រាជធានីភ្នំពេញ ៖ ដោយសារជម្ងឺកូវីដ-១៩ មិនមានការថយចុះ ធ្វើសហព័ន្ធកីឡាបាល់ទាត់កម្ពុជា(FFC) បានសម្រេចប្រកាសលុបចោលជាស្ថាពរនូវក្របខណ្ឌជើងឯកចំនួន៣ក្របខណ្ឌ គឺការប្រកួតជម្រើសជើងឯកលីគនារី និងការប្រកួតពានរង្វាន់យុវជនអាយុក្រោម១៥ឆ្នាំ និងអាយុក្រោម១៨ឆ្នាំរដូវកាលឆ្នាំ២០២០ បន្ទាប់ពីព្រឹត្តិការណ៍កីឡាទាំងអស់បានពន្យារពេលអស់៦ខែ ក្រោយពីផ្ទុះព្រឹត្តិការណ៍សហគមន៍ ២០ កុម្ភៈ រហូតមកទល់ពេលនេះ ជំងឺកូវីដនៅមិនទាន់មានការថយចុះនៅឡើយ ។
សេចក្ដីជូនដំណឹងនេះធ្វើឡើង ក្រោយពីសហព័ន្ធកីឡាបាល់ទាត់កម្ពុជាបានបើកកិច្ចប្រជុំបន្ទាន់មួយកាលពីល្ងាចថ្ងៃទី៣១ សីហា ដោយមានការចូលរួមពីមន្ត្រីគណៈកម្មាធិការប្រតិបត្តិសហព័ន្ធ ក្រោយពីបានធ្វើការពិចារណាដោយម៉ត់ចត់លើសេចក្ដីប្រកាសរបស់ក្រសួងសុខាភិបាល និងការណែនាំរបស់ក្រសួងអប់រំយុវជននិងកីឡា ដោយសារព្រឹត្តិការណ៍សហគមន៍ ២០ កុម្ភៈ មិនទាន់មានការថយចុះ ដែលធ្វើឱ្យប៉ះពាល់យ៉ាងធ្ងន់ធ្ងរ ដល់សកម្មភាពប្រមូលផ្ដុំនិងហាត់ហ្វឹកហ្វឺនរបស់ក្រុមយុវជនតាមរាជធានីខេត្ត និងមិនអាចបន្តការប្រកួតតាមកាលវិភាគ ក្រោយពីពន្យារពេល និងបានអូសបន្លាយរហូតមកទល់បច្ចុប្បន្ន ។ ដូច្នេះគណៈកម្មការប្រកួតក៏បានឯកភាពសម្រេចលុបចោលការប្រកួតជ្រើសជើងឯកនារី និងជម្រើសជើងឯកយុវជនអាយុក្រោម១៥ឆ្នាំ និង១៨ឆ្នាំជាស្ថាពរ។
ទន្ទឹមជាមួយនិងការសម្រេចលុបចោលការប្រកួតទាំង៣លើនេះផងដែរ គណៈកម្មការក៏បានសម្រេចផ្ដល់ចំណាត់ថ្នាក់ដល់ការប្រកួតលីគនារីចំនួនពីរក្រុមដែលបានឈានចូលមកដល់វគ្គផ្ដាច់ព្រ័ត្រគឺក្រុមបាល់ទាត់នារីព្រះខ័នរាជស្វាយរៀងនិងក្រុមបាល់ទាត់នារី ខេត្តកំពង់ស្ពឺ-ណាហ្គាវើលដ៏ទទួលបានចំណាត់ថ្នាក់លេខ១ស្ទួន ។ ចំណែកការប្រកួតជ្រើសរើសជើងឯកយុវជនអាយុក្រោម១៥ឆ្នាំ និងអាយុក្រោម១៨ឆ្នាំ គណៈកម្មការប្រកួតមិនបានផ្ដល់ចំណាត់ជ័យលាភីដល់ក្រុមណាមួយនោះទេ ដោយសាតែការប្រកួតពីរក្របខណ្ឌខាងលើមិនទាន់បញ្ចប់ការប្រកួតវគ្គជម្រុះតាមពូលនៅឡើយ ។ ហើយក្រុមយុវជនទាំងពីរក្របខណ្ឌខាងលើនេះទៀតត្រូវបានសហព័ន្ធផ្អាកការប្រកួតតាំងពីចុងខែកុម្ភៈ រហូតមកទល់បច្ចុប្បន្ននេះ ៕
ចែករំលែកព័តមាននេះ