ខេត្តកំពង់ស្ពឺ ៖ បន្ទាប់ពីកោះសន្តិភាពចេញផ្សាយអំពីការទន្ទ្រានដីឧទ្យានជាតិគិរីរម្យ ពីសំណាក់ជនខិលខូច ប្រើរូបភាពទិញពី
ខេត្តកំពង់ស្ពឺ ៖ បន្ទាប់ពីកោះសន្តិភាពចេញផ្សាយអំពីការទន្ទ្រានដីឧទ្យានជាតិគិរីរម្យ ពីសំណាក់ជនខិលខូច ប្រើរូបភាពទិញពីប្រជាពលរដ្ឋ រួចមកធ្វើអោយមន្ត្រីឧទ្យានុរក្សស្ទុះស្ទាចុះទៅធ្វើការបង្ក្រាប ដោយដកបង្គោលរបងខ្សែលួសដុតកំទេចគ្មានសល់ បើទោះជាដឹងថាដីនោះជារបស់លោកធំណាក៏ដោយ។
យោងតាមប្រភពព័ត៌មានបានអោយដឹងថា ក្នុងចំណោមដីទាំងអស់ដែលត្រូវរំលោភយក បំរុងក្លែងឯកសារបំភ័ន្តភ្នែកថ្នាក់ដឹកនាំ មកធ្វើកម្មសិទ្ឋិនោះ ក៏មានដីលោកផ្កាយ២នៅក្រសួងមហាផ្ទៃម្នាក់ដែរ នៅគ្រាដែលរាជរដ្ឋាភិបាល ជាពិសេសក្រសួងបរិស្ថានប្រកាសរឹបអូសយកដីដែលពួកឈ្មួញ អ្នកមានលុយ មានអំណាចកាន់កាប់មិនស្របច្បាប់ នៅតំបន់ឧទ្យានជាតិ ឬតំបន់អភិរក្សនានានោះ នៅឯតំបន់ឧទ្យានជាតិព្រះកុសុមៈគិរីរម្យ មានសេចក្តីរាយការណ៍ថា លោកផ្កាយ២ម្នាក់ ឈ្មោះជា យោធិន ធ្វើការនៅក្រសួងមហាផ្ទៃបានទិញដីមិនស្របច្បាប់ និងលួចបន្ថែមនៅដីតំបន់ឧទ្យានជាតិគិរីរម្យខេត្តកំពង់ស្ពឺ ក្នុងទំហំជិត១០០០ហិកតា។
ភ្លាមៗនេះគេមិនអាចរកការឆ្លើយតបលោកផ្កាយពីរ ជា យោធិន បាននៅឡើយទេ ពាក់ព័ន្ធនឹងការចោទប្រកាន់ថា លោកបានទិញដីក្នុងទំហំជាង៨០០ហិកតា និងការលួចកាន់កាប់បន្ថែមដីតំបន់ឧទ្យានជាតិគីរីរម្យ។ តាមប្រភពព័ត៌មានបានបន្ថែមថា លោក ជា យោធិន បានញ៉ុះញ៉ង់ឃុបឃិតជាមួយបណ្ដាជនខិលខូចទាំងឡាយនាំគ្នាបោះបង្គោលព័ទ្ធរបងយកដីនៅតំបន់ឧទ្យានជាតិគិរីរម្យ ហើយបន្ទាប់មកលោកផ្កាយពីរបានប្រកាសថា លោកបានទិញដីដោយស្របច្បាប់ពីប្រជាពលរដ្ឋនៅតំបន់នោះ។
រឿងនេះមិនមែនរាជរដ្ឋាភិបាល ជាពិសេសអាជ្ញាធរតំបន់ឧទ្យានជាតិគិរីរម្យត្រូវយកដីនោះត្រឡប់មកវិញប៉ុណ្ណោះទេ ប៉ុន្តែត្រូវចាត់វិធានការតាមផ្លូវច្បាប់ថែមទៀតចំពោះបុគ្គល ជា យោធិន នេះ ពីព្រោះគាត់បានឃុបឃិតក្នុងការទិញដូរដីនៅតំបន់ឧទ្យានជាតិគិរីរម្យនេះ ។ ព័ត៌មានពិស្តារនឹងមានផ្សាយជូននៅលើទំព័រកាសែតកោះសន្តិភាព ៕
ចែករំលែកព័តមាននេះ