សារព័ត៌មានបរទេស កាលពីថ្ងៃទី១៩ មករា ២០១៦ ផ្សាយថា ក្រសួងសុខាភិបាល ការងារ និងសង្គមកិច្ចជប៉ុនប្រកាសថា លោកតាយ៉ាស៊ូថារ៉ូ កូអីុដេ ម្ចាស់ឯតទគ្គកម្មអាយុវែងបំផុតនៅលើពិភពលោក បានស្លាប់ក្រុងវ័យ១១២ឆ្នាំ យ៉ាងស្ងប់ស្ងាត់ កាលពីថ្ងៃទី១៩ មករា នៅមន្ទីរពេទ្យមួយក្នុងខេត្តណាហ្គេយ៉ា ។
លោកតាកូអីុដេ កើតនៅខេត្តហ៊្វូគូអីុ បានទទួលតំណែងជាបុរសអាយុវែងបំផុតនៅលើពីភពលោកក្នុងសៀវភៅ «Guinness Book of World Record» កាលពីខៃសីហា ២០១៥ ក្រោយពីម្ចាស់ឯតទគ្គកម្មចាស់គឺលោកតាម៉ាសាមីតស៊ូ ហ៉ូស៊ីដា ជនជាតិជប៉ុន ស្លាប់ក្នុងវ័យ១១១ឆ្នាំ ។
លោកតាកូអីុដេ ដែលចាប់កំណើតនៅថ្ងៃទី១៣ មីនា ១៩០៣ មានមុខរបរជាជាងកាត់ដេរ មានកូន៧នាក់ ចៅ៩នាក់ និងចៅទួត១នាក់ បានបង្ហាញពីអាថ៌កំបាំងដែលធ្វើឱ្យគាត់មានអាយុវែងថា ត្រូវជៀងវាងលើកវត្ថុធ្ងន់លើសកម្លាំង ប៉ុន្ដែគួរមានសេចក្ដីសុខក្នុងខ្សែជិវិត ។
បុរសចំណាស់រូបនោះ បញ្ជាក់ថាគាត់មិនផឹកស្រា និងជក់បារីទេ ។
បច្ចុប្បន្នប្រទេសជប៉ុនមានការអភិវឌ្ឍខ្ពស់ តែសំបូរដោយពលរដ្ឋវ័យចំណាស់ ។ អត្រានៃពលរដ្ឋមានអាយុពី៦៥ឆ្នាំឡើង ប្រហែល២៥% នៃពលរដ្ឋសរុបនៅទូទាំងប្រទេស ដែលមានប្រហែល១២៧លាននាក់ ។ សម្រាប់ម្ចាស់ឯតទគ្គកម្មអាយុវែងបំផុតនៅលើពិភពលោកក្នុងពេលបច្ចុប្បន្ន គឺលោកយាយស៊ូសានណា មូសាតចូន ជនជាតិអាមេរិករស់នៅរដ្ឋអាឡាបាម៉ា និងកើតនៅថ្ងៃទី៦ កក្កដា ១៩០០ ៕
ម៉ុក សេង
ចែករំលែកព័តមាននេះ