ខេត្តតាកែវ ៖ ក្រោយពីមានរឿងរា៉វនៃការប្តឹងចោទប្រកាន់ថា លោកហាស់ សុបិន្ត អតីតអភិបាលរងខេត្តកំពត កំពុងតែចាក់ដីលុបយកប្រឡាយទឹក ដែលជាប្រឡាយមេសម្រាប់រំដោះទឹកលិចសាលាក្រុង នោះ ក៏ឈានដល់ការចុះវាស់វែង…
ខេត្តតាកែវ ៖ ក្រោយពីមានរឿងរា៉វនៃការប្តឹងចោទប្រកាន់ថា លោកហាស់ សុបិន្ត អតីតអភិបាលរងខេត្តកំពត កំពុងតែចាក់ដីលុបយកប្រឡាយទឹក ដែលជាប្រឡាយមេសម្រាប់រំដោះទឹកលិចសាលាក្រុង នោះ ក៏ឈានដល់ការចុះវាស់វែង ហើយលទ្ធផលចេញមកគឺបង្ហាញថាភាគីអ្នកប្តឹង គឺជាអ្នករំលោភចូលប្រឡាយទៅវិញ ។
លោក ហាស់ សុបិន្ត បានបញ្ជាក់ឲ្យអ្នកសារព័ត៌មានដឹងនៅថ្ងៃទី០៣ ខែសីហា ឆ្នាំ២០២១នេះថា បន្ទាប់ពីរងនៅភាពអាម៉ាស់ដោយសារតែការចោទប្រកាន់បំភ្លៃខុសពីការពិតមកលើរូបលោកថា បានចាក់អាចម៌ដីរំលោភយកប្រឡាយរំដោះទឹកពីសំណាក់អ្នកជិតខាងឈ្មោះ សួន គឹមជ្រិន ដែលមានមុខងារ ជានាយករងរដ្ឋបាលសាលាខេត្តតាកែវ ។
ឥឡូវនេះ ក្រោយពីការចុះពិនិត្យផ្ទាល់ ដោយមានមន្ត្រីជំនាញធនធានទឹក មន្ត្រីជំនាញភូមិបាលក្រុង អាជ្ញាធរភូមិឃុំ និងអភិបាលក្រុងដូនកែវ លោក កង អាណាន់ ចុះពិនិត្យកាលពីថ្ងៃទី០១ ខែសីហា ឆ្នាំ២០២១ បានធ្វើការវាស់វែងជាក់ស្តែងលើទីតាំងដីរបស់លោករួច ដោយបញ្ជាក់ថា មិនមានរំលោភយកប្រឡាយរំដោះទឹកនោះទេ ស្រាប់តែមន្ត្រីជំនាញបានរកឃើញថា អ្នកជិតខាងដែលជាអ្នកស្នើសុំឲ្យជំនាញចុះពិនិត្យ ហើយមានព្រំដីជាប់រូបលោក ហាស់ សុបិន្តនោះ ជាអ្នកចាក់ដីរំលោភយកប្រឡាយរំដោះទឹកស្អុយចេញពីក្រុងដូនកែវទៅវិញ (ប្តឹងទៅជំនាញថា គេរំលោភយកប្រឡាយ តែដល់ពេលពិនិត្យជាក់ស្តែងគេមិនបានរំលោភយក បែរជារកឃើញថា ខ្លួនឯងដែលជាអ្នកប្តឹងគេនោះ ជាអ្នករំលោភយកដីប្រឡាយរំដោះទឹកទៅវិញ ) គួរឲ្យអស់សំណើចណាស់ហើយចំណេះជិះកឯង ។
មន្ត្រីជំនាញនៃមន្ទីរធនធានទឹកបានបញ្ជាក់ក្នុងថ្ងៃចុះពិនិត្យនោះ ឲ្យអ្នកសារព័ត៌មានដឹងថា អ្នកដែលរំលោភយកប្រលាយរំដោះទឹកដែលមានព្រំដីជាប់ជាមួយលោក ហាស់ សុបិន្ត ខាងលើមន្ទីរជំនាញធនធានទឹក និងធ្វើលិខិតទៅអាជ្ញាធរខេត្ត ដើម្បីស្នើសុំភាគីខាងលើធ្វើការដោះស្រាយនៅបញ្ហាចាក់ដីលុបយកប្រឡាយទឹកនេះ ព្រោះប្រឡាយរំដោះទឹកចេញពីក្រុងដូនកែវនេះជាប្រឡាយសំខាន់មួយក្នុងការរំដោះទឹកភ្លៀង និងទឹកស្អុយបញ្ចៀសការជនលិចក្រុងនារដូវភ្លៀងធ្លាក់ រដូវវស្សា ។
ដោយឡែកលោក កង អាណាន់ អភិបាលក្រុងដូនកែវ បានឲ្យដឹងថា លោកនឹងបន្តពិនិត្យការពាក់ព័ន្ធនេះបន្តទៀត ដើម្បីធ្វើការបើកមុខប្រឡាយរំដោះទឹកនេះចេញវិញ ដើម្បីបញ្ចៀសការជនលិចទឹកក្នុងក្រុងដូនកែវ ខណៈដែលការពិនិត្យនាពេលនោះ គឺមន្ត្រីជំនាញ និងអាជ្ញាធរពាក់ព័ន្ធបានឯកភាពព្រមរួមគ្នា ដើម្បីស្តារពង្រីកប្រឡាយរំដោះទឹកចាស់ដែលមានទំហំ ៣ម៉ែត្រ ឲ្យមានទំហំធំជាងមុន គឺស្មើ១៤ម៉ែត្រ ដោយវាស់ចេញពីអ័ក្សនៃមាត់ប្រឡាយចាស់ ចេញ ៧ម៉ែត្រសងខាង ។
ទាក់ទិន និងបញ្ហានេះលោក សួន គឹមជ្រិន បានឲ្យដឹងតាមការសម្ភាសន៍តាមទូរស័ព្ទនៅព្រឹកថ្ងៃទី០៣ ខែសីហានេះថា ដីខាងលើដែលមន្ត្រីជំនាញពាក់ព័ន្ធថា បានរកឃើញដីរបស់លោករំលោភយកប្រឡាយនោះ គឺជាដីរបស់លោកឪពុកក្មេករបស់គាត់ ដែលបានទិញចំនួន២ប្លង់ តែប្លង់នៃសន្លឹកប័ណ្ណនោះនៅមិនទាន់បានសម្រេចចុះចូលជាប្លង់ប្រព័ន្ធនៅឡើយទេ ជាមួយគ្នានេះដែរ បើសិនជាមន្ត្រីជំនាញ និងអជ្ញាធរពាក់ព័ន្ធថា ដីរបស់ឪពុកក្មេកលោកបានរំលោភយកប្រឡាយរំដោះទឹកនោះ គឺរូបលោកនឹងធ្វើការកាយចេញទៅតាមគោលការណ៍កំណត់របស់គណៈកម្មាការរៀបចំវាស់វែងដី ដែលមានការប៉ះពាល់ដោយសារតែប្រឡាយរំដោះទឹកចេញពីក្រុងដូនកែវនេះ ។
លោកបញ្ជាក់ថា ពីមុនមកលោកធ្លាប់កាយប្រឡាយទឹកមួយដៃអេស្កាវិចទ័រ ក្នុងដីរបស់លោកចំងាយជាង១០០ម៉ែត្រ ដើម្បីទាញទឹកយកមកបូមដាក់សម្រាប់ធ្វើស្រែផងដែរ ៕
ចែករំលែកព័តមាននេះ