ខេត្តឧត្តរមានជ័យ៖ ក្រុមអាជ្ញាធរថៃ បានដោះលែងពលរដ្ឋខ្មែរ ៣នាក់ ឱ្យរួចពីពន្ធធនាគារ ហើយបញ្ជូនខ្លួនយកមកប្រគល់ឱ្យក្រុមអាជ្ញាធរកម្ពុជាវិញ តាមច្រកទ្វារអន្តរជាតិជាំ ស្ថិតក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ កាលពីវេលាម៉ោង ២រសៀល ថ្ងៃទី១ ខែកញ្ញា ឆ្នាំ២០២១ ម្សិលមិញ។
ប្រជាពលរដ្ឋខ្មែរ ដែលក្រុមអាជ្ញាធរថៃ ដោះលែងឱ្យរួចផុតពីពន្ធនាគារនោះ មានឈ្មោះ អ៊ិន ទិព្ធ ភេទប្រុស អាយុ ៥៥ឆ្នាំ។ ឈ្មោះ ជួន ឃឿន ភេទប្រុស អាយុ ៥០ឆ្នាំ និងម្នាក់ទៀត ឈ្មោះ ធឿន ឃីម ភេទប្រុស អាយុ ៣៦ឆ្នាំ។ អ្នកទាំង ៣ រស់នៅភូមិចារថ្មី ឃុំទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ។ អ្នកទាំងនោះ ត្រូវទាហានថៃ ចាប់ខ្លួន កាលពីខែកុម្ភៈ ឆ្នាំ២០១៧ ពីបទឆ្លងដែន រកកាប់ឈើក្រញូង ចូលតាមច្រកដូនពោធិ៍ ហើយត្រូវជាប់គុក នៅស្រុកខាន់ថាឡាក់ ខេត្តស៊ីសាកេត ប្រទេសថៃ។
ក្រុមអាជ្ញាធរកម្ពុជា ដែលបម្រើការងារនៅច្រកទ្វារអន្តរជាតិជាំ ឱ្យដឹងថា ពលរដ្ឋខ្មែរ ៣នាក់ ដែលក្រុមអាជ្ញាធរថៃ ប្រគល់ឱ្យនោះ ខាងកម្ពុជា បានធ្វើការណែនាំ និងឱ្យធ្វើកិច្ចសន្យា បញ្ឈប់ឆ្លងដែន ដោយខុសច្បាប់បន្តទៀត បន្ទាប់មក ប្រគល់ទៅឱ្យគ្រូពេទ្យយកសំណាក ពិនិត្យរក COVID19 ហើយលទ្ធផលអវិជ្ជមាន ក៏បញ្ជូនទៅធ្វើចត្តាឡីស័ក នៅសាលាបឋមសិក្សា ទួលថ្មី ស្ថិតនៅស្រុកអន្លង់វែង ខេត្តឧត្ដរមានជ័យ។
គួររំលឹកថា ករណីនេះ មិនមែនជាលើកទី១ នោះទេ ក្រុមអាជ្ញាធរថៃ បានបញ្ជូនពលរដ្ឋខ្មែរ ដែលឆ្លងដែនចូលទឹកដីថៃដោយខុសច្បាប់ ហើយត្រូវជាប់ឃុំក្នុងទឹកដីថៃ មុននឹងប្រគល់ឱ្យក្រុមអាជ្ញាធរកម្ពុជា ជាបន្តបន្ទាប់៕ ឱម សារឿន
ចែករំលែកព័តមាននេះ