ខេត្តកំពង់ឆ្នាំង៖ អ្នកបើករថយន្តដឹកកម្មករ ពីរនាក់ ត្រូវបានសមត្ថកិច្ចនគរបាលការិយាល័យព្រហ្មទណ្ឌកម្រិតស្រាល កសាងសំណុំរឿង បញ្ជូនទៅកាន់តុលាការ នៅព្រឹកថ្ងៃទី៣ ខែកញ្ញា ឆ្នាំ២០២១ ពីបទប្រើហិង្សា ដោយចេតនា បង្កឲ្យខូចខាតទ្រព្យសម្បត្តិអ្នកដទៃ និងបង្កអនាធិបតេយ្យ ស្ទះចរាចរណ៍លើផ្លូវជាតិលេខ៥។
លោក ពេជ្រ សុឃឿ នាយការិយាល័យនគរបាលព្រហ្មទណ្ឌ កម្រិតស្រាល នៃស្នងការដ្ឋាននគរបាល ខេត្តកំពង់ឆ្នាំង បានឲ្យដឹងថា ជនសង្ស័យ ដែលបានបង្កហិង្សាលើផ្លូវជាតិ បង្កឲ្យស្ទះចរាចរណ៍ ទាំង ២នាក់នោះ គឺម្នាក់ ឈ្មោះ ជុ វី អាយុ ៣៩ឆ្នាំ មានទីលំនៅភូមិឈូកក្រញ៉ាស់ ឃុំឈូកស ស្រុកកំពង់ត្រឡាច និងម្នាក់ទៀត ឈ្មោះ យុំ វណ្ណៈ អាយុ ២៧ឆ្នាំ មានទីលំនៅ ក្នុងភូមិកាកាប ឃុំខ្លុងពពក ស្រុកទឹកផុស។ ពួកគេ ទាំង ២ នាក់ ជាអ្នកបើកបររថយន្តដឹកកម្មកររោងចក្រ។
ប្រភពដដែល បានបន្តថា នៅពេលកើតហេតុ គឺវេលាម៉ោង ៦ និង ១០នាទីព្រឹក ថ្ងៃទី២ ខែកញ្ញា ឆ្នាំ២០២១ ឈ្មោះ ជុ វី បានបើករថយន្តដឹកកម្មករ ទៅធ្វើការដូចរាល់ដង លុះមកដល់ចំណុចកើតហេតុចន្លោះគីឡូម៉ែត្រលេខ ៤៨ និងលេខ ៤៩ ស្ថិតក្នុងភូមិតាកុល ឃុំពានី ស្រុកកំពង់ត្រឡាច ស្រាប់តែមានរថយន្តដឹកកម្មករមួយគ្រឿងទៀត បើកបរដោយឈ្មោះ យុំ វណ្ណៈ បើកមកស្របទិស ហើយបានរេចង្កូតមកស្ដាំដៃ ប៉ះនឹងរថយន្ត ឈ្មោះ ជុ វី បង្កឲ្យដាច់កញ្ចក់ មើលក្រោយមួយចំហៀ របស់ឈ្មោះ យុំ វណ្ណៈ ដែលជាអ្នកបង្ក។
ក្នុងពេលនោះ ឈ្មោះ ជុ វី មិនបានឈប់ទេ គឺនៅតែបើកបន្តទៅមុខ ធ្វើឲ្យឈ្មោះ យុំ វណ្ណៈ កើតក្តីខឹងសម្បារ ហើយឈប់រថយន្ដ ស្ទុះចុះទៅឃាត់រថយន្តឈ្មោះ ជុ វី ឱ្យឈប់ និងជជែកគ្នា បង្កជាទំនាស់ រកត្រូវរៀងៗខ្លួន។
វីដេអូឃ្លីប ដែលបង្ហាញដោយមន្ត្រីការិយាល័យព្រហ្មទណ្ឌកម្រិតស្រាល គេឃើញឈ្មោះ យុំ វណ្ណៈ ទាមទារឲ្យឈ្មោះ ជុ វី សងកញ្ចក់រថយន្តរបស់ខ្លួន ដើម្បីបញ្ចប់រឿង។ ប៉ុន្តែឈ្មោះ ជុ វី មិនព្រមសងទើបឈ្មោះ យុំ វណ្ណៈច្រឡោតខឹង បានចាប់កាច់កញ្ចក់មើលក្រោយរថយន្តរបស់ឈ្មោះ ជុំ វី បាក់ទៅក្រោម ហើយក៏បង្កជាទំនាស់ វាយតប់គ្នា បង្កឲ្យកកស្ទះចរាចរណ៍ពេញផ្លូវ។
នៅពេលកើតហេតុ សមត្ថកិច្ចនគរបាលមូលដ្ឋាន បានឃាត់អ្នកបើកបររថយន្តទាំងពីរនាក់ រួចបានបញ្ជូនមកកាន់ស្នងការដ្ឋាននគរបាលខេត្ត។ នគរបាលខេត្ត ក៏បានបន្តបញ្ជូនជនសង្ស័យទាំងពីរនាក់ ទៅតុលាការ ដោយចោទប្រកាន់ពីបទបង្កហិង្សាដោយចេតនា ធ្វើឲ្យខូចខាតទ្រព្យសម្បត្តិអ្នកដទៃ និងបង្កការកកស្ទះលើផ្លូវជាតិ៕ ពៅ សុខហ៊ាន
ចែករំលែកព័តមាននេះ