ពលករទាំងអស់ដែលអនុញ្ញាតចូលស្រុកកំណើតវិញ ត្រូវចុះឈ្មោះនិងយកសំណាកតេស្ដរហ័ស
ខេត្តបាត់ដំបង ៖ មានការទទួលស្វាគមន៍ពីលោក ងួន រតនៈ អភិបាល នៃគណៈអភិបាលខេត្តបាត់ដំបង បានដឹកនាំគណៈប្រតិភូរួមមាន លោកឧត្តមសេនីយ៍ទោសាត គឹមសាន…
ខេត្តបាត់ដំបង ៖ មានការទទួលស្វាគមន៍ពីលោក ងួន រតនៈ អភិបាល នៃគណៈអភិបាលខេត្តបាត់ដំបង បានដឹកនាំគណៈប្រតិភូរួមមាន លោកឧត្តមសេនីយ៍ទោសាត គឹមសាន ស្នងការនគរបាលខេត្តបាត់ដំបង ព្រមទាំងអភិបាលរងនៃគណៈអភិបាលខេត្ត ព្រមទាំងលោកប្រធានមន្ទីរ អង្គភាពជុំវិញខេត្ត បានអញ្ជើញជួបសំណេះសំណាល និងចាំទទួលពលករត្រឡប់មកពីប្រទេសថៃជិត៤០០នាក់ នៅច្រកទ្វារតំបន់ព្រំដែនកម្ពុជា ថៃ សួន ស៊ុំ (អូរអន្លក់) នៃស្រុកកំរៀង និងច្រករបៀង តាមបណ្ដោយព្រំដែនកម្ពុជា ថៃ នៃស្រុកសំពៅលូន ដែលជាប់គាំងនៅក្នុងប្រទេសថៃ ។
ក្នុងអំឡុងពេលដែលប្រទេសកម្ពុជា មានវិធានការបិទខ្ទប់ខេត្តជាប់ព្រំដែន ជាពិសេស ខេត្តបាត់ដំបងរយៈពេល១៤ ថ្ងៃ ក្នុងន័យដើម្បីធ្វើការប្រយុទ្ធប្រឆាំងនឹងការឆ្លងរាលដាលក្នុងសហគមន៍នៃវីរុសកូវីដ-១៩ បំលែងថ្មីប្រភេទដែលតា(Delta) ដែលបានបញ្ចប់នៅម៉ោង២៣ និង៥៩នាទី ថ្ងៃទី១២ ខែសីហា ឆ្នាំ២០២១ ។
អ្នកនាំពាក្យសាលាខេត្តបានបញ្ជាក់ថា សម្រាប់ពលករដែលជាប់គាំងនោះ ដែលបានវិលត្រឡប់មកវិញមានចំនួន ៣៩៩នាក់ ដោយមកពី២ច្រកផ្សេងគ្នា ក្នុងនោះ មកពីច្រកទ្វារតំបន់ព្រំដែន សួន ស៊ុំ (អូរអន្លក់) នៃស្រុកកំរៀង ចំនួន២៨៧នាក់ និងមួយច្រកទៀតមកពីតំបន់ច្រករបៀង ដែលនៅតាមបណ្ដោយព្រំដែនកម្ពុជា ថៃ ស្ថិតក្នុងស្រុកសំពៅលូន ចំនួន១១២នាក់ ហើយ សម្រាប់ពលករទាំងអស់ ដែលអនុញ្ញាតចូលមកស្រុកកំណើតវិញ ត្រូវបានរៀបចំចុះឈ្មោះ និងយកសំណាកតេស្ដរហ័ស ក្នុងករណីមានលទ្ធផលវិជ្ជមាន ក្រុមការងារនឹងរៀបចំដាក់គាត់ព្យាបាលនៅតាមណ្ឌលព្យាបាលព្រំដែន ដែលអជ្ញាធរបានរៀបចំ ។ ចំណែកអ្នកលទ្ធផលអវិជ្ជមាន នឹងដឹកជញ្ជូនពួកគាត់ធ្វើចត្តាឡីស័ក នៅមណ្ឌលចត្តាឡីស័ក ដែលនៅតាមបណ្ដោយព្រំដែនចំនួន១៤ថ្ងៃទៀត មុននឹងធ្វើការដឹកជញ្ជូនពួកគាត់ទៅបណ្ដាស្រុក ឬខេត្តកំណើតរៀងៗខ្លួន ។
នៅក្នុងការបើកឱ្យដំណើរការព្រំដែនឡើងវិញនេះ កងកម្លាំងយោធពលខេមរភូមិន្ទ បានយករថយន្តដែលជាអំណោយរបស់សម្តេចនាយករដ្ឋមន្ត្រី ដឹកពលករដែលកំពុងជាប់គាំងនៅព្រំដែនក្នុងទឹកដីថៃ ប្រមាណជិត៤០០នាក់ ចូលមកក្នុងប្រទេកម្ពុជាវិញ ដើម្បីបញ្ជូនពួកគាត់ទៅព្យាបាលជំងឺ និងធ្វើចត្តាឡីស័កនៅតាមមណ្ឌលចត្តាឡីស័ក តាមខ្សែបន្ទាត់ព្រំដែននៃខេត្តបាត់ដំបងផងដែរ ៕
ចែករំលែកព័តមាននេះ