រាជធានីភ្នំពេញ ៖ បុរស និងស្ត្រីម្នាក់ កាលពីព្រឹកថ្ងៃទី៣០ ខែកក្កដា ឆ្នាំ២០២១ ត្រូវបានកម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ ធ្វើការនាំខ្លួនទៅកាន់សាលាដំបូងរាជធានីភ្នំពេញ ពាក់ព័ន្ធពីបទ.អំពើផឹត. (រូបសវនកិច្ចជាមួយស្ត្រីដទៃពុំមែនជាប្រពន្ធរបស់ខ្លួន) ពោលគឺជាសំណុំរឿងប្រពន្ធ និងកូនតាមទាន់ប្តី/ឪពុក កំពុងរួមមេត្រីជាមួយស្ត្រីម្នាក់ ដែលមិនមែនជាប្រពន្ធស្របច្បាប់ ។
បុរសខាងលើមានឈ្មោះ ប្រាក់ ដារ៉ា អាយុ៤៩ឆ្នាំ មុខរបរជាមន្ត្រីសុខាភិបាល ខេត្តកំពង់ស្ពឺ ស្នាក់នៅផ្ទះលេខ៣៤ ផ្លូវលំ ភូមិ-ឃុំស្វាយក្រវ៉ាន់ ស្រុកច្បារមន ខេត្តកំពង់ស្ពឺ ។ ចំណែកស្ត្រីឈ្មោះ លី ដារ័ត្ន អាយុ៣៩ឆ្នាំ មុខរបរលក់កាហ្វេ ស្នាក់នៅផ្ទះជួល ផ្លូវលេខ៥៥៥ ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
សំណុំរឿងនេះបានស្ថិតនៅក្នុងដៃលោក សំម ឬទ្ធីវាសនា ព្រះរាជអាជ្ញារងអមសាលាដំបូងរាជធានីភ្នំញ បើកការស៊ើបសួរទៅតាមពាក្យបណ្តឹងរបស់ឈ្មោះ សេង ថាវី អាយុ៤២ឆ្នាំ ដែលជាប្រពន្ធរបស់បុរសដែលកំពុងជាប់សង្ស័យខាងលើនេះ ។
ប្រភពព័ត៌មាននៅសាលាដំបូងរាជធានីភ្នំពេញ បានបង្ហើបពីអង្គហេតុក្នុងសំណុំរឿងនេះឲ្យដឹងថា ជនរងគ្រោះឈ្មោះ សេង ថាវី និងជនសង្ស័យឈ្មោះ ប្រាក់ ដារ៉ា បានរៀបអាពាហ៍ពិពាហ៍ជាមួយគ្នាតាំងពីឆ្នាំ១៩៩៨ ដោយមានចាស់ទុំដឹងឮទាំងសងខាង និងបានចុះសំបុត្រអាពាហ៍ពិពាហ៍ (អេតាស៊ីវីល) នៅសាលាឃុំ-ស្រុកកំណើតត្រឹមត្រូវតាមច្បាប់ទៀតផង ។ ក្រោយរៀបអាពាហ៍ពិពាហ៍តាមទំនៀមទំលាប់ប្រពៃណីខ្មែររួចមក ពួកគេបានរួមរស់ជាប្តីប្រពន្ធយ៉ាងស្អិតរមួត ភ្លេចខ្លួនមិនបានប៉ុន្មានឆ្នាំផងបង្កើតបានកូនសុទ្ធតែស្រី៣នាក់ ដែលមកដល់ពេលនេះកូនស្រីច្បងអាយុ២៣ឆ្នាំ កូនកណ្តាលអាយុ១៩ឆ្នាំ និងកូនស្រីពៅអាយុ១៣ឆ្នាំហើយ ។
ប្រភពព័ត៌មានបន្តថា ចាប់តាំងពីចាប់ដៃគ្នាជាប្តីប្រពន្ធឈ្មោះ ប្រាក់ ដារ៉ា ពុំដែលមានបង្កបញ្ហាអ្វីដល់គ្រួសារនោះទេ និងចេះជួយធ្វើការងាររកស៊ីបានប្រាក់ទំនុកបំរុងចិញ្ចឹមប្រពន្ធកូនទៀតផង ។ ប៉ុន្តែចាប់តាំងខែមករា ឆ្នាំ២០២១ នេះមក ឈ្មោះ ប្រាក់ ដារ៉ា ដែលជាស្វាមីនឹងជាឪពុកភាគីជនរងគ្រោះ មានការប្រែប្រួលខុសពីធម្មតា និងចេះតែបង្កបញ្ហាឈ្លោះទាស់ទែងរករឿងជេរបញ្ចោប្រពន្ធកូន ដោយគ្មានហេតុផលច្បាស់លាស់ ។ ដោយមានការសង្ស័យយ៉ាងដូច្នោះ ទើបភាគីខាងដើមបណ្តឹងបានឆែកមើលទូរស័ព្ទរបស់លោកប្តី ពេលនោះទើបដឹងថា ជនសង្ស័យមានទំនាក់ទំនងស្នេហាលួចលាក់ជាមួយឈ្មោះ លី ដារ័ត្ន ជាអ្នកលក់កាហ្វេនៅរាជធានីភ្នំពេញ ឯណោះយ៉ាងក្រហ៊ើៗ ។
ក្នុងនោះទៀតភាគីដើមបណ្តឹងបានស្រាវជ្រាវដឹងថា លោកប្តីជាមន្ត្រីសុខាភិបាល តែងតែផ្ញើប្រាក់ទៅជួយសង្គ្រោះស្ត្រីលក់កាហ្វេម្នាក់នោះ ឲ្យថ្លៃជួលផ្ទះ ទឹកភ្លើងជាបន្តបន្ទាប់ និងលួចលាក់ជួបគ្នារួម.រក្សមេត្រីជាញឹកញាប់ទៀតផង ។
ប្រភពដដែលបន្តទៀតថា លុះថ្ងៃទី២៨ ខែកក្កដា ឆ្នាំ២០២១ វេលាម៉ោងប្រហែល៣រសៀល ភាគីខាងជនរងគ្រោះ ពោលគឺម្តាយនិងកូន បានតាមទាន់ និងរកឃើញលោកប្តីឬលោកឪពុក ប្រាក់ ដារ៉ា កំពុងនាំស្រីស្នេហ៍ឈ្មោះ លី ដារ័ត្ន ជាអ្នកលក់កាហ្វេ ឡើងឋានសួរជាមួយគ្នានៅផ្ទះសំណាក់ «សម្បត្តិមាស» ក្នុងបន្ទប់លេខ១៦ ចំណុចផ្លូវលំ ក្នុងសង្កាត់ចោមចៅ៣ ខណ្ឌពោធិសែនជ័យ រាជធានីភ្នំពេញ ។
ប្រភពដដែលបន្តទៀតថា ដោយឃើញដូច្នោះភាគីជនរងគ្រោះទាំងម្តាយ និងកូន បានចាប់ខ្លួនលោកប្តី ឬលោកឪពុក នាំទៅកាន់សមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ ឲ្យជួយចាត់ការតាមផ្លូវច្បាប់ដោយគ្មានការលើកលែង ។
ករណីខាងលើនេះផងដែរ ជនសង្ស័យជាមន្ត្រីសុខាភិបាល ជាប្តី និងជាឪពុកដ៏ល្អ ដែលកំពុងរងនូវការចោទប្រកាន់ពីសំណាក់ប្រពន្ធ និងកូន ក៏បានទទួលស្គាល់កំហុសនៅចំពោះសមត្ថកិច្ចផងដែរថា «ខ្លួនពិតជាបានប្រព្រឹត្តអំពើផិត ដូចដែលប្រពន្ធកូនតាមទាន់នោះមែន» ៕
ចែករំលែកព័តមាននេះ