ខេត្តកំពត ៖ អាជ្ញាធរខេត្តកំពតចេញសេចក្ដីប្រកាសជាផ្លូវការសម្រេចបិទខ្ទប់ផ្សារកំពង់ត្រាច ស្ថិតក្នុងស្រុកកំពង់ត្រាច គិតចាប់ពីថ្ងៃទី៣០ កក្កដា នេះ ជាបណ្ដោះអាសន្នសិនរហូតដល់ថ្ងៃទី៥ សីហា ឆ្នាំ២០២១ ។ ការដាក់រនាំងបាំងផ្លូវចូលផ្សារកំពង់ត្រាច អ្នកលក់ដូរភាគច្រើនមិនបានដឹងដំណឹងមុន ស្រាប់តែព្រឹកព្រលឹមថ្ងៃទី៣០ កក្កដា នេះ ក្រុមអាជីវករលក់ដូរទាំងអស់ឃើញបិទផ្សារ ក៏យកអីវ៉ាន់ មានត្រីសាច់ជាដើម ដាក់លក់អមចិញ្ចើមផ្លូវថ្នល់តែម្ដង ។ សូមរំលឹកថា៖ ទុកពេល៣ថ្ងៃ! បើអាជីវករលក់មាសអត់ទៅធ្វើតេស្តទេនឹងបិទផ្សារ«កំពង់ត្រាច»តែម្តង
លោកឃឹម សាមី អភិបាលរងស្រុកកំពង់ត្រាច កាលពីព្រឹកថ្ងៃទី៣០ កក្កដា បាននិយាយប្រាប់អោយដឹងថា ការសម្រេចបិទផ្អាកដំណើរការផ្សារកំពង់ត្រាចជាបណ្ដោះអាសន្ន នៅថ្ងៃទី៣០ កក្កដា រហូតដល់ថ្ងៃទី៥ សីហា នេះ ព្រោះមានអាជីវកលក់មាសស្ម័គ្រចិត្តបានទៅធ្វើសំណាកនៅមណ្ឌលវិឡាល័យព្រះបិតាជាតិកំពង់ត្រាច-ក្នុងនោះ ក្រុមគ្រូពេទ្យបានរកឃើញក្រុមអាជីវកវិជ្ជមានកូវីដ19ចំនួន១៧នាក់ ដោយរាប់ទាំងលោកហាម បា វប្រធានភាស៊ីផ្សារកំពង់ត្រាចផង ។
លោកឃឹម សាមី អភិបាលរងស្រុកកំពង់ត្រាច បានចុះណែនាំដល់ក្រុមអាជីវកចេញមកលក់ដូរនៅលើចិញ្ចើមផ្លូវថ្នល់នេះ គឺចាប់ពីថ្ងៃស្អែកនេះទៅ អាជ្ញាធរស្រុកមិនអនុញ្ញាតអោយពួកគាត់មកលក់ដូរនៅមុខផ្សារទៀតទេ។ បើនៅតែបន្តលក់ដូរនៅលើដងផ្លូវធ្វើអោយប៉ះពាល់ដល់សណ្ដាប់ធ្នាប់លើផ្លូវសាធារណៈបែបនេះទៀត អាជ្ញាធរចាត់វិធានការតាមផ្លូវច្បាប់ហើយ ។
ចែករំលែកព័តមាននេះ