គន្លឹះខ្លះៗជំនួយដល់យុវជនក្នុងការគ្រប់គ្រងហិរញ្ញវត្ថុផ្ទាល់ខ្លួន !
រាជធានីភ្នំពេញ ៖ លោក ថន តុលា (ភីត ) ជាអ្នកជោគជ័យខ្លាំងក្នុងអាជីពរបស់លោក គាត់គឺជាអ្នកថតផ្សព្វផ្សាយពីយន្តហោះ សណ្ឋាគារ…
រាជធានីភ្នំពេញ ៖ លោក ថន តុលា (ភីត ) ជាអ្នកជោគជ័យខ្លាំងក្នុងអាជីពរបស់លោក គាត់គឺជាអ្នកថតផ្សព្វផ្សាយពីយន្តហោះ សណ្ឋាគារ…
រាជធានីភ្នំពេញ ៖ លោក ថន តុលា (ភីត ) ជាអ្នកជោគជ័យខ្លាំងក្នុងអាជីពរបស់លោក គាត់គឺជាអ្នកថតផ្សព្វផ្សាយពីយន្តហោះ សណ្ឋាគារ និងអាហារដ្ឋានល្បីៗ នៅក្នុងប្រទេសកម្ពុជា រួមទាំងនៅលើពិភពលោកផងដែរ ។ មិនតែប៉ុណ្ណោះ លោកក៏មានជំនួញ និងការងារឯងជនផងដែរ ។
ក្នុងវ័យ ២៦ ឆ្នាំ ទទួលបានបទពិសោធន៍ទេសចរណ៍ទៅក្រៅប្រទេសជាង ៥០ ។ លោក ភីត បានចែករំលែកការគ្រប់គ្រងហិរញ្ញវត្ថុផ្ទាល់ខ្លួនលោកថា ៖ «ការចាយវាយលុយកាក់ត្រូវតែមានការប្រយ័ត្នខ្ពស់ ការចាយវាយត្រូវចាយឱ្យត្រូវផ្លូវ ដើម្បីបង្កើតលុយមកវិញ និងទទួលបានចំណេះដឹងមកវិញផងដែរ ។ ដូចគ្រប់គ្នាបានដឹងហើយថា លុយពិតណាស់គឺពិបាករក ដូចនេះពេលយើងចាយ ត្រូវតែទទួលបានផលអ្វីមួយមកវិញ» ។
លោក ភីត បានចែករំលែកគន្លឹះទាំង ៦ ដើម្បីជាជំនួយដល់ស្មារតីរបស់យុវជន ក្នុងការសន្សំប្រាក់ ៖
១. ចំណាយទៅលើរបស់ដែលចាំបាច់ និងត្រឹមត្រូវ ៖ ការទិញខោអាវ ស្បែកជើង ។ល។ សុទ្ធតែគ្រប់គ្នាត្រូវពាក់ តែសួរថា បើអ្នកទិញស្បែកជើងមួយគូតម្លៃ ១០ ដុល្លារ តែពាក់បានតែ ៦ ខែ ទៅមួយឆ្នាំ ចឹងអ្នកគួរទិញស្បែកជើងតម្លៃ ៣០ ដុល្លារ ហើយពាក់បាន ៥ ឆ្នាំ ដូចនេះអ្នកគួរថ្លឹងថ្លែងដែរ ។ របស់ថ្លៃតែពាក់បានយូរ នោះយើងគួរតែចំណាយ ។
២. ចំណាយប្រចាំថ្ងៃដែលផ្តល់សុខភាព ៖ ចំពោះអាហាររបស់អ្នក គួរជ្រើសរើសចំណីអាហារឱ្យបានត្រឹមត្រូវចៀសវាងធ្វើឱ្យខូចសុខភាព ហើយអស់លុយទៀត ។ ហើយប្រសិនជាអាហារដែលយើងអាចធ្វើខ្លួនឯងបាននោះវារឹតតែចំណេញ ទាំងថវិកា និងសុខភាព ។ មានន័យថា អ្នកគួរជ្រើសរើសរបបអាហារឱ្យបានត្រឹមត្រូវ (អ្នកអាចរកមើលរបបអាហារទាំងនោះបានតាមអ៊ិនធើណេត គេតែងតែប្រាប់) ។
៣. ការចំណាយទៅលើការជួបជុំ ៖ ឧទាហរណ៍យើងចូលចិត្តកាហ្វេ ដូចចេះប្រសិនបើយើងញុំាកាហ្វេរាល់ថ្ងៃ អ្នកគួរជ្រើសរើសហាងល្មម មើលទៅទំនើបដែរ តែមិនថ្លៃដូចប្រ៊េនគេល្បីៗ នោះវាកាត់បន្ថយការចំណាយខ្លះ ប៉ុន្តែប្រសិនជាយើងមានការជួបជុំយូរៗម្តង និងពិភាក្សាការងារអ្នកគួរជ្រើសរើសហាងប្រ៊េនៗខ្លះ ។
៤. ការសន្សំទៅលើហេតុការណ៍អ្វីមួយដែលមើលមិនឃើញ ៖ ជាការពិតហេតុការណ៍អ្វីមួយក្នុងពេលអនាគត ឬនៅថ្ងៃស្អែក យើងមើលមិនឃើញនោះទេ អ្វីដែលសំខាន់អ្នកត្រូវតែមានការសន្សំប្រាក់ទុកសម្រាប់គ្រាមានអាសន្ន ហើយលុយនោះមិនអាចយកចាយផ្តេសផ្តាស់បានទេ ទាល់តែយើងមានការចាំបាច់ខ្លាំងឬទាក់ទងសុខភាព ទើបយើងអាចប្រើប្រាស់វាបាន ។ អ្នកគួរសន្សំ ១៥ ទៅ ២០% នៃប្រាក់ចំណូលរបស់អ្នក ។
៥. សន្សំសម្រាប់វិនិយោគលើចំណេះដឹង ឬអ្វីមួយដែលបង្កើតលុយមកវិញ ៖ ខ្ញុំតែងតែទុកដាក់លុយចំនួន ដើម្បីវិនិយោគលើមនុស្ស អចលទ្រព្យ ទីផ្សារភាគហ៊ុន និងការធ្វើអាជីវកម្ម ។ ទៅលើមនុស្សមានន័យថា ប្រសិនបើគេជាមនុស្សតំរង់ទិស ជាអ្នកចេះដឹងបង្ហាញផ្លូវយើង យើងគួរចាយលុយលើពួកគាត់ ។ លើអចលទ្រព្យមានន័យថា សន្សំទុកពេលណាយើងមើលឃើញឱកាស អាចទិញផ្ទះ ឬដី ព្រោះទាំងនេះវានឹងបង្កើតលុយមកវិញ ។ សម្រាប់អាជីវកម្មវិញមានន័យថា យើងសន្សំទុកប្រសិនបើយើងឃើញឱកាសជាមួយមនុស្សដែលយើងទុកចិត្តហើយ នោះយើងអាចយកលុយរបស់យើងទៅបណ្តាក់ទុនជាមួយពួកគេ ។
៦. សន្សំសម្រាប់ដំណើរកម្សាន្ត ដែលផ្តល់ចំណេះដឹង ៖ ប្រសិនបើយើងយកលុយទៅទិញឡានទំនើប ទូរស័ព្ទទំនើបៗ ទាំងដែលយើងមានប្រើហើយ (ដូរសេរ៊ីថ្មីរហូត ដើម្បីបង្អួតគេ) អ្នកគួរគិតគូរទៅលើការធ្វើដំណើរកម្សាន្តនៅក្រៅប្រទេស (មិនសំដៅលើស្ថានភាពបច្ចុប្បន្ន) ព្រោះការដើរលេងក្រៅប្រទេសអ្នកអាចរៀនច្រើនពីប្រទេសគេ ទាំងការងារ បទពិសោធន៍ ការលក់ដូរ និងអាជីវកម្មនានា ដែលយើងមិនធ្លាប់បានឃើញ ។ ទាំងនេះសុទ្ធតែចំណាយទៅលើចំណេះដឹងទូទៅ ៕
ចែករំលែកព័តមាននេះ