ខេត្តកំពង់ស្ពឺ ៖ តារាចម្រៀងនិងជាអ្នកសម្តែងក្រមិចក្រមើមមួយរូប ដែលមានឈ្មោះបោះសំឡេងគ្រាន់បើ នៅក្នុងសង្គមសិល្បៈ គឺលោក វណ្ណ មករា អាយុ៣២ឆ្នាំ ពេលនេះបានលាចាកលោកទៅហើយ បន្ទាប់ពីជួបគ្រោះថ្នាក់ក្រឡាប់រថយន្តម្តងហើយម្តងទៀត កាលពីវេលាម៉ោង៥និង៣០នាទី ព្រឹកថ្ងៃទី១០ មករា តាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ៩២ និងលេខ៩៣ ស្ថិតក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
ប្រភពព័ត៌មានបានបញ្ជាក់ថា រថយន្តសង្គ្រោះម៉ាកហ៊ីយ៉ាន់ដាយ ពណ៌ទឹកមាស ពាក់ស្លាកលេខភ្នំពេញ 2K-4208 បានដឹកលោកដែលមានរបួសក្រឡាប់រថយន្តនៅលើកំណាត់ផ្លូវជាតិលេខ៤ ក្នុងភូមិសាស្ត្រស្រុកព្រៃនប់ យកទៅសង្គ្រោះនៅឯរាជធានីភ្នំពេញ តែជាអកុសលរថយន្តសង្គ្រោះនោះ ក៏ជួបឧប្បត្តិហេតុក្រឡាប់ទៀត បណ្តាលឱ្យលោកស្លាប់តែម្តង ។
ប្រភពពីសមត្ថកិច្ច បានឱ្យដឹងថា ដំបូងគឺលោករងគ្រោះដោយក្រឡាប់រថយន្តផ្ទាល់ខ្លួនរបស់លោក គឺម៉ាកព្រូស ស៊េរី២០១៤ នៅក្បែរផ្សារព្រៃនប់ ក្នុងភូមិព្រៃនប់ ឃុំព្រៃនប់ ខណ្ឌព្រៃនប់ ខេត្តព្រះសីហនុ ចន្លោះគីឡូម៉ែត្រលេខ១៩០-១៩១ ។ ក្រោយពេលគ្រោះថ្នាក់ចរាចរណ៍នៅខេត្តព្រះសីហនុនោះ ក្រុមគ្រួសារនិងមិត្តភក្តិ៣នាក់ផ្សេងទៀតដែលជិះរថយន្តនោះជាមួយគ្នា មិនមានរងរបួសទេ បានហៅរថយន្តពេទ្យឯកជនឱ្យដឹកលោក វណ្ណ មករា ទៅសង្គ្រោះឯមន្ទីរពេទ្យឯកជននៅរាជធានីភ្នំពេញ ដោយមានអ្នករួមដំណើរ៣នាក់ និងអ្នកបើករថយន្តសង្គ្រោះម្នាក់ផង ក្នុងនោះមាន ឈ្មោះ ជឹម រាជ ភេទប្រុស អាយុ២៣ឆ្នាំ ឈ្មោះ ប្រាក់ គង់ ភេទប្រុស អាយុ២៤ឆ្នាំ ឈ្មោះ ប៊ុត ដារា ភេទប្រុស អាយុ៥៥ឆ្នាំ ជាអ្នកបើកបររថយន្តសង្គ្រោះនោះ និងឈ្មោះ អ៊ូ សុជាតា ភេទស្រី អាយុ២៥ឆ្នាំ ។
ពេលកំពុងដឹកតាមរថយន្តសង្គ្រោះ ក្នុងដំណើរឆ្ពោះមកមន្ទីរពេទ្យឯរាជធានីភ្នំពេញនោះ លោក វណ្ណ មករា ដែលរបួសនៅនិយាយបាន ត្រូវបានបញ្ចូលខ្យល់អុកសុីហ្សែនផងដែរ ។ លុះពេលរថយន្តសង្គ្រោះដឹករូបលោក មកដល់កន្លែងកើតហេតុ ស្រាប់តែរថយន្តសង្គ្រោះបន្ទាន់នោះ បែកកង់មុខប៉ែកខាងឆ្វេង បណ្តាលឱ្យរេចង្កូតក្រឡាប់រថយន្ត ធ្វើឱ្យអ្នកជិះក្នុងរថយន្តទាំងអស់របួសធ្ងន់-ស្រាលគ្រប់គ្នា ។ ដោយឡែក លោក វណ្ណ មករា ដែលកំពុងតែរងរបួសនិងបញ្ចូលខ្យល់អុកស៊ីហ្សែនស្រាប់ផងនោះ បានកៀបជាប់ក្នុងរថយន្ត ដាច់ខ្យល់ស្លាប់តែម្តង ។
ដំណឹងដ៏អកុសលនេះបានបង្កឲ្យសង្គមសិល្បៈ និងសាធារណជនដែលស្គាល់តារាចម្រៀងរូបនេះ មានភាពតក់ស្លុត ហើយសម្តែងនូវអារម្មណ៍ក្រៀមក្រំសោកស្តាយអាឡោះអាល័យក្រៃលែង ជាមួយក្រុមគ្រួសារសពនូវការបាត់បង់តារាចម្រៀងដែលកំពុងសាងឈ្មោះក្នុងពិភពសិល្បៈអស់ជាច្រើនឆ្នាំមកហើយនោះ ។ នៅវេលាម៉ោងប្រមាណ១០ព្រឹក ថ្ងៃទី១០ មករា សពរបស់តារាចម្រៀងវណ្ណ មករា ត្រូវបានដឹកតាមរថយន្តពេទ្យមកតម្កល់ធ្វើបុណ្យនៅបរិវេណវត្តទួលទំពូង ក្នុងរាជធានីភ្នំពេញ។ ភ្លាមៗនោះ សម្រែកស្រែកយំបោកប្រាណរបស់បងប្អូនឪពុកម្តាយកូនក្មួយ ដែលបន្លឺឡើងយ៉ាងតក់ស្លុត និងខ្លះស្ទើរតែមិននឹកស្មានថា បងប្រុស កូន ឬឪពុកមា ត្រូវចាកចេញគ្មានថ្ងៃវិលត្រឡប់បែបនេះទេ ។ សម្រែកយំឮតែពាក្យថា «កូនមិនស្លាប់ទេ ! បងមិនត្រូវទៅចោលពួកខ្ញុំឡើយ ! មិនគួរទេ!» ដែលធ្វើឱ្យមិត្តភក្តិសិល្បករសាច់ញាតិដែលទៅចូលរួមរៀបចំធ្វើបុណ្យស្រក់ទឹកភ្នែកគ្រប់គ្នា និងខ្លោចចិត្តពីដំណឹងដ៏រន្ធត់នេះ ។
ពិតជាគ្រោះអកុសលស្មានមិនដល់ ដែលមច្ចុរាជតាមយកជីវិតតារាចម្រៀងរូបនេះមិនលើកលែង និងកម្រកើតមានហេតុការណ៍បែបនេះណាស់ ។ ហេតុការណ៍នេះបានកើតឡើងកាលពីវេលារំលងអធ្រាត្រចូលថ្ងៃទី១០ មករា គ្រាដែលតារាចម្រៀងរូបនេះ និងមិត្តភក្តិជាច្រើននាក់បានចេញដំណើរពីភ្នំពេញទៅកាន់ខេត្តព្រះសីហនុ ។
តារាចម្រៀង ទិត្យ វិច្ឆិកា ដែលបានឃើញហេតុការណ៍នេះបានបញ្ជាក់ថា កាលពីពាក់កណ្តាលអធ្រាត្រ ថ្ងៃទី៩ ខែមករា លោក វណ្ណ មករា និងមិត្តភក្តិចំនួន២រថយន្តបានធ្វើដំណើរទៅកាន់ខេត្តព្រះសីហនុទាំងយប់ ដើម្បីដើរលេងកម្សាន្ត ។ លោកបន្តថា លោកជិះរថយន្តផ្សេង ចំណែកលោកវណ្ណ មករា ជិះរថយន្តព្រូស ស៊េរី២០០៤ ដោយជិះគ្នាចំនួន៤នាក់ជាមួយមិត្តភក្តិប្រុសនិងមិត្តស្រីម្នាក់ ដោយមិត្តភក្តិរបស់លោកគឺជាអ្នកបើក ។
លោក ទិត្យ វិច្ឆិកា បន្តថា ក្រោយពីធ្វើដំណើរមកដល់ចំណុចផ្សារព្រៃនប់ រថយន្តរបស់លោកវណ្ណ មករា ក៏ជួបគ្រោះថ្នាក់ចរាចរណ៍ដោយក្រឡាប់ទាំងមិនបានប៉ះពារជាមួយយានយន្តណាផ្សេងទេ គឺក្រឡាប់ដោយខ្លួនឯង ។
លោកបន្តថា ក្រោយពីទទួលដំណឹងតាមទូរស័ព្ទពីមិត្តភ័ក្តិ លោកក៏ត្រឡប់មកជួបមិត្តភ័ក្តិ និងលោក វណ្ណ មករា វិញ ។ ប៉ុន្តែពេលមកដល់ លោក វណ្ណ មករា និងមិត្តស្រី បានឡើងរថយន្តសង្គ្រោះបន្ទាន់ ត្រឡប់មកភ្នំពេញវិញបាត់ទៅហើយ ។
លោកថា ការជួបគ្រោះថ្នាក់ជំហានដំបូងនេះមិនបានធ្វើឱ្យលោក វណ្ណ មករា របួសធ្ងន់ធ្ងរទេ គ្រាន់តែចុកទ្រូងបន្តិចបន្តួចប៉ុណ្ណោះ ។ នេះបើតាមលោកឮពីប្រជាពលរដ្ឋបានប្រាប់លោក ។
លោកបន្តថា ក្រោយពីរង់ចាំការដោះស្រាយជាមួយសមត្ថកិច្ចនៅទីនោះមិនទាន់នឹងចប់សព្វគ្រប់ផង ស្រាប់តែម៉ោងប្រមាណជាង៦ព្រឹកថ្ងៃដដែល លោកទទួលដំណឹងតាមទូរស័ព្ទបន្ទាប់ថា រថយន្តសង្គ្រោះបន្ទាន់ដែលដឹកលោក វណ្ណ មករា ទៅសង្គ្រោះនៅភ្នំពេញ បានក្រឡាប់និងបណ្តាលឱ្យតារាចម្រៀងរូបនេះស្លាប់បាត់បង់ជីវិតនៅនឹងកន្លែងទៅហើយ ។
លោក ទិត្យ វិច្ឆិកា បានបញ្ជាក់ទាំងអារម្មណ៍មិនអស់ចិត្ត និងមិនគួរឱ្យជឿអំពីហេតុការណ៍ដ៏រន្ធត់នេះ ហើយពេលនេះក្រុមគ្រួសារលោក វណ្ណ មករា កំពុងធ្វើការដោះស្រាយជាមួយខាងរថយន្តសង្គ្រោះបន្ទាន់ ។
គួរបញ្ជាក់ដែរថា លោក វណ្ណ មករា មានវ័យ៣២ឆ្នាំ ជាអតីតតារាចម្រៀងប្រចាំផលិកម្ម យូធូ ហើយលោកធ្លាប់បានធ្វើឱ្យទស្សនិកជនជាច្រើនស្គាល់ តាមរយៈបទចម្រៀងរបស់ខ្លួន និងការច្រៀងលំនាំតាមបទចម្រៀងរបស់តារាចម្រៀងព្រាបសុវត្ថិ ។
មុនពេលស្លាប់ លោកគឺជាតារាចម្រៀងប្រចាំក្លិបកម្សាន្តរាត្រីមួយចំនួននៅរាជធានីភ្នំពេញ ។ បច្ចុប្បន្នលោកមានភរិយា និងកូនប្រុស២នាក់ ហើយសពបានតម្កល់ទុកធ្វើបុណ្យតាមប្រពៃណី នៅបរិវេណវត្តទួលទំពូង ។ ក្រៅពីអាជីពចម្រៀង វណ្ណ មករា ក៏ធ្លាប់សម្តែងក្នុងវិស័យភាពយន្តជាច្រើន ដែលភាពយន្តរបស់តារាចម្រៀងអភ័ព្វរូបនេះសម្តែង មានទាំងរឿងភាគ និងរឿងដុំ ដោយត្រូវអ្នកដឹកនាំរឿងម្ចាស់ផលិតកម្មកោតសរសើរចំពោះការសម្តែងរបស់លោក ថាមានភាពប៉ិនប្រសប់ ។ ទស្សនិកជននិងតារារួមអាជីព នាំគ្នាបួងសួងទាំងក្រៀមក្រំអាឡោះអាល័យ សូមឱ្យវិញ្ញាណក្ខន្ធលោកបានទៅកាន់សុគតិភពកុំបីឃ្លៀងឃ្លាតឡើយ ៕
មករា ២០១៦ ស្ថិតនៅតាមបណ្តោយស្ពានព្រះមុនីវង្សចាស់ ក្នុងសង្កាត់ច្បារអំពៅ២ ខណ្ឌច្បារអំពៅ ។
– See more at: https://kohsantepheapdaily.com.kh/article/137586.html#sthash.ovaNVGml.dpuf
មករា ២០១៦ ស្ថិតនៅតាមបណ្តោយស្ពានព្រះមុនីវង្សចាស់ ក្នុងសង្កាត់ច្បារអំពៅ២ ខណ្ឌច្បារអំពៅ ។
– See more at: https://kohsantepheapdaily.com.kh/article/137586.html#sthash.ovaNVGml.dpuf
ចែករំលែកព័តមាននេះ