ខេត្តកំពង់ស្ពឺ ៖ កងកម្លាំងប្រដាប់អាវុធទាំង៣ប្រភេទដែលកំពុងប្រើប្រាស់ស្លាកលេខ (ខម.នប)កំពុងព្រួយបារម្ភ ហើយចង់លក់រថយន្តដែលខ្លួនកំពុងប្រើប្រាស់បំពាក់ស្លាកលេខនោះចេញវិញ ដោយអ្នកខ្លះចង់លក់រថយន្តហ្វតខ្លះទៀតម៉ាស្តា ខ្លះទៀត វីហ្គោនិងលុចស៊ីស៣៥០ អត់ពន្ឋរបស់ខ្លួនក្នុងតម្លៃថោកៗ ព្រោះខ្លាចខាងគយចាប់អោយបង់ពន្ឋ ។ រីឯអ្នកខ្លះទៀត កំពុងគិតពិចារណាថា តើនឹងបង់ពន្ឋប្រើប្រាស់បន្ត ឬយ៉ាងណា ។
មន្ត្រីនគរបាលមួយរូបនៃស្នងការដ្ឋាននគរបាលខេត្តបានលើកឡើងថា ភាគច្រើនមន្ត្រីយើងប្រើប្រាស់រថយន្តផ្ទាល់ខ្លួនដែលមិនមានពន្ឋតែបានស្នើសុំស្លាកលេខនគរបាលតាមរយ:អង្គភាពយកមកបំពាក់យានយន្តរបស់ខ្លួន។ មន្ត្រីដដែលបន្តថា ភាគច្រើនគឺគេមិនបានយកយានយន្តរបស់ខ្លួនមកបំរើការអង្គភាពនោះទេគឺជិះផ្ទាល់ខ្លួន។
ចំណែកមន្ត្រីយោធាភូមិភាគ៣ដែលជិះរថយន្តស្លាកលេខខេមរភូមិន្ទឯណោះវិញ អ្នកខ្លះក៏បានលើកឡើងផងដែរថា ភាគច្រើននៃមន្ត្រីយោធាសុទ្ធសឹងតែប្រើប្រាស់ស្លាកលេខខេមរភូមិន្ទ(ខម) ។ មន្ត្រីដដែលបន្តថា ចាប់តាំងពីមានសេចក្តីសម្រេចរបស់ថ្នាក់ដឹកនាំមក ធ្វើអោយមន្ត្រីដែលប្រើប្រាស់ស្លាកលេខ ខម កំពុងគិតគូរនិងពិចារណាថាតើត្រូវបង់ពន្ឋដើម្បីប្រើប្រាស់បន្តឬក៏លក់ចេញ។
ចំណែកឯមន្ត្រីកងរាជអាវុធហត្ថដែលមានប្រើប្រាស់យានយន្តអត់ពន្ឋពាក់ស្លាកលេខ(ខម09)វិញក៏បានលើកឡើងផងដែរថា ចង់មិនចង់ក៏ត្រូវតែអនុវត្តតាមការសម្រេចរបស់ថ្នាក់ដឹកនាំដែរទី១ គឺត្រូវបង់ពន្ធដើម្បីងាកមកប្រើស្លាកលេខធម្មតា ទី២បើមិនអីចឹងទេត្រូវលក់រថយន្តដែលកំពុងប្រើប្រាស់សព្វថ្ងៃចេញដើម្បីកុំអោយឈឺក្បាល តែអំឡុងពេលនេះយើងលក់អោយអ្នកណា ហើយអ្នកណាទៅដែលហ៊ានទទួលទិញរថយន្តអត់ពន្ឋរបស់យើងយកទៅបង់ពន្ឋក្នុងកំរឹតខ្ពស់។
និយាយរួមទៅអ្នកដែលប្រើប្រាស់យានយន្តអត់ពន្ឋសុតសឹងជាមន្ត្រីរាជការកងកម្លាំងប្រដាប់អាវុធហើយម្នាក់ៗបើនិយាយពីជីវភាពវិញក៏មិនសូវធូរធាប៉ុន្មានដែរទើបទិញរថយន្តអត់ពន្ឋមកជិះ ដោយអ្នកខ្លះលើកឡើងថា បើរដ្ឋតម្រូវអោយបង់ពន្ធតើអាចធ្វើបានទេក្ន្ងុងការកាត់ប្រាក់ខែក្នុងភាគរយណាមួយរបស់មន្ត្រីបំរើការងារក្នុងជួរកងយោធពលខេមរភូមិន្ទ ដើម្បីបង់ពន្ឋ និយាយជារួមគឺសុំបង់ពន្ឋរំលស់តែម្តង ។
ក្នុងបរិបទនេះដែរ ម្ចាស់យានយន្តខ្លះទៀតបានលើកឡើងថាសុំអោយថ្នាក់ដឹកនាំតាមអង្គភាពជួយសំរួលអោយកូនចៅផងដើម្បីកូនចៅនេះនិយាយចំពោះអ្នកដែលបំរើការងារពិតប្រាកដ ចំណែកអ្នកដែលជ្រកក្រោមស្លាកលេខ នប.ខម.រកសុីខាងក្រៅវិញសូមថ្នាក់លើចាត់ចែងតាមច្បាប់ចុះ។ ចំណែកឯក្រុមរកស៊ីទិញលក់រថយន្តអត់ពន្ឋវិញម្នាក់ៗបានបញ្ចេញមតិថា ក្រោយពីមានសេចក្តីសម្រេចរបស់ថ្នាក់ដឹកនាំអោយម្ចាស់យានយន្តតម្រូវយកយានយន្យរបស់ខ្លួនទៅបង់ពន្ឋធ្វើអោយតម្លៃរថយន្តអត់ពន្ឋគ្រប់ប្រភេទលែងមានហាងឆេងដូចមុន ហើយម្នាក់ៗកំពុងអំពាវនាវលក់រថយន្តរបស់ខ្លួន តែគ្មានអ្នកទិញ ។
សូមរំលឹកថា ក្នុងខេត្តកំពង់ស្ពឺនេះ បន្ទាប់ពីកងកម្លាំងប្រដាប់អាវុធមកសំបូរច្រើនជាងគេគឺឡានបែនដឹកដីដឹកថ្មនិងខ្សាច់ ដែលភាគច្រើនមានពណ៌ត្រេអ៊ី ពាក់ស្លាកលេខខេមរភូមិន្ទនិងមានបិតឡូហ្គោអង្គភាពទៀតផង កំពុងចរាចរណ៍ពេញដងផ្លូវជាពិសេសគឺឡានខ្សែដឹកឥវ៉ាន់មកពីស្រែអំបិលកោះកុងទៅភ្នំពេញតែម្តង។ បញ្ជាក់ទៀតថា ថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចយល់ព្រមលើសំណើរបស់ក្រសួងសេដ្ឋកិច្ច និងហិរញ្ញវត្ថុ កំណត់ឲ្យយានយន្តឯកជនជ្រកក្រោមផ្លាកលេខរដ្ឋ ផ្លាកលេខ ខ.ម និង ន.ប ដែលមានចង្កួតឆ្វេង និងពុំមានចុះបញ្ជីទ្រព្យរបស់រដ្ឋ ត្រូវបង់ពន្ធលើមធ្យោយបាយ ដឹកជញ្ជូនប្រចាំឆ្នាំ និងបង់ពន្ធនាំចូលតាមច្បាប់ជាធរមាន។
នេះបើតាមលិខិតរបស់អគ្គបណ្ឌិតសភាចារ្យ អូន ព័ន្ធមុនីរ័ត្ន បានស្នើសុំការសម្រេចរបស់សម្តេចតេជោ ហ៊ុន សែន ហើយត្រូវបានសម្តេចចារយល់ព្រម លើការស្នើទាំង៥ចំណុចរួមមាន៖ ១៖ ចំពោះយានយន្តឯកជន ក្រោមផ្លាកលេខរដ្ឋ ផ្លាកលេខ ខ.ម និង ន.ប ដែលមានចង្កួតឆ្វេង និងពុំមានក្នុងបញ្ជីទ្រព្យសម្បត្តិរដ្ឋ របស់អគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធនៃក្រសួងសេដ្ឋកិច្ច និងហិរញ្ញវត្ថុ អនុគ្រោះតែមួយលើកចុងក្រោយ ដោយបន្តអនុញ្ញាឲ្យបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ឆ្នាំ២០២១ ដោយប្រើប្រាស់ថវិកាផ្ទាល់ខ្លួន តាមការដាក់ពាក្យស្នើសុំរបស់ម្ចាស់យានយន្តមួយឆ្នាំទៀតប៉ុណ្ណោះ។ ការបង់ពន្ធនេះ ពុំមែនមានន័យថា ម្ចាស់យានយន្តបានរួចផុតពី កាតព្វកិច្ចបង់ពន្ធ និងអាការនាំចូលយានយន្តតាមច្បាប់ និងបទប្បញ្ញត្តិជាធរមានឡើយ។ ២៖ អគ្គនាយកដ្ឋានពន្ធដារ រៀបចំបញ្ជីលម្អិតយានយន្តឯកជនជ្រកក្រោមផ្លាកលេខរដ្ឋ លេខ ខម និងនប អំពីភិនភាគសម្គាល់យានយន្ត និងអំពីម្ចាស់យានយន្ត ជូនដល់អគ្គនាយកដ្ឋានគយ និងរដ្ឋាករកម្ពុជា ដើម្បីចាត់វិធានការបន្តខាងផ្នែកពន្ធ និងអាករនាំចូល។
៣៖ អាជ្ញាធរដែនដី និងកងកម្លាំងប្រដាប់អាវុធ ត្រូវគាំទ្រកម្លាំងរបស់គយ ក្នុងការទប់ស្កាត់ និងបង្ក្រាបការរត់ពន្ធរថយន្តចង្កួតស្តាំចូលមកកម្ពុជា។ ៤៖ គ្រប់ក្រសួង និងស្ថាប័នត្រូវអនុវត្តឲ្យបានម៉ឺងម៉ាត់នូវច្បាប់ និងគោលនយោបាយហាមឃាត់ការនាំចូល និងប្រើប្រាស់រថយន្តចង្កួតស្តាំ (លើកលែងតែមានការ អនុញ្ញាតពីរាជរដ្ឋាភិបាល ជាលក្ខណៈពិសេសដូចជា រថយន្តអគ្គិភ័យ រថយន្តដឹកសំរាម ជាដើម) ដោយមិនត្រូវពាក់ព័ន្ធដោយផ្ទាល់ ឬប្រយោលក្នុងទម្រង់ណាមួយ ក្នុងការ «ទទួលស្គាល់» រថយន្តចង្កួតស្តាំ ដែលជាប្រភេទរថយន្តខុសច្បាប់។ ក្នុងករណីរកឃើញបុគ្គលដែលមានការពាក់ព័ន្ធខាងលើត្រង់ចំណុចនេះ បុគ្គលនោះត្រូវទទួលរងទោសទណ្ឌតាមច្បាប់ជាធរមាន។ ៥៖ អនុញ្ញាតឲ្យបង់ពន្ធ និងអាករនាំចូលចំពោះរថយន្តចង្កួតស្តាំមានស្រាប់ក្នុងស្រុក ជាលើកចុងក្រោយ តែត្រូវកែចង្កួតពីស្តាំមកឆ្វេង ដើម្បីឲ្យស្របច្បាប់ចរាចរណ៍ផ្លូវគោករបស់កម្ពុជា។
ការអនុញ្ញាតនេះ មានឱសានវាទត្រឹមដំណាច់ខែមិថុនា ឆ្នាំ២០២២។ បន្ទាប់ពីនោះ រថយន្តចង្កួតស្តាំដែលត្រូវបង្ក្រាបបាននឹងតម្រូវឲ្យដោះបំបែកជាគ្រឿងបន្លាស់ ឬកំទេចចោល។ ក្រសួងសេដ្ឋកិច្ចបានឲ្យដឹងថា យានយន្តនាំចូលជាំប្រភពចំណូលយ៉ាងសំខាន់សម្រាប់ថវិកាជាតិ។ ក្នុងឆ្នាំ២០១៩ ចំណូលពីក្រុមទំនិញនេះ ដើរតួនាទីជាងពាក់កណ្តាល (៥៣%) នៃចំណូលសរុបដែលប្រមូលបានដោយអគ្គនាយកដ្ឋានគយ, ឆ្នាំ២០២០ តួលេខនេះបានធ្លាក់ចុះមកត្រឹម ៤៣% ដោយសារទីផ្សារយានយន្ត រងផលប៉ះពាល់ដោយសារកូវីដ១៩ ៕
ចែករំលែកព័តមាននេះ