ដាយត្រីប្រា រាប់រយម៉ែត្រ ត្រូវគេលួចដាក់ ក្នុងស្រុកលើកដែក ខណៈមន្ត្រីថាចុះចាប់រួចហើយ តែជាក់ស្តែងនៅមាន
- កណ្តាល
ខេត្តកណ្តាល ៖ ទោះបីស្ថិតក្នុងរដូវហាមឃាត់ មិនអោយធ្វើការនេសាទក៏ដោយ ប៉ុន្តែនៅតាមបណ្តោយដងទន្លេមេគង្គ ត្រង់ចំណុច
ខេត្តកណ្តាល ៖ ទោះបីស្ថិតក្នុងរដូវហាមឃាត់ មិនអោយធ្វើការនេសាទក៏ដោយ ប៉ុន្តែនៅតាមបណ្តោយដងទន្លេមេគង្គ ត្រង់ចំណុចភូមិព្រែកតូច ឃុំព្រែកទម្លាប់ ស្រុកលើកដែក ខេត្តកណ្តាល គេនៅតែសង្កេតឃើញមានវត្តមានដាយត្រីប្រារាប់រយម៉ែត្រ ត្រូវបានគេលួចដាក់ចំនួន៣កន្លែង និងកើបប្រមូលយកកូនត្រីប្រាលក់ ក្នុង១ថ្ងៃៗរាប់លានកូន ហើយពុំឃើញមានមន្ត្រីជំនាញជលផល ឬអាជ្ញាធរពាក់ពន្ធ័ណាម្នាក់ ចុះបង្ក្រាបឡើយ។
ប្រភពពត៌មានពីអ្នកស្រុកនៅជាប់កន្លែងដែលគេដាក់ដាយត្រីប្រានោះ បានអោយដឹងថា ដាយត្រីប្រានេះ គេដាក់រាល់ឆ្នាំទៅហើយ ហើយឆ្នាំនេះគេដាក់៣កន្លែង គឺចាប់ពីក្រោយឃ្លាំងអេតចាយលោកឩកញ៉ាឡាយទូច រហូតមកដល់ស្ពានលេខ៣ ( ស្ពានព្រែកសណ្តាយ ) ក្នុងឃុំព្រែកទម្លាប់ ហើយអ្នកដាក់នោះមិនដឹងអ្នកណាទេ ប៉ុន្តែគេមានមេការម្នាក់ឈ្មោះ ថាវ ជនជាតិវៀតណាម ជាអ្នកនៅមើលការខុសត្រូវនៅកន្លែងដាយត្រីនេះផ្ទាល់ ហើយគេចាប់ដាក់រយៈពេលជិតកន្លះខែមកហើយ។
តាមប្រភពដដែលនេះបានបន្តទៀតថា ដាយត្រីប្រានេះក្នុង១ថ្ងៃគេលើក២ដង គឺពេលព្រឹកព្រលឹមម្តង និងពេលល្ងាចម្តង ហើយពេលលើកម្តងៗគឺបានកូនត្រីប្រារាប់លានកូនឯណោះ ហើយកូនត្រីទាំងនោះគេមិនលក់អោយអ្នកស្រុកនៅក្បែៗនោះទេ គឺគេមានម៉ូយមកប្រមូលទិញយកទៅទាំងអស់ មានប៉ុន្មានក៏យកដែរ តែមិនដឹងគេយកទៅធ្វើអ្វីនោះទេ។
ជុំវិញរឿងលួចដាក់ដាយត្រីប្រាខាងលើនេះដែរ ពេលភ្នាក់ងារយកពត៌មានកោះសន្តិភាពទូរសព្ទ័ទៅសួរលោក មាស សាន់ មន្ត្រីជលផលស្រុកលើកដែក បានឆ្លើយយ៉ាងខ្លីថា ពិតជាមានគេលួចដាក់ដាយត្រីប្រា នៅតាមដងទន្លេមេគង្គពិតមែន ប៉ុន្តែលោកបានចុះចាប់អស់ហើយ រួចក៏បិទទូរសព្ទ័ទៅ។
ប៉ុន្តែអ្វីដែលគេឃើញជាក់ស្តែង គឺដាយត្រីប្រាទាំង៣កន្លែងនោះ គឺគេនៅតែបន្តដាក់យ៉ាងរំភើយដដែល ហើយអ្នកស្រុកក្បែនោះបានអះអាងថា មិនដែលឃើញមានមន្ត្រីជលផលណា ចុះមកចាប់នោះទេ ដែលនេះមានន័យថា ចម្លើយរបស់លោក មាស សាន់ ប្រាប់មកអ្នកពត៌មាន គឺគ្រាន់តែជាពាក្យកុហកដោះសារ យករួចខ្លួនតែប៉ុណ្ណោះ៕
ចែករំលែកព័តមាននេះ