ខេត្តកំពង់ឆ្នាំង ៖ ករណីមានអគ្គិភ័យមួយ បានកើតឡើងបណ្តាលឲ្យឆេះផ្ទះ ០១ខ្នង និងស្លា.ប់ក្មេងប្រុសស្រីទាំង២នាក់បងប្អូន ពេលដែលជីដូនចាក់សោ ចេញទៅផ្សារនោះ គឺមូលហេតុ បណ្តាលមកពីឆ្លងចរន្តអគ្គិសនី…
ខេត្តកំពង់ឆ្នាំង ៖ ករណីមានអគ្គិភ័យមួយ បានកើតឡើងបណ្តាលឲ្យឆេះផ្ទះ ០១ខ្នង និងស្លា.ប់ក្មេងប្រុសស្រីទាំង២នាក់បងប្អូន ពេលដែលជីដូនចាក់សោ ចេញទៅផ្សារនោះ គឺមូលហេតុ បណ្តាលមកពីឆ្លងចរន្តអគ្គិសនី នេះបើយោងតាមមន្ត្រីនាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។
ហេតុការណ៏គ្រោះអគ្គិភ័យនេះ បានកើតឡើងនៅវេលាម៉ោង៩និង១៦នាទីព្រឹកថ្ងៃទី១៦ ខែសីហា ឆ្នាំ២០២១ ស្ថិតនៅភូមិពោធិ៍រិទ្ធិក្រៃ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង ។
អគ្គិភ័យនេះ បណ្តាលឲ្យឆេះផ្ទះចំនួន ០១ខ្នង ទំហំ ១២គុណ ០៥ម៉ែត្រ បណ្តាលឲ្យក្មេងចំនួន ០២នាក់បានស្លាប់ រួមមានទី១. ឈ្មោះ នឿន ចិត្រា ភេទប្រុស អាយុ១០ឆ្នាំ និងទី២. ឈ្មោះ នឿន ចិន្តា ភេទស្រី អាយុ ០៧ឆ្នាំ ។ ក្មេងរងគ្រោះទាំង២នាក់ ត្រូវជាបងប្អូននឹងគ្នា មានឪពុកឈ្មោះ អ៊ូ ចាន់នឿន និងម្ដាយឈ្មោះ សួន សំអូន មានទីលំនៅភូមិពោធិក្រៃ ឃុំស្វាយ ស្រុកសាមគ្គីមានជ័យ ។
យោងតាមរបាយការណ៍របស់លោក សេង ចិន្តា អធិការស្រុកសាមគ្គីមានជ័យ បានឲ្យដឹងថា មុនពេលកើតហេតុ ឪពុកម្ដាយកុមាររងគ្រោះទាំង២នាក់មិននៅផ្ទះនោះទេ គឺចេញទៅធ្វើការបាត់ ដោយទុកកូនប្រុសស្រីចំនួន៣នាក់ ឱ្យជីតាជាអ្នកមើលថែ ។ ហើយនៅព្រឹកថ្ងៃកើតហេតុនោះ ដោយសារតែខ្លាចចៅៗចេញក្រៅទៅលេងទឹក អាចបណ្ដាលឲ្យលង់ទឹកនោះ ទើបពេលដែលជីតាទៅផ្សារ ក៏យកចៅទៅតាមម្នាក់ ដោយទុកចៅ២នាក់ទៀតនៅផ្ទះ និងបានខ្ទាស់ទ្វារចាក់សោពីខាងក្រៅ រួចក៏ទៅផ្សារបាត់ទៅ ។
ប៉ុន្តែជាចៃដន្យអាក្រក់ ពេលឪពុកម្តាយចេញទៅធ្វើការបាត់ និងជីតាមិននៅផ្ទះ ស្រាប់ឆ្លងចរន្តអគ្គិសនី ទុស្សេខ្សែភ្លើង បណ្ដាលឲ្យកើតមានអគ្គិភ័យ ឆាបឆេះសម្ភារប្រើប្រាស់ខាងក្នុងផ្ទះ ធ្វើឲ្យកុមារទាំងពីរនាក់ចេញពុំរួច ព្រោះជាប់សោពីខាងក្រៅ ក៏ត្រូវឆេះស្លា.ប់ក្នុងភ្នក់ភ្លើង យ៉ាងអាណោចអាធ័មជាទីបំផុត ។
ខណៈដែលកំពុងតែមានអគ្គិភ័យនោះផងដែរ រថយន្តពន្លត់អគ្គិភ័យបានទៅជួយបាញ់ទឹកពន្លត់ និងមានអ្នកភូមិខ្លះព្យាយាមឡើងពីខាងលើ រួចចុះទៅជួយកុមារទាំងពីរនាក់ដែរ ប៉ុន្តែមិនអាចជួយសង្គ្រោះបានឡើយ ព្រោះថាពួកគេបានឆេះខ្លោចបាត់អស់ទៅហើយ នេះហើយជាមេរៀនសម្រាបអាណាព្យាបាលគ្រប់រូប។
សូមបញ្ជាក់ថា ផ្ទះខាងលើ ទើបនឹងធ្វើ ប៉ុន្តែមិនទាន់ហើយនោះទេ ដោយធ្វើអំពីថ្ម មានទំហំ១២ គុណនឹង៥ម៉ែត្រ មានកម្ពស់ ២ជាន់ ។ ទោះបីយ៉ាងណានេះក្តី ករណីអគ្គិភ័យនេះ សមត្ថកិច្ចជំនាញនៅបន្តស្រាវជ្រាវ បន្ថែមទៀត ៕
ចែករំលែកព័តមាននេះ