ត្រី ស្រែកបញ្ជា ទើបមានវិធានការ។
ការងារនេះ គឺជាការទទួលខុសត្រូវរបស់អាជ្ញាធរស្រុកខណ្ឌក្រុង រាជធានីខេត្ត។ កុំយកលុយពីឈ្មួញដីខ្សាច់ ឬបុរីផ្ទះល្វែង ហើយធ្វើមិនដឹងមិនលឺ ទុកឲ្យអ្នកដំណើរ និងប្រជាពលរដ្ឋរស់នៅសង្ខាងផ្លូវ រងទុក្ខ ដោយសារតែផលប្រយោជន៍ឯកជននេះ។
ឥឡូវ នៅភ្នំពេញ ក្នុងខណ្ឌមានជ័យ ចាប់ផ្តើមអនុវត្តវិធានការ ៥ចំណុច ដើម្បីឲ្យផ្លូវស្អាតហើយ បើថា នៅស្រុកល្វាឯម ខេត្តកណ្តាល ឬនៅស្រុកក្រុងខេត្តផ្សេងទៀត មិនដឹងថា ត្រូវធ្វើយ៉ាងណា ក៏សូមយកលំនាំតាមខណ្ឌមានជ័យ រាជធានីភ្នំពេញ ហើយចាត់វិធានការលើដេប៉ូស្តុកនិងលក់ខ្សាច់ រណ្តៅដី ឬការដ្ឋានសំណង់ ដើម្បីឲ្យប្រជាជនទូទៅ ទទួលបានសេចក្តីសុខផង៕
ចែករំលែកព័តមាននេះ