ខេត្តពោធិ៍សាត់ ៖ យោងតាមសេចក្ដីសម្រេចរបស់រាជរដ្ឋាភិបាលស្ដីពីការបិទខ្ទប់ខេត្តចំនួន០៨ គឺខេត្តកោះកុង ខេត្តពោធិ៍សាត់ ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ ខេត្តព្រះវិហារ និងខេត្តសៀមរាប ដើម្បីទប់ស្កាត់ការឆ្លងរាលដាលក្នុងសហគមន៍នៃមេរោគកូវីដ១៩ និងប្រភេទកជំងឺបម្លែងដែលតា។
អនុវត្តសេចក្ដីសម្រេចនេះ ខេត្តពោធិ៍សាត់បានធ្វើការបិទខ្ទប់ចាប់ពីម៉ោង២៣និង៥៩នាទីយប់ថ្ងៃទី២៩ កក្កដា ឆ្នាំ២០២១ តទៅ រហូតដល់ថ្ងៃទី១២ ខែសីហាឆ្នាំ២០២១ ទើបបើកឲ្យចរាចរណ៍ឡើងវិញ។ ការបិទខ្ទប់ក្នុងភូមិសាស្ត្រខេត្តពោធិ៍សាត់នេះមាន០៨គោលដៅ ក្នុងនោះ នៅស្រុកក្រគរមាន០២គោលដៅ គឺផ្លូវជាតិលេខ៥ព្រំប្រទល់ខេត្តពោធិ៍សាត់ និងខេត្តកំពង់ឆ្នាំង ព្រំប្រទល់ឃុំឈើតុំនិងស្រុកទឹកផុសខេត្តកំពង់ឆ្នាំង។ ស្រុកបាកានមាន០១គោលដៅ គឺផ្លូវជាតិលេខ៥ព្រំប្រទល់ខេត្តពោធិ៍សាត់ និងខេត្តបាត់ដំបង។ ស្រុកតាលោសែនជ័យមាន០១គោលដៅគឺព្រំប្រទល់ឃុំតាលោនិងស្រុករុក្ខគិរីខេត្តបាត់ដំបង។ ស្រុកវាលវែងមាន០៤គោលដៅ គឺព្រំប្រទល់ឃុំអូរសោមនិងខេត្តកោះកុង, ព្រំប្រទល់ឃុំថ្មដានិងខេត្តកោះកុង ព្រំប្រទល់ឃុំក្រពើពីរនិងស្រុកសំឡូតខេត្តបាត់ដំបង និងច្រកថ្មដា(ព្រំដែនកម្ពុជា ថៃ) ។ ខេត្តពោធិ៍សាត់ពុំមានកំណត់តំបន់លឿង លឿងទុំ និង តំបន់ក្រហមនោះទេ។
ការបិទខ្ទប់នេះ សមត្ថកិច្ចបានត្រួតពិនិត្យការធ្វើដំណើរចេញចូលឆ្លងកាត់ព្រំប្រទល់ខេត្ត និងដាក់ចេញរួមគ្នានូវវិធានការចាំបាច់នានា ដែលត្រូវអនុវត្តក្នុងភូមិសាស្ត្រខេត្តដែលមានព្រំប្រទល់ជាប់គ្នា សំដៅគ្រប់គ្រងតំបន់ដែលមានការផ្ទុះឆ្លងរាលដាលនៃជំងឺកូវីដ១៩ ជាពិសេសមេរោគកូវីដ១៩ប្រភេទដែលតា ក៏ដូចជាទប់ស្កាត់ការឆ្លងរាលដាលនៃជំងឺនេះក្នុងភូមិសាស្ត្រដែលស្ថិតក្រោមដែនសមត្ថកិច្ចរបស់ខ្លួន។ ចំពោះរថយន្ដពន្លត់អគ្គីភ័យ រថយន្ដសង្គ្រោះបន្ទាន់ រថយន្ដដឹកទំនិញគ្រឿងឧបភោគ បរិភោគ រថយន្ដដឹកកងកម្លាំង រថយន្ដប្រតិភូក្រុមការងារដែលចាំបាច់ និងរថយន្ដឯកជនដឹកអ្នកជំងឺយកទៅសង្គ្រោះបន្ទាន់ នឹងអនុញ្ញាតឲ្យចេញចូលបានប្រសិនបើមានលិខិតបញ្ជាក់ពីអង្គភាពនិងគ្រូពេទ្យច្បាស់លាស់។ ចំពោះហាងផឹកស៊ីមានខ្យូសអង្គុយ ការជួបជុំគ្នាក្នុងពិធីផ្សេងៗ និងការប្រមូលផ្ដុំគ្នាច្រើន ត្រូវបានផ្អាកជាបណ្ដោះអាសន្ន លើកលែងតែអាហារដ្ឋានដែលមានការវេចខ្ចប់តែប៉ុណ្ណោះ។
ប្រជាពលរដ្ឋខេត្តពោធិ៍សាត់ បានគាំទ្រទាំងស្រុងចំពោះសេចក្ដីសម្រេចរបស់រាជរដ្ឋាភិបាល និងការអនុវត្តផ្ទាល់របស់ថ្នាក់ដឹកនាំខេត្ត ហើយពួកគាត់រីករាយនិងចូលរួមអនុវត្តទាំងអស់គ្នា ដើម្បីទប់ស្កាត់ការឆ្លងរាលដាលក្នុងសហគមន៍នៃមេរោគកូវីដ១៩ឲ្យមានប្រសិទ្ធភាពខ្ពស់ ពិសេសមេរោគកូវីដ១៩ប្រភេទដែលតា ដែលកំពុងផ្ទុះការចម្លងខ្លាំងមកពីប្រទេសឥណ្ឌានិងប្រទេសថៃនេះ៕
ចែករំលែកព័តមាននេះ