បន្ទាយមានជ័យ៖ ដើម្បីភូមិឃុំ និងសង្កាត់ មានសុវត្ថិភាព សមត្ថកិច្ចជំនាញផ្នែកបង្ក្រាបគ្រឿងញៀននៃអធិការដ្ឋាននគរបាលក្រុងប៉ោយប៉ែត សហការជាមួយនគរបាលប៉ុស្តិ៍រដ្ឋបាលសង្កាត់និមិត្ត អាជ្ញាធរមូលដ្ឋាន បានធ្វើការបង្ក្រាបគ្រឿងញៀនឃាត់ខ្លួនជនសង្ស័យ ៣នាក់ ជាមួយថ្នាំញៀនមួយចំនួន រួមទាំងអាវុធកែច្នៃផងដែរ។ ករណីនេះ កើតឡើង នៅភូមិដុងអារញ្ញ សង្កាត់និមិត្ត ក្រុងប៉ោយប៉ែត កាលពីថ្ងៃទី១១ ខែសីហា ឆ្នាំ២០២១។
ជនសង្ស័យ ក្នុងករណីបង្ក្រាបជាក់ស្តែងនេះ រួមមាន ១.ឈ្មោះ ភិន ចាន់រ៉ា ភេទប្រុស អាយុ ១៦ឆ្នាំ មានទីលំនៅក្នុងភូមិកើតហេតុ (ជួញដូរ) ២.ឈ្មោះ ហេង ចំណង់ ភេទប្រុស ហៅ អេវ អាយុ ២៧ឆ្នាំ មានទីលំនៅក្នុងភូមិកើតហេតុ (ជួញដូរ) និង៣.ឈ្មោះ ហ៊ាង សុខហឿន ភេទប្រុស អាយុ ៣៦ឆ្នាំ មានទីលំនៅភូមិនិមិត្ត៣ សង្កាត់និមិត្ត (ប្រើប្រាស់)។
សមត្ថកិច្ចជំនាញ ប្រាប់ថា ករណីបង្ក្រាបនេះ ធ្វើឡើង ២លើក ក្នុងថ្ងៃតែមួយ ដោយលើកទី១ សមត្ថកិច្ចឃាត់ខ្លួនជនសង្ស័យទី១ និងទី៣ ដកហូតបានម្សៅក្រាម ពណ៌សថ្លា (សង្ស័យសារធាតុញឿន) ចំនួន ៣កូនថង់តូច បំពង់កែវ១ បំពង់ចូកគ្រឿងញៀន១។
ដោយផ្តល់នូវការសហការល្អពីជនសង្ស័យទាំង ២នាក់ ខាងលើ សមត្ថកិច្ច ក៏ឈានទៅឃាត់ខ្លួនជនសង្ស័យម្នាក់ទៀត គឺឈ្មោះ ហេង ចំណង់ ហៅអេវ ដោយដកហូតបានកាំភ្លើងកែច្នៃប៊ិច ១ដើម គ្រាប់ចំនួន ២គ្រាប់ (គ្រាប់ AK ១គ្រាប់) ម្សៅក្រាមពណ៌សថ្លា (សង្ស័យសារធាតុគ្រឿងញៀន) ចំនួន ៣កូនថង់តូច កាំបិត ៤ដើម ម្សៅម៉ត់ សលាយជាមួយកំទេចថ្នាំពណ៌ផ្កាឈូក ១កូនថង់តូច ដងកាំភ្លើងស្នប់កែច្នៃ ៣ដើម និងសំបកថង់វេចខ្ចប់គ្រឿងញៀនមួយចំនួន។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត ប្រាប់ថា អនុវត្តន៍តាមបទបញ្ជាដ៏ម៉ឺងម៉ាត់របស់លោកឧត្តសេនីយ៍ទោ សិទ្ធ ឡោះ ស្នងការនគរបាលខេត្ត លោកបានឲ្យជំនាញ យកជនសង្ស័យទាំង ៣នាក់ ទៅធ្វើសំណាកបឋម រកកូវីដ១៩ តែលទ្ធផលអវិជ្ជមាន។ ប៉ុន្តែជនទាំង ៣នេះ វិជ្ជមានសារធាតុញៀន ពេលធ្វើតេស្តទឹកនោមពួកគេ។
លោកអធិការ បញ្ជាក់ថា ជនសង្ស័យ និងវត្ថុតាង ក្រោយសាកសួរ និងធ្វើកំណត់ហេតុរួច ត្រូវបញ្ជូនទៅការិយាល័យជំនាញនៃស្នងការដ្ឋាននគរបាលខេត្ត ដើម្បីចាត់ការបន្ត តាមនីតិវិធីច្បាប់៕ មុត សារុន
ចែករំលែកព័តមាននេះ