ខេត្តបន្ទាយមានជ័យ ៖ ជនសង្ស័យឆក់យ៉ាងសកម្មពេលរាត្រីចំនួន២នាក់អស់ល័ក្ខណ៍ ដោយត្រូវសមត្ថកិច្ចជំនាញនៃអធិការដ្ឋាននគរបាលក្រុងប៉ោយប៉ែតក្របួចជាប់ កាលពីយប់ថ្ងៃទី២៩ សីហា ក្រោយធ្វើសកម្មភាពឆក់អ្នកស្រុកត្រឹម១ថ្ងៃ ស្ថិតនៅភូមិក្បាលស្ពាន២ សង្កាត់ប៉ោយប៉ែត ខណៈបក្សពួកផ្សេងទៀតសមត្ថកិច្ចកំពុងស្រាវជ្រាវតាមរក…
ខេត្តបន្ទាយមានជ័យ ៖ ជនសង្ស័យឆក់យ៉ាងសកម្មពេលរាត្រីចំនួន២នាក់អស់ល័ក្ខណ៍ ដោយត្រូវសមត្ថកិច្ចជំនាញនៃអធិការដ្ឋាននគរបាលក្រុងប៉ោយប៉ែតក្របួចជាប់ កាលពីយប់ថ្ងៃទី២៩ សីហា ក្រោយធ្វើសកម្មភាពឆក់អ្នកស្រុកត្រឹម១ថ្ងៃ ស្ថិតនៅភូមិក្បាលស្ពាន២ សង្កាត់ប៉ោយប៉ែត ខណៈបក្សពួកផ្សេងទៀតសមត្ថកិច្ចកំពុងស្រាវជ្រាវតាមរក ។
ជនសង្ស័យទាំង២នាក់ រួមមាន១-ឈ្មោះសួរភាក់ ណា ហៅមេឃ ភេទប្រុស អាយុ២០ឆ្នាំ និង២-ឈ្មោះលី មករា ហៅម៉ាប់ ភេទប្រុស អាយុ១៧ឆ្នាំ ពួកគេទាំង២នាក់ស្នាក់នៅក្នុងភូមិក្បាលស្ពាន១ សង្កាត់ប៉ោយប៉ែត ។ នៅមុនឃាត់ខ្លួនជនសង្ស័យទាំង២ខាងលើ សមត្ថកិច្ចបានទទួលពាក្យបណ្តឹងពីនារីម្នាក់ឈ្មោះអូន ចន្ទ្រា អាយុ៣២ឆ្នាំ រស់នៅភូមិមិត្តភាព សង្កាត់ប៉ោយប៉ែតរាយការណ៍ថា កាលពីម៉ោង២០និង៤០នាទីយប់ថ្ងៃទី២៨ សីហា ២០២១ ពេលនាងកំពុងជិះម៉ូតូជាមួយគូដណ្តឹងតាមផ្លូវបេតុងមកពីទិសខាងលិច(ផ្លូវអេហ្វផ្លាស់) ។
លុះដល់ម្តុំមុខបុរីហ្គោដឡាក់ ក៏បានបត់ទៅទិសខាងត្បូងប្រហែល៣០ម៉ែត្រ ស្រាប់តែមានម៉ូតូម៉ាកសង់សេ១២៥ ពណ៌ខ្មៅមួយគ្រឿង មនុស្ស២នាក់ជិះពីក្រោយធ្វើសកម្មភាពឆក់កាបូបស្ពាយពីចំហៀងរបស់នាង រួចក្រុមជនសង្ស័យបន្ថែមល្បឿនជិះគេចទៅបាត់។ នារីរងគ្រោះអះអាងថា ក្នុងកាបូបដែលក្រុមជនសង្ស័យឆក់យកទៅនោះមានប្រាក់ថៃចំនួន៣០០០បាត,ប្រាក់ខ្មែរ៥ម៉ឺនរៀល,អត្តសញ្ញាណប័ន១សន្លឹក,ប័ណ្ណចាក់វ៉ាក់សាំង១សន្លឹក,ទូរស័ព្ទម៉ាកអាយហ្វូន៨ផ្លាស់ពណ៏ស១គ្រឿងនិងសម្ភារៈមួយចំនួនទៀត។
ដោយអនុវត្តន៍តាមបទបញ្ជាបង្ក្រាប និងទប់ស្កាត់រាល់បទល្មើសពីលោកឧត្តមសេនីយ៍ទោ ស្នងការនគរបាលខេត្ត និងមានការសម្របសម្រួលពីឯកឧត្តមព្រះរាជអាជ្ញានៃអយ្យការអមសាលាដំបូងខេត្តបន្ទាយមានជ័យ ក្រោយទទួលពាក្យបណ្តឹងពីនារីរងគ្រោះលោកវរសេនីយ៍ឯកសៅ សារឿន អធិការនគរបាលក្រុងប៉ោយប៉ែត បានដឹកនាំកម្លាំងជំនាញចុះស្រាវជ្រាវដល់កន្លែងកើតហេតុ។
បន្ទាប់ពីសមត្ថកិច្ចជំនាញ សហការឆែកកាមេរ៉ាសុវត្ថភាពរបស់អ្នកស្រុក ទើបកំណត់បានមុខសញ្ញាដែលជនរងគ្រោះដាក់ពាក្យបណ្តឹង។ នៅម៉ោង២២ និង៣០នាទីយប់ថ្ងៃទី២៩ ខែឆ្នាំដដែល ខណៈកម្លាំងជំនាញចុះល្បាតដល់មុខសណ្ឋាគារហាក់ ហួតក្នុងភូមិក្បាលស្ពាន១សង្កាត់ប៉ោយប៉ែត ក៏ប្រទះឃើញជនសង្ស័យជាមុខសញ្ញាទើបឃាត់យកទៅសាកសួរតែម្តង។
ជនសង្ស័យទី១(សួរភាក់ណាហៅមេឃ)សារភាពថា កាលពីយប់ថ្ងៃទី២៨ សីហា ខ្លួននិងបក្សពួកម្នាក់ទៀតឈ្មោះនិតភេទប្រុស
(គេចខ្លួន) ពិតជាបានធ្វើសកម្មភាពឆក់ទ្រព្យសម្បត្តិនារីរងគ្រោះខាងលើមែន ។ ដោយឡែក ជនសង្ស័យទី២ បដិសេធមិនបានធ្វើសកម្មភាពនៅយប់កើតហេតុទេ ប៉ុន្តែទទួលស្គាល់ថា កន្លងមក ធ្លាប់ធ្វើសកម្មភាពឆក់ទ្រព្យសម្បត្តិអ្នកស្រុកជាមួយជនសង្ស័យទី១និងបកក្សពួកមួយចំនួនទៀតជាច្រើនលើកនៅក្នុងភូមិសាស្ត្រក្រុងប៉ោយប៉ែត។ ជនសង្ស័យនិងម៉ូតូ១គ្រឿងម៉ាកសង់សេ១២៥ពណ៏ខ្មៅសេរីឆ្នាំ២០២០ដែលសមត្ថកិច្ចដកហូតក្រោយសាកសួរនិងធ្វើកំណត់ហេតុរួចសមត្ថកិច្ចបានធ្វើកាបញ្ជូនទៅស្នងការដ្ឋាននគរបាលខេត្ត ដើម្បីចាត់ការតាមនិតិវិធីច្បាប់៕
ចែករំលែកព័តមាននេះ