ខេត្តមណ្ឌលគិរី ៖ សម្ល «បុក ឬប៉ូង» របស់ជនជាតិដើមភាគតិចរស់នៅតំបន់ខ្ពង់រាបនាភាគឦសានជាម្ហូបអាហារដ៏ពេញនិយមសម្រាប់ប្រជាជនក្នុងតំបន់ ហើយមិនតែប៉ុណ្ណោះ វាកំពុងទាក់ទាញការចាប់អារម្មណ៍
ខេត្តមណ្ឌលគិរី ៖ សម្ល «បុក ឬប៉ូង» របស់ជនជាតិដើមភាគតិចរស់នៅតំបន់ខ្ពង់រាបនាភាគឦសានជាម្ហូបអាហារដ៏ពេញនិយមសម្រាប់ប្រជាជនក្នុងតំបន់ ហើយមិនតែប៉ុណ្ណោះ វាកំពុងទាក់ទាញការចាប់អារម្មណ៍ពីអ្នកទេសចរខ្លាំងផងដែរ ។
បុរសឈ្មោះផល្លា មានទីលំនៅក្នុងក្រុងសែនមនោរម្យ ឲ្យដឹងកាលពីពេល ថ្មីៗកន្លងមកថា គាត់បានទៅរស់នៅខេត្តមណ្ឌលគិរី ជាង២០ឆ្នាំហើយ តាំងពីមិនទាន់មានផ្លូវធ្វើដំណើរស្រួលដូចសព្វថ្ងៃឡើយ ។ គាត់ចេះធ្វើម្ហូប «សម្លបុកឬប៉ូង» យ៉ាងស្ទាត់ជំនាញ ព្រោះមុខម្ហូបនេះសម្បូរទៅដោយវីតាមីន ដោយសារគេប្រើសុទ្ធសឹងបន្លែបេះពីព្រៃធម្មជាតិ ថ្មីៗ ។
គ្រឿងផ្សំសម្រាប់សម្លបុក ឬប៉ូង រួមមាន សាច់យាវគោ (សាច់ស្វិត ឬសាច់ប្រភេទងៀតក៏បាន) ប្រហុក ចុងផ្តៅ ស្លឹកម្ទេស ត្រប់ស្រួយ ស្លឹកខ្ចូញ ស្លឹកជន្លង់ ទំពាំង និងស្លឹករុក្ខជាតិបៃតងមួយចំនួនទៀត ។ អ្វីដែលគេមិនអាចអត់បាននោះ គឺបំពង់ឫស្សីព្រៃ ។ ឫស្សីព្រៃត្រូវរកឫស្សីដើមណាដែលមានសាច់វែង(ថ្នាំងវែង)ធំ ទើបអាចស្លបាន និងជួយបង្កើនរសជាតិផង ។
ចំពោះរបៀបនៃការស្ល គឺគេត្រូវបេះបន្លែទាំងនោះលាងទឹកឲ្យស្អាត ហាន់សាច់ជាបន្ទះតូចៗចិញ្ច្រាំប្រហុកឲ្យម៉ដ្ឋ លាយគ្រឿងស្ករស និងប៊ីចេងបន្តិចចូលគ្នាក្នុងឆ្នាំងតែមួយ រួចញាត់គ្រឿងផ្សំទាំងនោះចូលទៅក្នុងបំពង់ឫស្សីដែលគេត្រៀមទុក និងយកទៅដុតក្នុងភ្លើងប្រមាណជិត១ម៉ោងជាការស្រេច ។
សម្ល «បុកឬប៉ូង» គេសង្កេតឃើញអ្នកទេសចរបរទេសចូលចិត្តឲ្យមគ្គុទេ្ទសទេសចរដែលនាំពួកគេដើរលេងកម្សាន្តក្នុងព្រៃ ស្លឲ្យហូបនៅតាមមាត់អូរក្នុងព្រៃ និងកន្លែងដែលសម្បូរបន្លែធម្មជាតិ ៕
ចែករំលែកព័តមាននេះ