ខេត្តរតនគិរី ៖ ជនជាតិវៀតណាមម្នាក់ បានត្រូវប៉ូលិសក្រុងបានលុង ប្រគល់ទៅឱ្យប៉ូលិសខេត្តព្រៃវែង នៅព្រឹកថ្ងៃទី១១ ខែកញ្ញា ឆ្នាំ២០១០ បន្ទាប់ពីបានធ្វើការឃុំខ្លួននៅអធិការដ្ឋានក្រុង ក្រោយពីត្រូវចាប់ខ្លួនកាលពីថ្ងៃទី៩ ខែកញ្ញា ឆ្នាំ២០១០ នៅខាងកើតផ្សារបានលុង ស្ថិតក្នុងភូមិ១ សង្កាត់ឡាបានសៀក ក្រុងបានលុង នាវេលាម៉ោង១១និង៣០នាទីថ្ងៃត្រង់ ។ តាមសេចក្តីរាយការណ៍របស់ប៉ូលិសខេត្តព្រៃវែង និងដីកាបង្គាប់របស់តុលាការខេត្តព្រៃវែង ខណៈដែលជនសង្ស័យរូបនោះជាមួយនឹងបក្សពួកចំនួន៦នាក់ព្រួតគ្នាវាយប៉ូលិសប៉ុស្តិ៍រដ្ឋបាលឃុំព្រែកខ្សាយ”ខ” ស្រុកពាមរក៍ ខេត្តព្រៃវែង ដណ្តើមកាំភ្លើង AK បានមួយដើម ដើម្បីរំដោះបក្សពួកខ្លួនម្នាក់ពីដៃប៉ូលិសដែលត្រូវចាប់ខ្លួន ។
លោកម៉ា ប៊ុននុង អធិការរងទទួលបន្ទុកផ្នែកយុត្តិធម៌ក្រុងបានលុងបានឱ្យដឹងថា ជនសង្ស័យដែលត្រូវចាប់ខ្លួនប្រគល់ឱ្យប៉ូលិសខេត្តព្រៃវែងនោះឈ្មោះង្វៀង យាំងឌឿក ភេទប្រុស អាយុ៣២ឆ្នាំ ជាជនជាតិវៀតណាម រស់នៅភូមិ៦ ឃុំព្រែកខ្សាយ”ខ” ស្រុកពាមរក៍ ខេត្តព្រៃវែង ។ ជននេះត្រូវចាប់ខ្លួននៅភូមិ១ សង្កាត់ឡាបានសៀក ក្រុងបានលុង តាមសេចក្តីរាយការណ៍របស់ប៉ូលិសខេត្តព្រៃវែង និងបានប្រគល់ឱ្យប៉ូលិសខេត្តព្រៃវែងមកទទួលយក ដោយមានលោកធាង ឈុនលី នាយរងផ្នែកព្រហ្មទណ្ឌកំរិតធ្ងន់ខេត្តព្រៃវែង លោកអ៊ូ យ៉ាត ប្រធានផ្នែកព្រហ្មទណ្ឌស្រុកពាមរក៍ លោកស៊ិន ស៊ីហ៊ន នាយប៉ុស្តិ៍រដ្ឋបាលឃុំព្រែកខ្សាយ”ខ” និងលោកធុយ វណ្ណា មន្ត្រីប៉ុស្តិ៍ឃុំព្រែកខ្សាយ”ខ” ។
លោកស៊ិន ស៊ីហ៊ន នាយប៉ុស្តិ៍រដ្ឋបាលឃុំព្រែកខ្សាយ”ខ” បានឱ្យដឹងថា ជនសង្ស័យដែលត្រូវចាប់ខ្លួនទាំងអស់៦នាក់ ។ ដំបូងឡើយឈ្មោះង្វៀង យាំងហាន ភេទប្រុស អាយុ២៨ឆ្នាំ រស់នៅភូមិ៦ ឃុំព្រែកខ្សាយ”ខ” ស្រុកពាមរ ខេត្តព្រៃវែង ត្រូវកំលាំងប៉ូលិសប៉ុស្តិ៍ឃុំព្រែកខ្សាយ”ខ” បានចាប់ខ្លួនតាមដីកាចំនួនពីរទី១ លេខ៦៤០៣ ចុះថ្ងៃទី១៧ ឧសភា ឆ្នាំ២០០៣ ដោយលោកញៀណ សុវណ្ណ ចៅក្រមសាលាដំបូងខេត្តព្រៃវែង ។ ទី២ដីកាលេខ២១០ ចុះថ្ងៃទី២៣ ធ្នូ ឆ្នាំ២០០៣ ដោយលោកស្រី ស្វាយ ស៊ីសារុត ចៅក្រមសាលាដំបូងខេត្តព្រៃវែង ចោទពីបទប្លន់ចំនួនពីរករណី គឺប្លន់នៅភូមិឧត្តម ឃុំព្រែកខ្សាយ”ក” និងប្លន់នៅភូមិ៣ ព្រែកខ្សាយ”ខ” នេះដែរ ។ នៅពេលនាំជនសង្ស័យយកទៅឃុំខ្លូននៅថ្ងៃទី៧ កញ្ញា ឆ្នាំ២០១០ ស្រាប់តែឈ្មោះង្វៀង យាំងឌឿក និងបក្សពួក៤នាក់ទៀត ១-ឈ្មោះង្វឿង យាំងយូ អាយុ៣០ឆ្នាំ ទីលំនៅពុំពិតប្រាកដ ត្រូវបានចាប់ខ្លួននៅខេត្តព្រៃវែង ។ ២-ឈ្មោះង្វឿង យ៉អាំ អាយុ៣១ឆ្នាំ រស់នៅភូមិ៥ ឃុំព្រែកខ្សាយ”ខ” កំពុងរត់គេចខ្លួន ។ ៣-ឈ្មោះង្វៀង ធីណាំ ភេទស្រី អាយុ៣៣ឆ្នាំ រស់នៅភូមិ៥ ឃុំព្រែកខ្សាយ”ខ” កំពុងគេចខ្លួន និង៤-ពុំស្គាល់អត្តសញ្ញាណដែលអ្នកទាំង៤សុទ្ធសឹងជាជនជាតិវៀតណាម បានព្រួតគ្នាវាយប៉ូលិសរំដោះយកឈ្មោះង្វៀង យាំងហាន កាលពីថ្ងៃទី៧ កញ្ញា ឆ្នាំ២០១០ វេលាម៉ោង៤និង២០នាទី ស្ថិតក្នុងភូមិ៥ ឃុំព្រែកខ្សាយ”ខ” ខណៈដែលលោកស៊ីន ស៊ីហ៊ន និងលោកធុយ វណ្ណា កំពុងបណ្តើរជនសង្ស័យ ហើយដណ្តើមយកបានកាំភ្លើងAK47 ស្វាយបត់មួយដើមភ្ជង់គំរាមបាញ់ប៉ូលិស ប៉ុន្តែបាញ់មិនផ្ទុះ ។ បន្ទាប់មកអ្នកខ្លះរត់គេចខ្លួន និងអ្នកខ្លះត្រូវចាប់ខ្លួនបានវិញ ធ្វើឱ្យភ្ញាក់ផ្អើលពេញទីប្រជុំជនអ្នកលឿងត្រើយខាងកើត ។ ចំណែកជននេះបានរត់ទៅលាក់ខ្លួនដល់ខេត្តរតនគិរីហើយនៅតែចាប់ខ្លួនបានទៀត ៕
ចែករំលែកព័តមាននេះ