ខេត្តបន្ទាយមានជ័យ៖ រដ្ឋបាលខេត្តបន្ទាយមានជ័យ នៅថ្ងៃទី២៩ ខែសីហា ឆ្នាំ២០២១ បានចេញសេចក្តីសម្រេចដាច់ដោយឡែកពីគ្នា ចំនួន ២ សម្រេចបិទខ្ទប់ការចេញចូលជាបណ្តោះអាសន្ន នៅភូមិអូរបីជាន់…
ខេត្តបន្ទាយមានជ័យ៖ រដ្ឋបាលខេត្តបន្ទាយមានជ័យ នៅថ្ងៃទី២៩ ខែសីហា ឆ្នាំ២០២១ បានចេញសេចក្តីសម្រេចដាច់ដោយឡែកពីគ្នា ចំនួន ២ សម្រេចបិទខ្ទប់ការចេញចូលជាបណ្តោះអាសន្ន នៅភូមិអូរបីជាន់ ឃុំអូរបីជាន់ ស្រុកអូរជ្រៅ និងភូមិបន្ទាយថ្មី ឃុំអូរបីជាន់ ស្រុកអូរជ្រៅ។ វិធានការបិទខ្ទប់នេះ ដោយសារតែភូមិទាំង ២ ក្នុងឃុំអូរបីជាន់ ស្រុកអូរជ្រៅ ជាប់ព្រំដែនថៃ រកឃើញមានអ្នកឆ្លងកូវីដ១៩។
ដោយឡែក កាលពីថ្ងៃទី២៨ ខែសីហា ឆ្នាំ២០២១ អាជ្ញាធរក្រុងសិរីសោភ័ណ និងគ្រូពេទ្យ បានប្រមូលប្រជាពលរដ្ឋ ដែលបានប៉ះពាល់ផ្ទាល់ និងដោយប្រយោលនឹងអ្នកជំងឺកូវីដ១៩ ចំនួន ២៣៥នាក់ ក្នុងនោះ មានស្ត្រីចំនួន ១២៧នាក់ ដើម្បីពិនិត្យយកសំណាក រកមេរោគកូវីដ-១៩ ដោយធ្វើតេស្តរហ័ស( RAPID TEST )។
លោក ហ៊ឹល រ៉ាយ៉ា អភិបាលក្រុងសិរីសោភ័ណ បានឲ្យដឹងថា បន្ទាប់ពីមានបងប្អូនប្រជាពលរដ្ឋ នៅភូមិសែសិន (ម្តុំជិតក្បាលស្ពានសែសិន) សង្កាត់អូរអំបិល ក្រុងសិរីសោភ័ណ មានករណីឆ្លងជំងឺកូវីដ-១៩ អាជ្ញាធរក្រុង សមត្ថកិច្ច និងគ្រូពេទ្យបង្អែកក្រុងសិរីសោភ័ណ បានប្រមូលប្រជាពលរដ្ឋ ដែលបានប៉ះពាល់ផ្ទាល់ និងប្រយោលជាមួយអ្នកវិជ្ជមានកូវីដ-១៩ មកធ្វើតេស្តរហ័ស( RAPID TEST ) ដើម្បីរកមេរោគ កូវីដ-១៩ សរុបចំនួន ២៣៥នាក់ ក្នុងនោះ មានស្ត្រីចំនួន ១២៧នាក់។ ជាលទ្ធផល គឺរកឃើញអ្នកវិជ្ជមានចំនួន ៤៨នាក់ ក្នុងនោះ មានស្ត្រីចំនួន ២៦នាក់។
ក្នុងខណៈពេល ដែលអាជ្ញាធរ សមត្ថកិច្ច និងក្រុមគ្រូពេទ្យ កំពុងពិនិត្យយកសំណាកប្រជាពលរដ្ឋ នៅភូមិសែសិន កាលពីថ្ងៃទី២៨ ខែសីហា ឆ្នាំ២០២១ មានក្មេងទំនើង ២នាក់ បានបង្កការអុកឡុក នៅកន្លែងពិនិត្យ និងរកសំណាក តែត្រូវនគរបាលក្រុងសិរីសោភ័ណ បានចាប់ឃាត់ខ្លួន បញ្ជូនទៅអធិការដ្ឋាននគរបាលក្រុងសិរីសោភ័ណ ភ្លាមៗ៕ ណុប រក្សា
ចែករំលែកព័តមាននេះ