រាជធានីភ្នំពេញ ៖ ក្រុមហ៊ុនអង្គរវ័ន (AngkorONE LLC) បានបើកឱ្យប្រើនូវកម្មវិធីសំរាប់ទូរស័ព្ទដៃ ដែលមានលក្ខណៈឆាប់រហ័សលើកដំបូង និងឥតគិតថ្លៃគឺ AngkorOne Mobile ចាប់ពីថ្ងៃទី២៩ កក្កដា ឆ្នាំ ២០១០ តទៅ ។ចំនួនអ្នកប្រើប្រាស់ទូរស័ព្ទដៃដ៏ច្រើនសន្ធឹកសន្ធាប់ប្រមាណជា៦លាននាក់នៅប្រទេសកម្ពុជា នឹងមានភាពងាយស្រួលក្នុងការចូលនិងទទួលយកនូវមាតិកា និងព័ត៌ មានផ្សេងៗដូចគ្នាក្នុងគេហទំព័រ Angkor One.com ដែលបើកចេញពីកុំព្យូទ័រ ហើយនាពេលបច្ចុប្បន្ននេះ គេហទំព័រ AngkorOne គឺមានការទទួលស្គាល់ និងមានការប្រើប្រាស់ច្រើន ដែលជារៀងរាល់ថ្ងៃគឺមានអ្នកចូលទស្សនារហូតដល់ទៅ៥.០០០នាក់ ។ អ្នកដែលប្រើប្រាស់អង្គរវ័នសំរាប់ទូរស័ព្ទដៃ AngkorOne Mobile អាចធ្វើការទាក់ទងជាមួយនឹងមិត្ដភក្ដិក្នុងគេហទំព័រអង្គរវ័ន តាមរយៈទំព័រសង្គម និងទំព័រសំរាប់អ្នកគាំទ្រ ហើយមិនត្រឹមតែប៉ុណ្ណោះទេ គេអាចវាយជាសារឆ្លើយឆ្លងដោយមិនចាំបាច់ប្រើប្រាស់សារទូរស័ព្ទដៃនោះទេ ។
ពួកគេក៏អាចអានបាននូវព័ត៌មានទាំងក្នុង និងក្រៅប្រទេស ដែលមានមកពី២៥ប្រភពព័ត៌មាន ដូចជា ភ្នំពេញប៉ុស្ដិ៍, VOA, ABC, RA, RFA, CNN និង BBC ជាដើម ។ ម្យ៉ាងវិញទៀត ចំពោះកម្មវិធីដែលកំពុងតែមានប្រជាប្រិយភាព និងមានការសហការពីបណ្ដាញទូរទស្សន៍កម្ពុជា CTN គឺកម្មវិធីសំណួរប្រចាំថ្ងៃ Quiz of the Day នោះអ្នកទស្សនា ក៏ដូចជាសមាជិករបស់អង្គរវ័ន អាចឆ្លើយនូវចំលើយរបស់ពួកគេពីទូរស័ព្ទដៃភ្លាមៗ ខណៈពេលដែលពួកគេកំពុងតែទស្សនាការផ្សាយ បន្ដផ្ទាល់ពី CTN ។ ចំណែកឯអ្នកស្វែងរកការងារក៏រឹតតែមានភាពងាយស្រួលក្នុងការស្វែងរកពីទូរស័ព្ទដៃរបស់ពួកគេដែរ ។
បន្ថែមលើសពីនេះទៀត គេក៏អាចចូលរួមពិភាក្សាលើប្រធានបទណាមួយបានផងដែរ ក្នុងកន្លែងវេទិកាពិភាក្សារបស់អង្គរវ័ន ។ ចំណុចដទៃទៀតដែលរួមបញ្ចូលក្នុង AngkorOne Mobile នោះ គឺសមាជិករបស់យើង អាចបើកនូវទីតាំងរបស់ដៃគូ ដែលបាននិងកំពុងប្រើប្រាស់នូវប័ណ្ណ AngkorOne VIP របស់យើងក៏ដូចជាការបង្ហាញនូវអត្រាប្ដូរប្រាក់ផងដែរ ។ យើងក៏សូមបញ្ជាក់ផងដែរថា កម្មវិធីអង្គរវ័នសំរាប់ទូរស័ព្ទដៃនេះគឺអាចបើកបានទាំងភាសាខ្មែរ និងភាសាអង់គ្លេស។
តាមប្រសាសន៍របស់លោកស្ទេវិន ផាត ដែលជាស្ថាបនិក និងជាប្រធានរបស់ក្រុមហ៊ុនអង្គរវ័ន បានមានប្រសាសន៍ថា “កាលពីមួយឆ្នាំកន្លងទៅនេះ អង្គរវ័នបាននាំប្រទេសកម្ពុជាទៅរកទិដ្ឋភាពនៃអ៊ីនធើរណេត ។ សំរាប់ថ្ងៃនេះ កម្មវិធីសំរាប់ទូរស័ព្ទដៃរបស់ AnkorOne.com ក៏រំពឹងថា អាចទទួលបានលទ្ធផលដូចគ្នាចំពោះអ្នកដែលប្រើប្រាស់ទូរស័ព្ទ” ។ លោកបានបន្ដទៀតថា កិច្ចខិតខំប្រឹងប្រែង និងកសាងឡើងដោយបុគ្គលិកខ្មែរ ចំពោះ AngkorOne សំរាប់ទូរស័ព្ទដៃអាចផ្ដល់នូវ មាតិកាដែលមានតំលៃ និងសំខាន់សំរាប់ប្រជាជនខ្មែរគ្រប់ពេលវេលាទាំងអស់ និងពិសេសសំរាប់អ្នកដែលមានភាពលំបាក ឬ មិនបានភ្ជាប់អ៊ីនធើរណេតទៅនឹងកុំព្យូទ័រ។ យើងក៏ព្យាយាមបង្កើតនូវកម្មវិធីមួយនេះឡើង ដើម្បីកាត់បន្ថយនូវចំណាយរបស់អ្នកប្រើប្រាស់ និងអាចទទួលយកនូវកម្មវិធីនេះបានដោយឥតគិតថ្លៃ ។
អ្នកប្រើប្រាស់អាចទាញយកកម្មវិធីទូរស័ព្ទអង្គរវ័នឥឡូវនេះពីទូរស័ព្ទរបស់អ្នកនៅ www.mobile.angkorone.com។
ព័ត៌មានខ្លះៗពីក្រុមហ៊ុនអង្គរវ័ន AngkorOne LLC ៖ ក្រុមហ៊ុនអង្គរវ័នគឺជាក្រុមហ៊ុនដែលបានបង្កើតឡើងនៅសហរដ្ឋអាមេរិក និងផ្ដោតសំខាន់លើការកសាងនូវ ផលិតផលផ្នែកព័ត៌មានវិទ្យាលំដាប់ថ្នាក់ពិភពលោកសំរាប់ជនជាតិខ្មែរទូទាំងពិភពលោក ក៏ដូចជាទេសចរជាតិដែរ ។ ក្រុមហ៊ុននេះក៏បានប្ដេជ្ញាក្នុងការបរិច្ចាគនូវផ្នែកខ្លះនៃ ប្រាក់ចំណេញរបស់ខ្លួនលើកម្មវិធីសង្គមចំនួនបួនសំខាន់ៗគឺការអប់រំ សុខភាព សុវត្ថិភាព និងក្មេងកំព្រា ។ ស្ថាបនិក និងប្រធានរបស់ ក្រុមហ៊ុន AngkorOne គឺលោកស្ទេវិន ផាត និងជាសហគ្រិនខ្មែរ-អាមេរិកាំង ដែលបានត្រឡប់មកស្រុកកំណើតរបស់លោកវិញ បន្ទាប់ពីការចំណាយពេលអស់៣៣ឆ្នាំនៅសហរដ្ឋអាមេរិក នឹងបន្ដកសាងនូវក្រុមហ៊ុននេះ ។ ព័ត៌មានបន្ថែមអាចទាក់ទងជាមួយកញ្ញា អាថាណ្ណា នូ ទូរស័ព្ទលេខ ០១២ ៤៥១ ១៩៥ ៕
ចែករំលែកព័តមាននេះ