ខេត្តបន្ទាយមានជ័យ៖ កិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការ រយៈពេល ០៩ខែ ឆ្នាំ២០២១ និងលើកទិសដៅអនុវត្ត សម្រាប់ខែបន្ទាប់។ ពិធីនេះ ប្រព្រឹត្តទៅ…
ខេត្តបន្ទាយមានជ័យ៖ កិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការ រយៈពេល ០៩ខែ ឆ្នាំ២០២១ និងលើកទិសដៅអនុវត្ត សម្រាប់ខែបន្ទាប់។ ពិធីនេះ ប្រព្រឹត្តទៅ ក្រោមអធិបតីភាព លោកឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ និងមានការចូលរួមពីលោក លោកស្រី ឧត្តមសេនីយ៍ វរសេនីយ៍ ស្នងការរង លោកអធិការនគរបាល ក្រុង ស្រុក ទាំង ៩ និងលោកមេបញ្ជាការវរសេនាតូចការពារព្រំដែនគោក ទាំង ៤អង្គភាព។
របាយការណ៍បូកសរុបសភាពការណ៍ និងលទ្ធផលកិច្ចប្រតិបត្តិការរយៈពេល ៩ខែរបស់ស្នងការដ្ឋាន ដែលអានដោយលោកឧត្តមសេនីយ៍ត្រី រ៉ែម វីរៈ ស្នងការរង ទទួលផែនការងារសេនាធិការដ្ឋាន បានបង្ហាញថា សភាពការណ៍បទល្មើសព្រហ្មទណ្ឌ កើតឡើង ៧៣លើក លើ ៦២លើក កើន ១៨% ក្នុងនោះ បទល្មើស ឧក្រិដ្ឋ កើតឡើង ១៩លើក លើ ១៧លើក កើនឡើង ១២% និងបទល្មើសមជ្ឈឹម កើតឡើង ៥៤លើក លើ ៤៥លើក កើនឡើង ២០%។ ទោះបីបទល្មើសព្រហ្មទណ្ឌ ជារួម កើនឡើង ១៨% (៧៣/៦២) ប៉ុន្តែសកម្មភាពបង្ក្រាបមានកំរិតខ្ពស់ រហូតដល់ ៨២% ឃាត់ខ្លួនជនសង្ស័យ ១០៥នាក់ ដកហូតម៉ូតូ ១១គ្រឿង ក្នុងនោះ ជាប់សារធាតុញៀន ៣៨នាក់ (ឃាតកម្ម ០១នាក់, លួច ៣២នាក់, ហឹង្សាដោយចេតនា ០២នាក់, ហឹង្សាក្នុងគ្រួសារ ០២នាក់, បំពានផ្លូវភេទ ០១នាក់)។ បង្ក្រាបជាក់ស្តែងចំនួន ៤៦លើក ឃាត់ខ្លួនចំនួន ៧៧នាក់ (ឃាតកម្ម ០៥លើក, រំលោភសេពសន្ថវៈ ចំនួន ១១លើក, លួចមានស្ថានទម្ងន់ទោស ០១លើក, លួច ១៧លើក ,ឆបោក ០១លើក, ហឹង្សាដោយចេតនា ០៨លើក, ហឹង្សាក្នុងគ្រួសារ ០៣លើក, បំពានផ្លូវភេទ ០១លើក, ឆក់០១លើក។ បង្ក្រាបតាមការស្រាវជ្រាវចំនួន ១៤លើក ឃាត់ខ្លួន ២៨នាក់ ៖ ឃាតកម្ម ០៣លើក, ហឹង្សាដោយចេតនា ០២លើក, បំពានផ្លូវភេទ ០១លើក, ឆក់ ០១លើក។ បង្ក្រាបបទល្មើសគ្រឿងញៀនខុសច្បាប់ ចំនួន ២៥០លើក លើ ១៩៨ លើក ឃាត់ខ្លួន ៥៤២នាក់ ស្រី ៤៩នាក់ ដកហូតវត្ថុតាង ថ្នាំគ្រាប់ពណ៌ក្រហម ( WY) ២៦៩,២៣ក្រាម, ថ្នាំមេតំហ្វេតាមីន Ice ៣៥១.៤៦០,២៣ក្រាម, ថ្នាំគ្រាប់ពណ៌ត្រួយចេក រូបម្កុដ ១,៧៨ក្រាម ,ម្សៅម៉ត់ (ខេហិត) ៥,៧៥ក្រាម, ថ្នាំអ៊ិចស្តាស៊ី ៤០,៩១ក្រាម, កញ្ឆាស្ងួត ០៤គ.ក្រាម, ចង្ក្រានសម្ងួតថ្នាំ ០១, ចានសម្ងួត ០១, កាំភ្លើងAK47 ០១ដើម, បង់២, គ្រាប់ចំនួន ៤០គ្រាប់, កាំភ្លើងកែច្នៃ ០៦ដើម, រថយន្ត ០៦គ្រឿង, ទូរស័ព្ទដៃ ២៧៦គ្រឿង, ជញ្ជីង ១៣, កាំបិត ៣៥, ដាវសាម៉ូរ៉ៃ ១២ដើម, ប្រាក់ខ្មែរ ២លាន, ប្រាក់អាមេរិក ២០ដុល្លារ, ប្រាក់ថៃ ៨៦,៥០០បាត និងឧបករណ៍ សម្ភារៈមួយចំនួន។
នៅក្នុងឱកាសបូកសរុបនោះដែរ លោកឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ ថ្លែងនូវការកោតសរសើរដល់កងកម្លាំងទាំងអស់ ដែលបានខិតិខំអនុវត្ត តាមតួនាទីរបស់ខ្លួន ដែលថ្នាក់លើប្រគល់ជូន បើទោះបីជាបទល្មើសព្រហ្មទណ្ឌ ជារួមកើនឡើង ១៨% ប៉ុន្តែសកម្មភាពបង្ក្រាប មានកំរិតរហូតដល់ ៨២%។
ជាមួយគ្នានោះ លោកឧត្តមសេនីយ៍ស្នងការ បានជម្រុញបន្ថែមដល់នគរបាលជំនាញសន្តិសុខ និងជំនាញព្រហ្មទណ្ឌ ត្រូវច្បាមក្តាប់រាល់សភាពការណ៍ទាំងឡាយ ដែលកើតមាន នៅក្នុងភូមិសាស្ត្រខេត្ត ស៊ើបអង្កេត តាមដានស្រាវជ្រាវរកមុខសញ្ញាប្រព្រឹត្តបទល្មើសទាំងចាស់ ទាំងថ្មី ដែលកំពុងរត់គេចខ្លួន និងមុខសញ្ញា ដែលត្រូវបានដោះលែងចេញពីពន្ធនាគារ។ ចំពោះការិយាល័យប្រឆាំងការជួញដូរមនុស្ស និងការពារអនីតិជន សូមឲ្យលោកស្រី ជាស្នងការរង ត្រូវតម្លើងបញ្ជីឈ្មោះមុខសញ្ញាមេខ្យល់ ដែលបានបង្ក្រាបកន្លងមក និងមុខសញ្ញា ដែលនៅសេសសល់មិនទាន់បានបង្ក្រាប រួមទាំងមុខសញ្ញាជួញដូរផ្លូវភេទ ជាដើម។ ដោយឡែក ការបង្ក្រាបបទល្មើសគ្រឿងញៀនខុសច្បាប់ ត្រូវយកចិត្តទកដាក់ទាំងការទប់ស្កាត់ និងបង្ក្រាបទាំងការលួចនាំចូល ការជួញដូរ និងប្រើប្រាស់។
លោកឧត្តមសេនីយ៍ស្នងការ បានដាក់ចេញនូវផែនការដល់ថ្នាក់ដឹកនាំតាមបណ្តាគ្រប់ការិយាល័យជំនាញទាំងអស់ អធិការ ស្រុក ក្រុង និងគ្រប់មេបញ្ជាការវរសេនាតូច ការពារព្រំដែនគោក ត្រូវជំរុញដល់មន្ត្រីនគរបាល ក្រោមឱវាទបន្តយកចិត្តទុយកដាក់បំពេញភារកិច្ចរបស់ខ្លួន។ ជាងនេះទៀត គឺយើងត្រូវមានវិធានការបង្ការទប់ស្កាត់បទល្មើសឲ្យបានច្រើន កុំឲ្យកើតមានក្នុងមូលដ្ឋាន ឬភូមិសាស្ត្រខ្លួនគ្រប់គ្រង។ ប៉ុន្តែបើកើតមានត្រូវតែបង្ក្រាបឲ្យខាងតែបាន។
នាឱកាសនោះដែរ លោកឧត្តមសេនីយ៍ទោ សិទ្ធិ ឡោះ បានណែនាំដល់គ្រប់ថ្នាក់ដឹកនាំអង្គភាពនីមួយៗ ត្រូវតែគោរពឲ្យបានវិធានការរបស់ក្រសួងសុខាភិបាល និងវិធានការ ៣ការពារ ៣កុំ របស់រាជរដ្ឋាភិបាល ដើម្បីការពារខ្លួនយើង គ្រួសារយើង និងសហគមន៍យើង ជៀសផុតពីជំងឺកូវីដ-១៩៕ ណុប រក្សា
ចែករំលែកព័តមាននេះ